Nansulong Ira na Kolor Ube ya Triangulo
Si Maud et tagad France tan mantratrabaho bilang taga-asikaso na saray ugugaw ya walaay kapansanan diad eskuelaan. Diad sakey ya klase, aaralen na saray estudyante so nipaakar ed Holocaust tan saray concentration camp na Nazi. Saray priso ed kampo et nepeg ya mansulong na unipormi ya walaay indait a dekolor ya sakab. Napatnagan ed kolor tan hugis na sakab so rason na impakapriso na sakey.
Oniay imbaga na sakey ya maestro nipaakar ed kolor ube ya triangulo ya walad unipormi na arum ya priso: “Seguro lapud homoseksual ira.” Kayari na klase, akitongtong si Maud ed saman ya maestro tan impaliwawa to ya inusar na saray Nazi so kolor ube ya triangulo pian nabidbir iray Tasi nen Jehova. a Inyopresi met nen Maud ed sikato so pangiter to na kaaruman iran impormasyon nipaakar ed saman ya topic. Sikatoy pinmayag tan kinerew to ed Maud ya ipresenta to iraman ya impormasyon ed saray estudyante.
Diad parehon subject balet sananey lan klase, angusar na tsart so sakey a maestra pian ipanengneng iray nanduruman simbolo ya walad unipormi na saray priso. Diad saman ya tsart, duga so impresenta ya say pakabidbiran ed saray Tasi nen Jehova et kolor ube a triangulo. Kayari na klase, inyopresi nen Maud ed samay maestra so pangiter to na kaaruman iran impormasyon nipaakar ed saman ya topic. Sikatoy pinmayag tan inyuksoy toy pangipresenta nen Maud ed saray estudyante.
Sankabembenan nen Maud iray publikasyon ya inusar to
Namparaan si Maud na 15 minuto ya presentasyon para ed unonan klase, balet nen asabi lay oras na pakasumpal to, imbagad sikato na maestra: “Usar mo lay interon sakey oras.” Walay video ya impabantay nen Maud nipaakar ed impamairap na saray Nazi ed saray Tasi nen Jehova. Nen impanengneng ed video ya inala na saray Nazi so 800 ya Tasin ugugaw manlapud saray atateng da, intundan agano nen Maud so video insan to imbasa iray eksperiensya na talora ed saraman ya ugugaw. Kayari ton impabantay so video, imbasa toy sulat ya ginawa nen 1940 na sakey ya 19 años ya Tasin taga Austria, si Gerhard Steinacher, ya nansulat ed saray atateng to, pigaran oras antis ya pateyen na saray Nazi. b
Parehon presentasyon so inusar nen Maud diad komaduan klase. Maong labat ta makpel si Maud, natan et seseguroen la na samay maestra tan maestro ya bitlaen da iray Tasi nen Jehova no ibabangat day nipaakar ed saray biktima diad concentration camp na Nazi.
a Legan na World War II, saray Tasi nen Jehova diad Germany, ya akabat bilang Bibelforscher (Saray Estudyante na Biblia), et impriso lapud agda labay ya suportaan iray Nazi.
b Senentensiaan na patey si Gerhard Steinacher lapud agto labay so mibiang ed militar na Germany. Diad samay sulat to, oniay imbaga to: “Ugaw ak ni. No ikdan ak na Katawan na biskeg, nasarag ko iya, tan saya so kerew ko.” Kaimbuasan to, pinatey si Gerhard. Oniay nabasa ed lapida to: “Inatey parad kagalangan na Dios.”
Ompan Nagustoan Mo Met
MABETBET YA ITETEPET
Antoy Agawa ed Saray Tasi nen Jehova nen Panaon na Holocaust?
Ompan nabigla ka ed saray naamtaan mo.
EBAT ED SARAY TEPET ED BIBLIA
Akin et Pinulyanan na Dios ya Nagawa so Holocaust?
Dakel so mantetepet no akin ya papaulyanan na maaron Dios iray mauges ya nagagawa. Naamtaan ed Biblia iray makakombinsin ebat!