“Labalabay koy Kingdom Hall mi!” so kuan nen Nicole, sakey ya kabataan ya sister diad Colombia. “Ditan ko nakakaiba so espiritual ya pamilyak.” Kasin ontan met so nalilikna yo?

 Diad interon mundo, mantitipon iray Tasi nen Jehova diad manga 63,000 ya Kingdom Hall. Komportable tayon mandadayew ed Dios diad saratan ya bilding. Pero aliwan satan labat. Oniay imbaga nen David, sakey ya regular payunir ed Colombia: “Lapud balibali iray Kingdom Hall mi, mas labalabay na totoo ya awaten so ibabangat mi. Mankelaw iray bisita no panon min napansiasiansian marakep so bilding.” Aliwa yan nibanbana labat, talagan pansasagpotan tayon linisan tan mintinaen iray Kingdom Hall tayo. Panon tayon nagagawaan itan?

 Saray kongregasyon ya manguusar ed sakey ya Kingdom Hall so akanbetang ed panmintina ed satan. Pian nagawaan da itan, regular ya lilinisan na saray agagi so Kingdom Hall da. Manggagawa met ira na panagmintina pian naiwasan so pakaderal, tan no wala ray simpli labat ya aderal, aapigeren da lan tampol.

 Pian natulongan iray kongregasyon ya namintina so Kingdom Hall da, mangiyaasain so Local Design/Construction Department (LDC) na saray brother ya magmaliw ya maintenance trainer. Kada maintenance trainer et anemira ya anggad samploran Kingdom Hall so asikasoen to. Bisitaen to iratan insan to ibangat iray agagi ed saray kongregasyon no panon dan asikasoen so Kingdom Hall da. Kada taloran taon, nengnengen ton maong so kada bilding tan amtaen to no kasin walay problemad safety odino walay kaukolan ya apigeren.

 Labalabay na saray agagi iray ibabangat na saray maintenance trainer. Oniay imbaga nen Indhumathi, sakey ya sister ed India: “Balibali may training. Malikeliket kami ta naaralan mi no panaon min pansiansiaen ya walad kondisyon so Kingdom Hall mi.” Oniay imbaga nen Evans, sakey ya brother diad Kenya: “Aapigeren mi lan tampol iray angkelag ya problema antis nin ombaleg iratan kanian dakel so kuartan natitipid mi.”

 Kada taon, ombabatik ed nilasus ya anggad nilibon dolyar a so nagagastos ed panguusar tan panmimintina ed sakey ya Kingdom Hall, depende ed no iner so kulaan na Kingdom Hall, no panon kabayag la itan, tan no pigaran kongregasyon so manguusar ed satan. Panon min nababayaran so amin ya gastos?

 Aalaen ed saray donasyon so gagastosen ed panagmintina ed Kingdom Hall. Oniay impaliwawa nen Alexander, sakey ya brother ed Kazakhstan: “Say arum ya pundo et ibabayar ed Internet, danum, tan kuryente. Say arum balet et isasaliw na saray mabetbet ya uusaren ya singa say tissue, gloves, saray gamit ed panaglinis, tan pintora.” Tan no wala ni ray kaaruman ya naawat ya kontribusyon, idodonasyon itan ed sankamundoan ya kimey pian makatulong ed saray mas baleg tan mas magastos ya proyekto na panagmintina diad interon mundo.

 No say nagastos ed panmintina ed sakey ya Kingdom Hall et mas baleg nen say normal ya nagagastos da ed duara odino taloran bulan, kaukolan ya ikonsulta itan na saray elder ed samay LDC maintenance trainer. No aprobaan na LDC so proyekto, kaslakan et manlapud saray donasyon ed sankamundoan ya kimey so gastosen. Legan na 2023 ya serbisyon taon, asumpal so 8,793 ed saratan ya proyekto tan $76.6 milyon ya dolyar so agastos. Nia so duara ed saratan ya proyekto.

 Diad Angola, dakel so aapigeren ed sakey ya Kingdom Hall ya 15 ya taon lan uusaren. Kaukolan lan salatan so electrical wiring to, wala la ray letak ed padir to, tan ibabaga na saray kakaabay ya onaagus so danum paonlad kaabungan da no onuuran. Inyuksoy na LDC so pangapiger ed sarayan problema. Say agastos et $9,285 ya dolyar. Misalsalamat iray kakaabay tan manbilib ira ed impangapiger ed satan.

 Diad Poland, mantedter so atep na sakey ya Kingdom Hall tan agla nayarin apigeren so carpet. Inaprubaan na LDC ya apigeren so atep tan gawaen itan ya waterproof insan da salatan so carpet. Say agastos et $9,757 ya dolyar. Lapud satan, nausar lamet iyan Kingdom Hall tan pigay taon ni ya agkaukolan iyan i-renovate.

 Agtayo labat makakatipid na donasyon ed panmimintina tayo, noagta naidadayew tayo met si Jehova. Oniay imbaga nen Shaun, sakey ya brother ed Tonga: “Lapud panagmintina, makakapandayew tayod si Jehova diad malinis, mauksoy, tan walad kondisyon ya Kingdom Hall kanian nidadayew so ngaran to diad satan ya lugar. Proud tayo met ya imbitaan iray totoo ed Kingdom Hall tayo.”

 Makatulong tayo ed panlinis tan panmintina ed pasen ya pandadayewan tayo. Oniay imbaga nen Marino, sakey ya maintenance trainer ed Australia: “Amin tayo et walaan na balibalin pribilehyo ya mangasikaso ed saray Kingdom Hall tayo. No gawaen tayo itan, baleg so natipid tayon pundo ya indonasyon na saray agagi kanian mas nausar tayo la iratan ed saray proyekton mas kaukolan.”

 Labalabay nen Joel, sakey ya brother ed India, so mangiba ed panagmintina na Kingdom Hall da. Kuan to: “No mikikimeyan ak ed saray agagi, naiimadyin ko la no antoy nagawa ed balon mundo.” Onia met so imbaga nen Nicole, ya abitla la diad gapo: “Nen imbebeneg labat, tinmulong ak ya man-mop na flooring na banyo legan ya aapigeren na saray brother imay tubon mantedter. Anggano aliwan siak ya mismo so angapiger ed samay deral, akatulong ak pian naiwasan so aksidente.”

 No labay yoy manboluntaryo ya ontulong ed panmintina ed Kingdom Hall yo, ibaga yod saray elder yo. Makatulong met iray donasyon yo, aliwa labat ya diad panmintina na Kingdom Hall yo noagta pati diad saray arum ya Kingdom Hall ed interon mundo. Sarag yoy mangipelag na donasyon diad saray contribution box diad Kingdom Hall yo odino ipawit yo itan diad donate.pr418.com. Misalsalamat kamin maong ed inkamaiter yo.