“Nen niyanak ak, Tasi iray atateng ko,” so imbaga nen Rachel ya manaayam la natan ed Dominican Republic. “Makapaermen balet ta nen pitoy taon ko, tinmundan nanlingkor ed si Jehova si tatay ko tan nagmaliw ya kontran maong ed katuaan. Nanggawa ni ingen na paraan pian napatunda to ak ya mandayew ed si Jehova. Singa bilang, susuholan to ak pian itundak so manlingkor ed si Jehova​—iikdan to ak na cellphone, credit card, odino ipasyar to ak kuno ed Disneyland! No maminsan, bubugbogen to ak ni ingen pian ontunda ak lan mandayew ed si Jehova. Iisipen to ya no agak la makasalita o makaakar, agak met la makapiaral. Pero anggapoy akapanpatunda ed siak. Desidido ak nin siansia ya miaral.

 “No kaibak si mommy’k, agak bubugbogen nen tatay ko. Tataktakoten to ak ya no mandalem ak ed si mommy’k, sakitan to met ira. Say palusot nen tatay ko ed saray sugat ko et ibabangat to ak kuno ya man-martial arts.

 “Lapud uga-ugaw ak ni, tan antakot koy tatay ko, agak mandadalem ed si mommy’k. Si Jehova so pandadaleman ko. Manakar ak na arawi diad katakelan ya walad beneg na abung mi diad Maryland U.S.A. Walay masalompapak ya oak tree diman ya kakalaben ko. Onyuyurong ak ed sakey ya sanga tan diman ak manpipikasi ed si Jehova. Ibabagak ed sikato so amin ya naliliknak, tan no antoy gawaen ko parad sikato no ombaleg ak, basta tulongan to ak ya nalampasan ko iyan situasyon ko. Ibabagak met ed sikato iray planok ya gawaen diad balon mundo, say pangarap kon pamilya, tan say deen tan liket ya naliknak no anggapo lay tatakotan ko tan mamasakit ed siak.

 “Kada no susuholan o sasakitan ak nen tatay ko pian ontunda ak lan manlingkor ed Dios, lanang ak ya liligliwaen tan papabiskegen nen Aman Jehova. Tinulongan to ak pian makapanmatoor ak ed sikato.

 “Nampabautismo ak nen samploy taon ko, insan ak nampayunir kayari duaran taon. Ag-amta nen tatay ko iratan ya ginawak. Kanian nen naamtaan to, pinoniti to ak tan a-dislocate so pangak.

 “Wala ray angibaga ed siak ya agak ni nayarin manpayunir ta uga-ugaw ak ni, tan mapaga ra ya ompan agko lanlamang natoor so desisyon ko. Ag-abayag, wala ray kaedad kon Tasi ya kalkalnan onaarawi ed si Jehova. Lanang iran manpa-party tan mani-enjoy. Tan singa balibali met so gagawaen da. Kanian makakaibeg ak no maminsan. Naisip ko, ‘Anto kasi no ontunda ak nin manpulong tan man-enjoy ak ya singa saray kaedad ko?’ Balet no onman lay naiisip ko, ibabagak itan ed si Jehova.

 “Nen manga 15 so taon ko, kinatongtong ak na sakey ya sikat ya modeling agency. Imbaga da ya baleg so sueldok no mantrabaho ak ed sikara diad Milan, Italy. Siempre, aliketan ak nen imbaga dan sarag koy magmaliw ya model, na-feature ed saray magazine, tan isulong ko ray mablin kawes diad saray fashion show. Diad saman, ngalngali taloy taon ak lan regular payunir, tan naisip ko, ‘Bali-bali yan trabaho pian nasuportaan koy pampapayunir ko tan makapantultuloy ak anggad labay ko.’ Lapud tinaynan kami nen tatay ko, naisip ko ya makatulong met so sueldok ed saray gastosen mi nen mommy’k.

 “Impikasik itan ed si Jehova. Impaamtak itan ed si mommy’k ya abaybayag lan payunir tan ed sakey ya malapit ed sikami tan rerespetoen min elder. Singa datik lan gagawaen, kinmalab ak lamet ed samay oak tree tan aminpiga ak ya nampikasi ed si Jehova. Inebatan nen Jehova so pikakasik panamegley na sakey ya bersikulo ed Biblia ya impanengneng ed siak na samay elder. Diad Eclesiastes 5:4, oniay imbaga to: ‘Kapagno mangisipan ka ed Dios, toor mo itan. No antoy insipan mo, toor mo.’ Insipan kod si Jehova ya manlingkor ak ed sikato ya full-time, balet no awaten ko imay trabaho, ompan naapektoan so espiritualidad ko. Kanian agko itan tinanggap.

 “Anggano onman so agawgawa ed siak nen ugaw ak, mabilay ak met ni. Natan, malikeliket ak ta kaibak si asawak ya si Jaser, tan say anak min laki ya si Connor, ya siameray taon to. Manlilingkor bilang elder si Jaser, tan unbaptized publisher met lay Connor. Tan natan, ngalngali 27 taon ak met lan manlilingkor bilang full-time.

 “Mabilabilay nid isip ko iray pikakasik ed si Jehova kada no onkalab ak ed oak tree diad beneg na abung mi. Aminpiga ak ya akikasi ed si Jehova ya tulongan to ak, tan inebatan to iratan diad makapakelkelaw ya paraan. Pinabiskeg, niligliwa, tan inggiya to ak. Manlapu la nensaman, pinatunayan nen Jehova ya talagan sikatoy maar-aron ama. Agkon balot pagbabawian so desisyon kon manlingkor ed sikato diad interon pusok. Atan so sankaabigan ya desisyon ko ed bilay.”