Salamat ed interes yon mangireport nipaakar ed kimey na Saray Tasi nen Jehova. Imparaan mi iya pian naamtaan yoy spelling tan kabaliksan na saray terminon uusaren na organisasyon mi. No wala ray tepet yo nipaakar ed sakey ya topic ya anggapo dia, ipangasin kontaken so branch office na Saray Tasi nen Jehova.

agagi. Uusaren iyan termino pian tukoyen so amin ya Tasi nen Jehova ed interon mundo (lalaki tan bibii).​—1 Pedro 5:9.

Aral Parad Publiko. Say sinimban pantitipon na kongregasyon, ya kaslakan ya nagagawa diad weekend, tan walay 30 minuto ya base ed Biblian paliwawa ya parad publiko. Tumbokan itan na Panag-aral na Say Panag-bantayan, sakey oras ya tepet tan ebat ya diskusyon ed sakey ya topic a nibase ed Biblia ya usaren so sakey ya artikulo ed panaralan ya edisyon na Say Panag-bantayan. Singa ed amin ya pantitipon na Saray Tasi nen Jehova, say iyatendi ya personal odino diad online et libre tan anggapoy kokolektaen ya kuarta.

asemblea. Nengnengen so:  sirkiton asemblea.

Assembly Hall of Jehovah’s Witnesses. Baleg ya pasen a panagdayewan na Saray Tasi nen Jehova ya uusaren da parad angkabaleg iran pantitipon na saray kongregasyon manlapud espisipikon lugar. Tatawagen met iyan “Assembly Hall.”

Balon Mundo a Patalos na Masanton Kasulatan. Say tawag ed kompleton Hebreon Kasulatan (“Daan ya Sipan”) tan Griegon Kasulatan (“Balon Sipan”) ya impatalos tan im-publish na Saray Tasi nen Jehova. Nayari met ya tawagen bilang Balon Mundo a Patalos.

Bethel, Bethelite, Bethel family. Say “Bethel” et Hebreon termino ya mankabaliksay “Abung na Dios.” Aya so tawag ed saray pasilidad ya uusaren na Saray Tasi nen Jehova pian naasikaso tan nasuportaan so espiritual ya kimey da ed kada bansa o rehyon. Saray Tasi ya manlilingkor ed sarayan pasilidad et kabiangan na sakey ya religious order tan natatawag ira bilang “Bethelite.” Anggapoy sueldo ra. Say tawag ed sikara bilang grupo et “Bethel family” lapud singa ra sakey ya pamilya ya saniiban manaayam, mandadayew, tan mankikimey ed saratan ya pasilidad. Say terminon “Bethelite” et aliwan sakey ya kagalang-galang ya titulo.

Branch Committee. Inerman a bansa ya walay branch office, walay tuturoen ya talora o masulok nin elder ya magmaliw a kabiangan na Branch Committee ya mangasikaso ed saray kimey ed satan ya bansa odino ed arum ni ran bansa ya sakop na branch da.

branch office. Ditan so kawalaan na Branch Committee ya mangidadaulo tan manmo-monitor ed espiritual a kimey na Saray Tasi nen Jehova ed sakey o pigaran bansa. No maminsan et “branch” labat so tawag.

brother. Bautismado laki ya Tasi nen Jehova. Kaslakan ya akasulat ed melag ya letra. Baleg ya letra so usaren no pormal ya tawagen ed apelyido so sakey ya lakin Tasi (singa bilang, Brother Smith). Aliwa itan ya sakey ya kagalang-galang ya titulo. Ontan met ya paraan so uusaren no tawagen so sakey ya biin Tasi (singa bilang, Sister Smith).

elder. Sakey ya brother ya matatken ed espiritual ya aturon manbangat tan manpastol ed saray kaiba ed kongregasyon. Kailangan ya tuloytuloy ya ipanengneng na sakey ya elder iray kualipikasyon ya imbaga na Biblia diad 1 Timoteo 3:1-7; Tito 1:5-9; Santiago 3:17, 18; tan 1 Pedro 5:2. Saray elder et ag-ira suesueldoan odino aliwa ran empleyado na kongregasyon da o anggan dinan ya korporasyon ya konektado ed saray Tasi nen Jehova. Maslak ya elder et walay sekular ya trabaho da pian nasuportaan day sarili da tan say pamilya ra. Diad saray Tasi et anggapo ray walaan na posisyon o rangko ya singa pari, tan saray elder et aliwan mas atagey nen saray arum ya kabiangan na kongregasyon. Say terminon elder et aliwan sakey ya kagalang-galang ya titulo.

