Gagawaen na saray Tasi nen Jehova so nanduruman kimey da diad masulok ya 200 a bansa. Balet manga 35 labat ed saratan ya bansa so makakaawat na magenap ya donasyon manlapud saray agagi ditan pian nasuportaan iray gastos ed kimey da. Panon to balet ya nasusuportaan iray gastos ed kimey diad saray bansa ya kulang so pundo ra?

 Nononoten na Mananguley ya Ulop na Saray Tasi nen Jehova iray espiritual ya pankaukolan tan saray kimey na saray Tasi diad interon mundo. Iba-badyet ya maong iray pundo tan uusaren itan ed dugan paraan. No say sakey ya branch et mas dakel so naawat ton pundo, say sulok et iiter ed saray bansan aliwan magenap so pundo da. Diad satan ya uksoyan et natutumbok so alimbawa na saray inmunan Kristiano ya tinulongan day arum “diad panamegley na pampapara.” (2 Corinto 8:14) Inusar da ray sulok da pian panoan so pankaukolan na arum ya Kristiano.

 Antoy nalilikna na saray agagin minanabang ed saratan ya sulok ya pundo na arum ya branch? Singa bilang diad Tanzania, masulok ya kapaldua na populasyon ditan et ag-onabot ed 100 pesos so badyet da ed sanagew, kanian inusar iray sulok ya pundo na arum ya branch pian i-renovate so Kingdom Hall na Mafinga Congregation. Oniay insulat na kongregasyon: “Manlapu la nen a-renovate so Kingdom Hall mi, dinmakel so onaatendi ed saray aral mi! Misalsalamat kami ed organisasyon nen Jehova tan ed inkamaiter na saray agagi ed interon mundo, ta natan et mas nai-enjoy mi lay manaral ed marakdakep ya pasen a panagdayewan.”

 Wala ray agagi tayo ed Sri Lanka ya apektadon maong na kakulangay naakan lapud COVID-19 pandemic. Kaiba ed saray apektado si Imara Fernando tan say anak ton si Enosh. Balet salamat ed saray donasyon na arum ya bansa, nitarya ed sikara so tulong ya kaukolan da. Oniay nabasa ed samay ginawa dan card: “Misalsalamat kamin maong ed saray agagi ta impalikna dan inar-aro da kami legan na sarayan mair-irap ya panaon. Talagan maliket kami ta kabiangan kami na sayan pamilya, tan ipipikasi min naynay ed si Jehova ya tulongan to ray agagi tayo diad sayan kaunoran iran agew.”

 Inerman so kawalaan na saray agagi tayo, napapakiwas ira ya iter no antoy walad sikara. Singa bilang, si Enosh et nanggaway melag ya contribution box to pian makatulong met ed saray pamilyan mankaukolan. Apakiwas met si Guadalupe Álvarez ya inabang so walad sikato. Manaayam si Guadalupe ed sakey ya probinsya ed Mexico ya daiset labat so totoon walad minimum wage so nanaalmo da odino walay regular ya trabaho da. Balet siansia nin gagawaen toy anggaay nayarian to pian makapandonasyon. Insulat to: “Misalsalamat ak ed si Jehova ta maomaong tan maar-aro. Amtak ya say donasyon ko et makaarum ed saray inter na arum tan makatulong iya ed saray agagin mankaukolan.”

 Maliket iray branch office ya mangipapawit na kuarta ed saray lugar ya mankaukolan. “Diad dakel ya taon, kaukolan na bansa mi so suporta na arum ya bansa pian nagawaan mi iray kimey mi dia,” so imbaga nen Anthony Carvalho, ya manlilingkor bilang membro na Branch Committee ed Brazil. “Lapud satan ya suporta na saray agagi, baleg so inyaligwas na kimey dia. Natan et anguman met lay situasyon mi ed pinansyal, tan pribilehyo mi so ontulong met ed arum. Sankanonot na saray agagi ed Brazil no antoy nitulong da ed kimey ya panagpulong diad interon mundo tan no panon dan nagawaan so betang da bilang masakripisyon disipulo nen Jesus.”

 Panon ya makatulong iray Tasi nen Jehova ed saray agagi dan mankaukolan? Aliwan diad direktan pangipawit da na kuarta ed saray branch office na arum ya bansa, noagta diad pandonasyon da ed sankamundoan ya kimey. Nagawaan da itan diad pandonasyon da ed contribution box na kongregasyon ya walay akasulat ya “Worldwide Work” odino panamegley na donate.pr418.com. Aapresyaen min maong so amin ya donasyon yo.