Sakey agew, si Eliso, ya sakey a biin Tasi nen Jehova, et mangiyaaral na Biblia ed sakey a bii, insan walay biglan sinmabi ya duaran bisita. Diad arap na puerta et wadman so sakey a lider na relihyon tan kaiba toy asawa to. Naamtaan nen Eliso ya diad agano ni labat et inatey so alenleneg ya anak na sanasawa.

 Nen imbaga nen Eliso ya sikatoy mieermen tan miaambegya ed impatey na anak da, akis lan akis so lider na relihyon tan say misis to. Insan, makakapasnok ya imbaga na lider na relihyon: “Agko natalosan no akin ya susuboken kami na Dios! Akin et inala toy anak mi? Pinanlingkoran koy Dios na 28 taon tan amayamay so maong ya gagawaen ko, insan oniay ibales tod siak! Akin et pinatey toy anak ko!”

 Impaliwawa nen Eliso ed sanasawa ya ag-inala na Dios so anak da. Impaamta to met so nipaakar ed dondon, ilalo na inaatey, tan no akin ya iyaabuloy na Dios iray mauges ya nagagawa. Imbaga na sanasawa ed si Eliso ya aman so ebat ed ipipikasi ra.

 Diad tinmumbok ya simba, linma imay lider na relihyon tan say asawa to ed panagaral na Biblia nen Eliso tan samay bii. Diad saman, say aaralen da et samay kapitulo ya “Tuan Ilalo na Saray Inaatey ya Inad-arom,” diad libron Anto so Peteg ya Ibabangat na Biblia? Akibiang ed tongtongan imay sanasawa.

 Inmatendi met so sanasawa ed espisyal a kombension na Saray Tasi nen Jehova ed Tbilis, Georgia. Manbilib ira nen anengneng da so aroan tan pankakasakey na saray Tasi​—saray kualidad ya abaybayag da lan ibabangat ed saray membro na simbaan da, balet agda nagagawaan.