Nen 2011, sakey a laki ya nanlapud Eritrea so nagmaliw a refugee diad Norway. Nen wala ray Tasi nen Jehova ya akitongtong ed sikato, imbaga tod sikara ya walay akabat ton Tasi diad bansa ya nanlapuan to. Imbaga to ya nen wala nid militar, wala ray anengneng ton Tasi ya apriso lapud pananisia da tan ag-iran balot apasoot ya mansundalo anggano maruksa so impantrato ed sikara.

 Biglan anguman so bilay na sayan laki nen sikaton mismo et inaresto tan impriso. Diad prisoan et kaiba to ray taloran Tasi​—si Paulos Eyasu, Negede Teklemariam, tan Isaac Mogos—​saray agagin impriso manlapu la nen 1994 lapud pananisia da.

 Legan ya walad prisoan iyan laki, anengneng ton mismo ya iyaaplika na Saray Tasi nen Jehova ed bilay da no antoy ibabangat da. Naimano to ya matua iran totoo tan iikdan da ni ingen ya naakan so arum ya priso. Naobserbaan to met ya inagew-agew iran saniiban manaaral na Biblia tan iimbitaan da met so arum ya mibiang ed panag-aral da. Nibulos la ra komon ed prisoan no pirmaan da labat so sakey a dokumento ya mangibabagan aliwa la ran lingkor nen Jehova, balet agda itan ginawa.

 Agaylay pandinayew na sayan laki ed saratan ya agagi tayo. Kanian nen nanayam lad Norway, labay ton amtaen no akin ya onman la kabiskeg so pananisia na Saray Tasi nen Jehova. Nen wala ray Tasi ya akitongtong ed sikato, tampol ya impaiyaralan na Biblia tan inmatendi ed saray Kristianon pantitipon.

 Nen Setyembre 2018, sikatoy abautismoan bilang sakey ed Saray Tasi nen Jehova. Tan natan et aanamoten toy kada pankanawnawa pian nakatongtong iray totoon nanlapud Eritrea tan Sudan, papasesegen to iran manaral na Biblia pian nawalaan iray mabiskeg ya pananisia.