“Agkon balot naimadyin ya makapanlingkor ak ed si Jehova ya full-time.” Ontan so imbaga nen Gwen ya datin tagad England nen dedeskribien to so nalilikna to nipaakar ed panlilingkor to bilang need-greater ed Albania. a

 Si Gwen et sakey ed saray dakel ya Tasi ya inmalis ed Albania pian ontulong ed pantipon na saray “ankabli a bengatla na amin a nasyon.” (Aggeo 2:7) Antoy amakiwas ed sarayan ebanghelisador pian onalis diman? Anto ray ginawa dan pananguman pian makapanboluntaryo ira ed Albania? Tan anto ray panliliketan da ya akatulong ed sikaran makapansungdo anggano wala ray subok?

 Saksakey so rason na amin ya manangipalapag no akin ya tinmulong irad Albania: Lapud inar-aro day Jehova tan labay dan tulongan so arum pian nakabat da.

 Antis iran inmalis ed Albania, wala ray ginawa da pian napalaknab day ministeryo da, tan akatulong itan ed sikara ya nasarag iray subok diad panlingkor dad arum ya bansa. Oniay imbaga nen Gwen: “Unona, inmalis ak ed sakey ya grupo ya mansasalitay Albanian diad baley mi. Insan linma ak ed Albania pian onatendi ed sakey ya kombension. Ag-abayag, pinmawil ak diman ya agano pian naaral ko nin maong so lenguahe ra.”

 Nen 23 lay taon nen Manuela, inmalis ed arum ya lugar diad bansa ra ed Italy pian ontulong ed melag ya kongregasyon. Imbaga to: “Namboluntaryo ak diman na apatiran taon. Insan naamtaan ko ya balbaleg manaya so pankaukolan diad Albania. Kanian implanok so manpayunir diman na pigaran bulan.”

 Pitoy taon ni labat nen Federica nen arengel tod sakey a kombension so sakey a report manlapud Albania. Kuan to: “Imbaga na brother ya angibasa na report ya dakel so manpapaiyaral na Biblia diad Albania tan dakel so mimiaral ya interesado. Kanian imbagak ed atateng ko ya labay koy manboluntaryo ed Albania. Abigla la ra ed imbagak, balet imbaga nen tatay ko, ‘Ipikasim sirin, ta no linawa nen Aman Jehova, seguradon ebatan to itan.’ Kalabas na pigaran bulan, naimbitaan kamin pamilya ya manboluntaryo ed Albania!” Linmabas so dakel ya taon, tan natan et wala lay asawa nen Federica, si Orges. Saniba ran manlilingkor ya full-time diad Albania.

 Nen nanretiro lay Gianpiero, inmalis ed Albania kaibay asawa ton si Gloria. Imbaga to: “Pinabaleg mi ray ananak min lalaki diad Italy. Talora ed sikara so inmalis ed bansa ya baleg so pankaukolan, apaseseg kami ed sakey ya artikulo ed Panag-bantayan ya say tema to et ‘Makaonla Ka Met Kasi ed “Macedonia”?’ Yinmurong kami tan kinuenta mi no panon min nausar so pension ko pian makapanboluntaryo kamid Albania.”

 Antis ya onalis iray need-greater, kaukolan day manplanon maong tan manggawa na saray pananguman. (Lucas 14:28) Kaiba lad satan so pananap day paraan pian nasuportaan day sarili da. Nen wala nid England si Gwen ya abitla ed gapo, akiayam nin agano diad atsi to pian makatipon na kuarta. Oniay nanonotan nen Sophia tan Christopher ya nanlapu met ed England: “Inlako mi luluganan mi tan arum nin gamit mi. Labay mi manboluntaryo ed Albania na anggan sakey taon labat.” Makapalikliket balet ta mas abayag ni so impanlingkor da diman.

 Wala ray manangipalapag ya manboboluntaryo na pigay bulan ed Albania insan ira ompawil ed bansa ra pian mantrabaho tan mantipon na kuarta. Ontan so gagawaen nen Eliseo tan Miriam. Imbaga nen Eliseo: “Tagad Italy si Miriam, diad lugar ya dakel so oonlan turista kanian mainomay so makalmoy part-time ya trabaho diman. Oonla kami diman pian mantrabaho na taloy bulan kada summer insan kami ompawil ed Albania pian manbulontaryo na siameran bulan. Limay taon ya ontan so ginawa mi.”

 No wala lad lugar ya mas baleg so pankaukolan iray need-greater, kaukolan day mibagay ed balon sirkumstansya ra, balet makatulong iray suhestion tan alimbawa na saray agagi ed laen dan lugar pian nasarag da ray subok. Oniay imbaga nen Sophia ya abitla ed gapo: “No winter dia ed Albania, ambetel a maong ed loob na abung, aliwan singa diad lugar ya nanlapuan mi. Kanian inaral koy paraan na panangawes ya singa gagawaen na saray sister dia.” Si Grzegorz tan say asawa ton si Sona ya tagad Poland et tinmulong ed marakdakep ya baley na Prizren, diad Kosovo. b Imbaga nen Grzegorz: “Mapaabeba iray agagi dia, maomaong ira, tan maan-anos ira! Tutulongan da kamin aralen so lenguahe tan arum ni ra. Singa bilang, ibabaga dad sikami no iner so tindaan ya mamura iray sasaliwen, tan ipapaliwawa da no panon kamin mitindaan na saray kaukolan mi.”

