Tasi nen Jehova si Daiane tan sakey ya full-time ya managpulong ed Brazil. Aminsan, legan ton ipupulong so mensahe na Biblia panamegley na telepono, walay akatongtong ton interesado ya ugaw nin sanasawa. Imbaga da ed si Daiane ya onalis la rad nisulinek ya baryo, tan anggapoy kuryente tan Internet diman. Sakey ni, anggapo ray Tasi nen Jehova ya manaayam diman. Pian nituloy day panaral na Biblia, inter na sanasawa so numero na publikon telepono ed saman ya baryo, tan inyeskedyul da so agew tan oras na pantongtong da.

 Tinawagan nen Daiane imay publikon telepono ed samay oras ya nantongtongan da, tan inmebat so sanasawa! Diad sinmublay ya duaran simba, amitlo ni ran akapanaral na Biblia panamegley na telepono.

 Balet kayari to man, agla eebatan na sanasawa iray tawag to. Pero ag-adismaya si Daiane. Intuloy to ni ontawag ed samay publikon telepono ya mamitlo ed sakey simba, tan pupulongan toy anggan siopa ya onebat. Lapud saman, akapangigapo si Daiane na pigaran panangiyaral na Biblia ed saray tagad man.

 Sakey ya agew, legan ya iyaaralan nen Daiane tan say asawa to so sakey ya kabataan ya laki diad samay publikon telepono, arengel na lider na simbaan ed saman ya baryo so tongtongan da. Imbaga na lider na simbaan ya labay toy mitongtong ed si Daiane tan say asawa to. Agustoan ton maong iray arengel to kanian labay to met lay manpaiyaral na Biblia!

 Asabi panaon, anemira lay iyaaralan nen Daiane tan say asawa to panamegley na telepono diad saman ya nisulinek ya baryo, kaiba lad satan may lider na simbaan. Walad sikaray akaatendi ed saray Kristianon pantitipon panamegley na saman lanlamang ya publikon telepono. Wala ni ingey nanggaway yurongan parad saray manaaral na Biblia.

 Misalamat ya maong si Daiane tan say asawa to ed pankanawnawan nipulong so mensahe na Panarian ed sayan nisulinek ya baryo. Kuan nen Daiane, “Sarag ya seguroen nen Jehova ya makasabi so maong a balita ed anggan siopa, anggano manaayam ni ed nisulsulinek ya pasen.”