Legan na COVID-19 pandemic, nanggaway paraan iray agagi pian nipulong da so mensahe na Biblia. Pero imbes ya manpulong ira ed publikon lugar odino diad kaabungan, kaslakan et nampulong ira panamegley na telepono tan sulat. a Balibali epekto to ’tan ed dakel ya totoo, tan talagan benendisyonan nen Jehova so sagpot na saray agagi tayo! (Proverbio 16:3, 4) Nia ray pigaran eksperiensya ed sakey ya bansa.

 Antis ni na pandemic, walay sakey ya bii ya lanang ya papawil-pawilen nen Sister Helen tan lanang ton oopresian na panangiyaral na Biblia, pero agto labay. Diad samay agew antis ya man-lockdown, naikdan ni nen Helen na Biblia tan libron Antoy Ibabangat na Biblia? Nen nan-lockdown la, inopresian lamet nen Helen na panag-aral na Biblia tan imbaga to ya sarag day manaral panamegley na telepono. Pinmayag ya siansia imay bii! Nai-enjoy ton maong so panaaral to kanian imbaga tod si Helen ya no nayari et agew-agew la ran man-Bible study. Regular met lan onkokonek ed saray aral tayo panamegley na telepono. Aliwan satan labat, iyaaplika to met la ray prinsipyo ed Biblia tan ibabaga to met lad arum iray nanaaralan to.

 Diad sakey ya kongregasyon, sinulatan na saray agagi iray pulis ed lugar da pian pisalamatan ira ed maong ya serbisyo da. Agmakapanisia iray pulis nen akaawat ira na sulat! Oniay imbaga na sakey ya pulis ed si Jefferson, sakey ya elder ed kongregasyon: “Dati say amtak, aglabalabay na saray Tasi iray pulis.” Impaliwawa nen Jefferson ya aliwan tua man ya iisipen na arum. Agusgustoan na saray pulis iray sulat ya abasa da kanian impeket da iratan ed puerta na istasyon na pulis. “Nayarin makatulong ’tan pian maong so pakanengneng na totoo ed sikami,” so imbaga na sakey nin pulis.

 Si Edna tan Ednalyn et parehon regular payunir. b Lapud anggapoy Internet da ed abung, ag-ira makakonek ed saray aral ed kongregasyon panamegley na videoconferencing. Kanian tinawagan da so biin kaabay da ya aliwan Tasi no kasin sarag toy onkonek ed Wi-Fi da, tan anggano miapag la rad babayaran. Maomaong imay bii ta pinmayag tan agto la kuno pabayaran. Inimbitaan nen Edna tan Ednalyn iyan bii ya onkonek ed saray aral tayo, tan ontan so ginawa to! Makapalikliket ta manaaral la na Biblia imay bii, pati say anak to, tan say duaran apo to, tan regular la ran onaatendi ed saray aral tayo.

 Inimbitaan na saray agagi iray kakaabay da, katrabaho, tan arum ni pian ondengel ed paliwawa panamegley na videoconference. Walay sakey ya sister, si Ellaine, ya mantratrabaho ed sakey ya ospital diman. Nen unaan, manaalangan ya imbitaan iray katrabaho to. Iisipen to ya negatibo so pakanengneng na arum ya doktor ed saray Tasi. Pero nampakpel nin siansia ya i-text ira pian naimbitaan to ra. Walay sanasawan doktor ya ag-amta nen Ellaine no imbitaan to odino andi. Balet, inisip ton maong tan impikasi to ’tan. Kanian inimbitaan to ra lanlamang. Nan-reply may asawan bii, say kuan to: “Labay mo sirin ya man-Tasi ak met?” Imbaga nen Ellaine ya sarag ton onatendi so anggan siopa, anggan saray aliwan Tasi. Abigla si Ellaine ta asakbay ya kinmonek ed aral may sanasawan doktor. Say kuan nen Ellaine: “Antis ya nasumpal so aral, nan-text ed siak may asawan bii, say kuan to: ‘First time koy onatendi ed aral na Saray Tasi nen Jehova. Balibali! Nan-enjoy ak. Salamat ed impangimbitam.’”

 Duamplon doktor so inimbitaan nen Ellaine, tan malikeliket ta 16 ed sikara so inmatendi. Alikna to may alikna nen apostol Pablo, tan oniay imbaga nen Ellaine: “Malikeliket ak ta ‘akapampakpel ak ya ipulong so maong a balita nipaakar ed Dios’ diad saray katrabahok.”​—1 Tesalonica 2:2.

 Amin tayo et apektado nen pandemic. Pero positibo tan malikeliket nin siansia iray agagi, aliwa labat ya diad sayan bansa, anggan diad interon mundo. On, gagawaen day anggaay nayarian da pian tulongan tan pabiskegen so arum.​—Gawa 20:35.