 Awalaan na maapit ya kakaaro iramay inmalis ed arum ya bansa tan naaralan da iray kultura diman. Oniay imbaga nen Sona: “Anengneng kon mabisbiskeg so panangaro nen Jehova. Binmiskeg so pananisiak lapud saray agagi ta anengneng ko no panon dan inuman iray sisisiaen da tan no panon ya anguman so bilay da nen akabat day Aman Jehova. Sankalikna min kakkaukolan kami diad kongregasyon mi, nanenengneng mi no panon kamin makakatulong. Nanlingkor kamin kaiba na saray agagi ya nagmaliw ya kakaaro mi.” (Marcos 10:29, 30) Oniay imbaga nen Gloria: “Dakel so akabat kon sister ya inanosan day panamasegsegang na saray kontra ed saray Tasi diad lugar da. Talagan apaseseg ak ed panangaro da ed si Jehova.”

 Wala met so pankanawnawa na saray need-greater ya naaralan iray importantin leksion ya nayarin agda naaralan diad mismon bansa ra. Singa bilang, atalosan da ya no palaknaben day panaglingkor dad si Jehova anggano mairap, mas nalikna day liket. Oniay imbaga nen Stefano nipaakar ed satan: “Diad bansa mi, maslak et diad intercom so pampupulongan ko, tan antikey labat iray presentasyon ko. Balet diad Albania, labalabay na totoo so miistoryaan, lalo la no mankakape ira. Lapud mabaing ak, diad gapo et mairap koy mitongtong tan agko amtay ibagak. Balet kalkalnan naaralan kon ipanengneng ya interesado ak ed totoo, tan natan et nai-enjoy ko lay mitongtong ed sikara. Mas malikeliket ak natan ed pampupulong ko.”

 Tagad United States si Leah tan inmalis ira nen asawa ton si William diad Albania. Kuan to: “Alukasan so mata mi nen linma kami dia tan mas linmaknab so panagnonot mi tan dakel iray balon naaralan mi. Akaaral kamin maong ed panagparawes, pangipanengneng na respeto, tan pikakaaro! Wala ray naaralan mi ya balon paraan na panagpulong, no panon so mikatunongan manlapud Kasulatan, tan no panon min ibaga so nalilikna tan iisipen mi.” Imbaga nen William: “Kaslakan ed saray ompapasyar ed Albania et labalabay day balibalin dayat. Labalabay koy man-hiking ed saray mabaton palandey na Albania. Balet say talagan rason no akin ya labalabay ko dia et saray totoo! Dakel ya baryo ed teritorya mi so napupulongan labat ya magano no wala ray espisyal ya kampanya. No oonla kami diman, no maminsan et nasabi mi sanagew ya pigaran pamilya labat so nakatongtong mi.”

 Say talagan panliliketan na sarayan need-greater et no nanenengneng dan onkikiwas iray totoo ed maong a balita. (1 Tesalonica 2:19, 20) Oniay imbaga nen Laura ya inmalis ed Albania nen medyo ugaw ni: “Namboluntaryo ak ya agano ed Fier. Diad loob labat na duara tan kapalduan taon, 120 so balon kinmualipika ya manpulong! Inyaralan ko so 16 ed sikara!” Oniay nanonotan met na sakey nin sister ya si Sandra: “Pinulongan ko so sakey ya biin mantratrabaho ed tindaan. Nagmaliw ya Tasi insan pinmawil ed baley to. Say sampot ya balitak ed sikato et walay nigapo ton 15 ya panangiyaral na Biblia!”

 Arum ed saray need-greater ya inmalis ed Albania pigay taon lay apalabas et siansia nin wadman tan panliliketan dan maong so panlilingkor da. Manbilib ira no kayari dakel ya taon et biglan nanengneng day bunga na saray akaunan impanpulong da. (Eclesiastes 11:6) Oniay imbaga nen Christopher ya abitla ed gapo: “Aminsan et akatongtong koy sakey ya lakin inyaralan ko na Biblia diad inmunan impanboluntaryok ed Albania. Aliketan ak nen detalyado ton inistoryad siak iray impantongtong mi nensaman nipaakar ed Biblia. Natan et abautismoan la ran dua nen asawa to.” Oniay imbaga nen Federica ya abitla ed gapo: “Diad sakey ya kongregasyon, inasinggeran ak na sakey ya sister tan tinepetan to ak no nanonotan ko ni. Imbaga tod siak ya apulongan ko kuno siameran taon lay apalabas. Nen inmalis ak ed arum ya baley, ginapoan to met lay manaral na Biblia ya anggad nampabautismo. Say amtak et agnambunga iray impanpulong mi nensaman ed Albania. Alingo-lingo ak!”

 Misalsalamat iray agagin inmalis ed Albania odino diad Kosovo ta benendisyonan nen Jehova iray sagpot da tan ginawa ton maliket so bilay da. Oniay imbaga nen Eliseo kayari na dakel ya taon ya impanlingkor to ed Albania: “Totoo ti labat kanian mainomay itayon naloko tan manisip ya magmaliw ya maligen so arapen tayo no mantiwala tayo ed saray ipapasen na sayan mundo ya mangiter na seguridad. Balet ilusyon labat itan. Saray prinsipyo nen Jehova so talagan mangiiter ed sikatayo na tuan gagala tan seguridad. Ontutulong ed siak so panlilingkor ko bilang need-greater pian lanang kon natandaan itan. Pakaliknak et mausa-usar ak tan walay kanak. Wala ray tuan kakaarok ya kaibak ya mankikimey tan parehoy goal mi.” Oniay imbaga nen Sandra: “Nen inmalis kamid lugar ya baleg so pankaukolan, pakaliknak et inikdan ak nen Jehova na pankanawnawa ya nagawaan so abayag ko lan labay ya gawaen—say pagmaliw ya misionero. Agkon balot pagbabawian so inyalis ko ed Albania. Malikeliket ak ya maong.”