Gilead, Gilead School. Antikey ya tawag ed Watchtower Bible School of Gilead ya ginmapo nen 1943 ya say datin gagala et ipasal iray misionero. Diad kaplesan et limay bulan ya espisyal ya panag-aral ed Biblia so gagawaen na saramay naimbitaan ya manaral. Melag ya letra so usaren no say tutukoyen labat et “school.”

 internasyonal a kombension. Taloy agew ya pantitipon parad panagdayew tan panagbangat ed Biblia ya oorganisaen na Saray Tasi nen Jehova maminsan ed loob na pigaran taon diad saray apilin pangganapan ya syudad ed nanduruman bansa. Saray Tasi ed pigaran bansa so iimbitaan bilang delegates. Iyiimbita met irayan kombension ed publiko pian natulongan iran onapit ed Dios tan pian onelet so pankakasakey na saray Tasi nen Jehova diad interon mundo. Kaslakan ed saray internasyonal a kombension et gagawaen diad saray nirentaan ya pasilidad, manlapud Biernes anggad Simba. Libre so onatendi tan anggapoy kokolektaen ya kuarta.

Jehova. Say ngaran na Makapanyarin-amin a Dios tan Amalsa ya nabasa ed Biblia. (Salmo 83:18) Say “Jehova” et ag-uusaren ya kasandin termino sano tutukoyen so sakey ya Tasi nen Jehova.

Jesu-Kristo. Say bogbogtong ya Anak na Dios. (Juan 3:16) Ipapasen na Saray Tasi nen Jehova si Jesu-Kristo bilang Lider da tan pansasagpotan dan aligen so alimbawa to tan iyaaplika da iray bangat to. Sikatoy ipapasen na saray Tasi bilang sankamaongan ya too ya nambilay diad dalin, say sankaimportantian ya Tasi nen Jehova, tan sikatoy manunan usaren nen Jehova a Dios pian iliktar iray totoo.​—Isaias 9:6, 7; Apocalipsis 1:5.

Kingdom Hall of Jehovah’s Witnesses. Say pasilidad ya uusaren na sakey odino pigaran kongregasyon diad panagdayew da. Mabetbet iyan tatawagen bilang “Kingdom Hall.” Paliisan so pangusar na terminon “simbaan” odino “church.”

kombension. Nengnengen so:  internasyonal a kombension tan  regional a kombension.

kongregasyon. Organisadon grupo na saray Tasi ya regular ya mantitipon pian mandayew. Walay tinuron ulop na mamatatken ya mantutulongan ed pangikondukta na nanduruman parte na aral ya base ed Biblia, tan ibabangat tan igigiya da so kongregasyon bilang grupo odino indibidual. Amin et sarag toy onatendi ed saray aral na kongregasyon. Libre so onatendi tan anggapoy kokolektaen ya kuarta.

 lawak na ministeryo. Say publikon ministeryo na Saray Tasi nen Jehova lapud uunoren day ganggan nen Jesus ya ipulong so “maong a balita na Panarian” diad saray totoo “ed interon dalin bilang pantasi ed amin a nasyon.”​—Mateo 24:14; 28:19.

manangasikaso na sirkito. Eksperiensyadon elder ya manlilingkor diad panangigiya na branch office, ya ombibisita (kaibay asawa to, no wala) ed kada kongregasyon ed sakey ya sirkito, kaslakan et mamidua ed sakey taon. Papasesegen to iray agagi ed kada kongregasyon, tan mangiiter na tulong tan instruksion ed saray elder tan ministeryal a lingkor. Mangiiter na espisipikon instruksion iray manangasikaso na sirkito diad saray miting ed kada kongregasyon. Sayan termino et aliwan sakey ya kagalang-galang ya titulo.

manangipalapag. Sakey ya mibibiang ed panagpulong ed publiko tan kabiangan na kongregasyon na Saray Tasi nen Jehova. Kualipikado so sakey no natatalosan tan papanisiaan to iray manunan bangat na Biblia tan iyaaplika tod bilay to iray prinsipyo na Dios. Saray manangipalapag et anggapoy sueldo ra ed pampupulong da ed publiko tan aliwa ran empleyado na kongregasyon da o anggan dinan ya korporasyon ya konektado ed saray Tasi nen Jehova. Sayan termino et aliwan sakey ya kagalang-galang ya titulo.

Mananguley ya Ulop na Saray Tasi nen Jehova. Melag ya grupo na saray elder ya tinuron mangasikaso ed espiritual ya pankaukolan na Saray Tasi nen Jehova ed interon mundo. Tatawagen met itan ya “Mananguley ya Ulop.” Sikaray direktan kaiba ed pangipaparaan na saray publikasyon ya base ed Biblia. Anggano idadaulo na Mananguley ya Ulop so panangasikaso ed kimey na saray Tasi ed interon mundo, si Jesu-Kristo labat so ipapasen dan Lider na Saray Tasi nen Jehova. Saray opisina na Mananguley ya Ulop et walad World Headquarters na Saray Tasi nen Jehova diad Warwick, New York, U.S.A.

