Say sakey ed saray tinalaranan ya maong na saray Tasi nen Jehova ed sayan taon et say impangi-release ed Episode 1 na Say Maong a Balita Unong ed si Jesus. Minilyon lay akabantay ed satan ya episode tan dakel ni onsublay ta unaan ni labat itan ed 18 ya episode! Anto ray nagagawa legan na pansho-shooting ed kada eksena ed sayan video, tan anto la ray nitulong yo pian nagawaan iratan?

 Maslak ya eksena na serye ya Say Maong a Balita et gagawaen diad Australasia branch, tan manga 50 ya anggad 80 ya totoo so kaiban mansho-shooting ed kada eksena. a Wala ray agagin manpaparaan na ugto, pangdem, tan merienda parad amin ya aktor tan arum ni ran kaiba ed shooting. Mabayag ni et iplaplano la no antoy ipakan ed sikara. “Nanduruman supplier so pangasaliwan mi na saray ingredients parad naakan pian marakep so kualidad na nasaliw mi tan sulit so presyo to,” so impaliwawa nen Esther ya walad Food Service Department. “Iya-adjust mi karakel na iluto mi ta pian seguradon anggapoy naperdi.” Kada agew, manga apatiran dolyar (U.S.) so nagagastos tayo ed panangan na kada too.

 Pero aliwa labat ya naakan so kaukolan na saray aktor tan arum ni ran kaiba ed shooting. Kaukolan da met so proteksion ed ultraviolet radiation ta ampetang tan maagew ed Australia. Pian ag-ira masyadon natektek ed agew tan nakesawan ya maong lapud petang, impaalageyan ira na tolda na saray makukulin production assistant tan wala met iray imparaan dan lugar ya sarag dan pampabetelan. Tan seseguroen da met ya lanang ya wala ray sunscreen, payong, tan danum. Oniay imbaga nen Kevin ya walad Audio/Video Services: “Kaslakan ed saray production assistant et commuter Bethelite. Mapaabeba tan malikeliket dan gagawaen iratan pati say arum nin kimey da. Agmi nasumpal iyan proyekto no anggapo ra.”

 Wala ray eksena ya aliwan realistiko no diad branch office da i-shooting, singa diad samay set ya ginawa da ed paway odino diad studio, kanian kaukolan so man-shooting diad arum ya lugar. Pian magmaliw ya singa tudtua iray eksena ya inalad Biblia kaukolan ya anggapo ray nanengneng ya kable na kuryente, sementadon karsada, tan moderno iran abung. Lapud satan, kaslakan et kaukolan ya ombiahe ed ararawin pasen iray aktor tan arum ni ran kaiba ed shooting. Kaukolan met ya iyimpake tan ibiahe iray costume, props, tan arum nin gamit. Tan kasabi dad pan-shootingan kaukolan ya iyuksoy iratan diman. Antis ya onggapoy pan-shooting, seseguroen na saray assistant production coordinator ya wala ray generator, malinis ya danum ya nainum, tan napankasilyasan. Manpupundo iray aktor tan arum ni ran kaiba ed shooting diad abung na saray maparawes ya agagi ed satan ya lugar, diad angkabaleg iran luganan, odino diad saray hotel tan arum ni ran nayarin napanpundoan.

 Magastos, mabaybayag ya gawaen, tan makapakesaw so man-shooting ed arum ya lugar. Kanian nen 2023, inaprobaan na Mananguley ya Ulop so pangaliw na video wall ya manbili na 2.5 milyon ya dolyar (U.S.) tan usaren itan ed panggawa na video. Atagey so resolution na video wall kanian singa tudtua so background ya nanengneng ed satan. Kaiba met ed satan iray silew ya ombagay ed liwawa na eksena ya walad background. Lapud satan napaliisan tayo lay magastos ya pan-shooting ed paway. Oniay imbaga nen Darren, sakey ya membro na Branch Committee na Australasia: “Makakatulong so video wall pian agmasyadon nakesawan iray aktor tan sarag ya irekord na saray crew ya maminpigapiga so eksena ya anggad naala day labay da. Singa bilang, no mansho-shooting kami ed paway, pigaran minuto labat so iselek na agew kanian naandi lan tampol antis mi nin na-video’an. Pero lapud walay video wall, sarag min ulit-uliten ya irekord so eksena na iseselek na agew ya anggad naala mi may labay min eksena.”

 Dakel so kaukolan ya aktor tan arum ni ran kaiba ed pan-shooting diad kada episode na seryen Say Maong a Balita. Anto kasi nalilikna da ed pangaasikaso na saray agagi ed sikara?

 Oniay insulat nen Amber ya nambiahe na masulok ya 700 kilometro manlapud abung da diad Melbourne pian makapanboluntaryo ed sayan proyekto: “Kasabik ni labat ed airport, inasikaso ak la na saray agagi ed Bethel. Dakel so Bethelite ya angimbita ed siak pian mangan odino pian oninum na tsa. No mansho-shooting kami, ipapalikna na amin ya wadman ya inaro da ak kanian kokkomportable ak. Dakdakel so naawat kon bendisyon lapud sayan impanboluntaryok. Pakaliknak singa agak nansakripisyo!”

 Onia met so kuan nen Derek ya walad production team: “Manlapu lad gapo, dakel lan department so ontutulong ed sikami. Malikeliket ak ta nakakaibak iray agagi ya mansasakripisyoy panaon, kaykayarian, tan biskeg da parad sayan proyekto. Maomaong ira tan akaparaan iran ontulong. Talagan anengneng mi ya benendisyonan kami nen Jehova. Kombinsido ak ya aglabat importante ed si Jehova ya nasumpal mi iyan kimey noagta interesado met ed no panon mi iyan susumpalen.”

 Salamat ed tulong yo pian nagawaan iyan serye na video panamegley na saray donasyon yo, kaiba la iray indonasyon yo panamegley na donate.pr418.com.