Memoryal na impatey nen Kristo. Say tinaon ya pannodnonot ed impatey nen Jesu-Kristo. Tatawagen met bilang Pangdem na Katawan, Sampot ya Pangdem, Memoryal, odino Memoryal na Impatey nen Jesus. Ipapasen iya na Saray Tasi nen Jehova ya sankaimportantian ya okasyon ed taon tan saya labat so espisipikon ingganggan nen Kristo ya selebraan na saray patumbok to.​—Lucas 22:19, 20.

midweek ya aral. Say sinimban pantitipon na kongregasyon ya kaslakan ya gagawaen ed sakey ya labi ed weekday. Walay taloran parte na programa ed sayan pantitipon ya say tawag et Ministeryo tan Bilay na Kristiano. Say gagala na saya et tulongan iray Tasi pian magmaliw ya mas epektibon ministro na Dios. Singa ed amin ya pantitipon na Saray Tasi nen Jehova, say iyatendi ya personal odino diad online et libre tan anggapoy kokolektaen ya kuarta.

ministeryal a lingkor. Sakey ya matatken ed espiritual ya lakin Tasi ya tinuro pian magmaliw ya katulongan na saray elder diad pangasikaso na kongregasyon. Pian magmaliw ya ministeryal a lingkor so sakey, kaukolan ya tuloytuloy ton ipanengneng iray kualipikasyon ya imbaga na Biblia diad 1 Timoteo 3:8-10, 12, 13 tan Tito 2:6-8. Say ministeryal a lingkor et manggagaway nanduruman praktikal a kimey ed kongregasyon. Anggapoy sueldo to ed saray gagawaen ton kimey tan aliwa met ya empleyado na kongregasyon to o anggan dinan ya korporasyon ya konektado ed saray Tasi nen Jehova. Maslak ya ministeryal a lingkor et walay sekular ya trabaho da pian nasuportaan so sarili da tan say pamilya da. Diad ilabas na panaon, wala ray ministeryal a lingkor ya onkualipikan manlingkor bilang elder. Ag-uusaren iyan termino bilang sakey ya kagalang-galang ya titulo.

misionero. Bautismadon Tasi ya iya-asain na Mananguley ya Ulop na Saray Tasi nen Jehova ya manlingkor ed nanduruman bansa. Akaparaan iray misionero ya taynanan so abung da tan onlad arum ya bansa pian ipulong so maong a balita na Panarian.​—Mateo 24:14.

Onliing! Magasin ya ipa-publish tan ibubunog na Saray Tasi nen Jehova. Say sankaunaan ya impangi-publish ed saya et nen 1919 ya say tawag et The Golden Age, tan nen 1937 et tinawag la iyan Consolation. Insan sinalatan la na Awake! manlapud isyu na Agosto 22, 1946. Pinili so title ya Onliing! pian nidanet ed saray manbabasa ya importantin amta tayoy kabaliksan na saray nagagawa ed mundo. Sakey iya ed saray magasin ya sankarakelan ya ibubunog ed interon mundo.

panagpulong. Nengnengen so:  lawak na ministeryo.

payunir. Tawag iya ed sakey ya bautismadon Tasi ya walay espisipikon oras ya uusaren to diad ministeryo. Mabetbet et ontutukoy iya ed saray “regular payunir,” saramay manguusar na 600 ya oras kada taon (50 oras kada bulan). No maminsan et ontutukoy met iya ed saray “auxiliary payunir,” saramay manguusar na 15 odino 30 ya oras ed sakey bulan odino pigaran mantutumbokan ya bulan. Saray payunir et anggapoy sueldo ra ed pampupulong da ed publiko tan aliwa ran empleyado na kongregasyon da o anggan dinan ya korporasyon ya konektado ed saray Tasi nen Jehova. Maslak ya payunir et walay sekular ya trabaho da pian nasuportaan day sarili da. Sayan termino et aliwan sakey ya kagalang-galang ya titulo.

 regional a kombension. Say tinaon ya taloran agew ya pantitipon na dakel ya kongregasyon ya manlapud espisipikon region ya say gagala et napabiskeg ed espiritual iray onatendi. Amin et sarag toy onatendi. Saray onatendi dia antokaman so edad da et makaaral tan nagunggonaan ed saray bilin na Biblia. Wala met iray drama ya base ed Biblia tan demonstrasyon no panon ya iyaplika ed inagew-agew ya panagbilay iray prinsipyo ed Biblia. Saray kombension et mabetbet ya gagawaen ed saray angkabaleg ya nirentaan ya pasilidad singa say arena, stadium, tan convention center. Saray mas melag ya regional a kombension et nayarin nagawa met diad asingger ya Assembly Hall na Saray Tasi nen Jehova. Say kaslakan ya eskedyul na face-to-face ya programa et manlapud Biernes anggad Simba. Available ed online iray akarekord ya programa na kombension diad apalabas iran taon. Singa saray arum ya pantitipon na Saray Tasi nen Jehova, libre so onatendi tan anggapoy kokolektaen ya kuarta.

 Saray Tasi nen Jehova. Sakey ya relihyoson grupo na saray Kristiano ya mandadayew ed Dios ya Jehova tan aktibon mangibabangat na Biblia diad nanduruman paraan. Say akapokusan na kimey da et say pangipulong na maong a balita nipaakar ed gobierno o Panarian na Dios. (Mateo 24:14) Sayan tawag so mangibiig ed sikara manlapud arum ya relihyon. Aglabat iya ontutukoy ed Dios ya irerepresenta da noagta pati diad kimey ya boluntaryon gagawaen da bilang totoon atawag ed ngaran na Dios. Ipasen labat bilang sakey ed Saray Tasi nen Jehova so sakey ya indibidual no natatalosan to la iray manunan bangat na Biblia, onkualipika lan mibiang ed panagpulong tan kabiangan lad kongregasyon na Saray Tasi nen Jehova, tan abautismoan la bilang simbolo na dedikasyon to ed si Jehova ya Dios. Nepeg ya say unonan usaren ed sakey ya artikulo et say official ya kompleton ngaran ya “Saray Tasi nen Jehova.” Sarag met ya usaren so “saray Tasi.” No say tutukoyen et sakey ya indibidual, say dugan usaren et “sakey a Tasi” odino “sakey ed Saray Tasi nen Jehova.” Agmatukoy ya ekalen so “sakey ed” odino basta ibagan “Jehovah Witness.”​—Isaias 43:10.

Say Panag-bantayan Mangipapalapag na Panarian nen Jehova. Say kompleton tawag ed manunan magasin ya ipa-publish tan ibubunog na Saray Tasi nen Jehova. Tatawagen met iyan Say Panag-bantayan. Sayan tawag et nanlapud ideya ya kailangan so tuloytuloy ya pambantay ed pakakasumpal na saray gagala na Dios. (Mateo 24:42) Say publikon edisyon na Say Panag-bantayan et libren iyoopresi ed saray interesadon totoo. Say panaralan ya edisyon na Say Panag-bantayan et uusaren ed sinimban tepet tan ebat ya diskusyon ed saray kongregasyon diad interon mundo. Say Panag-bantayan et tuloytuloy ya ipa-publish manlapu ni nen 1879. Sakey iya ed saray magasin ya sankarakelan ya nibubunog ed interon mundo.

sirkito. Sakey ya grupo na saray kongregasyon na Saray Tasi nen Jehova ed sakey ya espisipikon lugar.

 sirkiton asemblea. Sakey agew ya pantitipon na pigaran kongregasyon na Saray Tasi nen Jehova ya mamidua ed sakey taon. Amin et sarag toy onatendi ed saray sirkiton asemblea pian natulongan ira ya onapit ed Dios. Saray onatendi dia antokaman so edad da et makaaral tan nagunggonaan ed saray bilin na Biblia. Wala met iray antikey ya demonstrasyon no panon ya iyaplika iray prinsipyo ed Biblia diad inagew-agew ya panagbilay. Mabetbet et gagawaen iya diad Assembly Hall na Saray Tasi nen Jehova. Nayari met iyan gawaen diad nirentaan iran pasilidad odino bantayan online. Kaslakan ya weekend so eskedyul na asemblea. Amin ya sesyon et libre tan anggapoy kokolektaen ya kuarta.

sister. Bautismadon bii ya Tasi nen Jehova. Kaslakan ya akasulat ed melag ya letra. Baleg ya letra so usaren no pormal ya tawagen ed apelyido so sakey ya biin Tasi (singa bilang, Sister Smith). Aliwa itan ya sakey ya kagalang-galang ya titulo. Ontan met ya paraan so uusaren no tawagen so sakey ya lakin Tasi (singa bilang, Brother Smith).

PAIMANO: No manrereport nipaakar ed Saray Tasi nen Jehova, ipangasin usaren diad gapo so kompleton ngaran. Parad kaaruman ya impormasyon, nengnengen so:  Saray Tasi nen Jehova.