Si Yanmei, sakey a Tasi ed Asia, et tinulongan to so sakey ya bulag a bii, ya say ngaran to et Mingjie, pian makabaliw ed karsada. a Oniay imbaga nen Mingjie: “Salamat. Kasian ka komon na Katawan!” Kayari to, tinepetan nen Yanmei si Mingjie no labay toy manaral na Biblia. Imbaga nen Mingjie ya abayag to lan ipipikasi ya naromog to komon so tuan totoo na Dios. Akin et ontan so abayag lan ipipikasi to?

 Impaliwawa nen Mingjie ya nen 2008, sikatoy akaawat na imbitasyon manlapu ed sakey ya kaaro ton bulag pian onatendi ed sakey ya relihyon na saray walaay kapansanan. Kayari ton inmatendi ed sakey ya sermon, tinepetan nen Mingjie so pari no anton libro so angibasiyan tod sermon to. Imbaga na pari ya imbase to itan ed Biblia, say matuan Salita na Dios. Manlapu lad saman, labalabay la nen Mingjie ya basaen itan. Kanian angaliw na Biblia ya Chinese braille tan binasa to so 32 ya volume diad loob na anem bulan. Legan ya ondadakel so naaamtaan nen Mingjie lapud pambabasa to na Biblia, atalosan to ya say doktrina ya Trinidad, ya imbangat ed sikato na relihyon to, et aliwan tua tan naamtaan to ya walay ngaran na Dios​—Jehova.

 Sinmabi panaon, adismaya si Mingjie ed gagawaen na saray karelihyonan to. Naamtaan to ya agda iyaaplika iray nababasa to ed Biblia. Singa bilang, kerakeran naakan labat so iiter dad saray bulag, balet puro balon naakan so iiter ed saray amin lan membro da. Naermenan a maong si Mingjie ed sayan aliwan mahustisyan gagawaen da, kanian nananap na arum ya relihyon ed lugar da. Atan so rason no akin ya ipipikasi nen Mingjie ya naalmo to komon so tuan Kristianon kongregasyon.

 Lapud kaabigan nen Yanmei, inawat nen Mingjie so iyoopresi ton panangiyaral na Biblia. Ag-abayag, inmatendi si Mingjie ed aral na saray Tasi nen Jehova. Oniay nanonotan nen Mingjie sanen first time toy akiaral: “Agkon balot iman nalinglingwanan. Alikliknak so panangaro na saray agagi. Anggano bulag ak, anggapoy panangidumaduma da ed siak.”

 Inmaligwas si Mingjie tan regular lan onaatendi ed saray aral tayo. Labalabay to ray Kingdom song tayo, balet nanairapan ta diad saman et agni available ed braille so songbook tayo. Kanian diad tulong na saray agagi, nanggawa si Mingjie na sarili ton songbook. Diad loob labat na 22 oras, asumpal ton in-transcribe so interon 151 ya kansion! Nen Abril 2018, ginapoan la nen Mingjie so manpulong tan kada bulan et manga 30 oras so nauusar to ed pampupulong to.

 Pian niparaan si Mingjie parad bautismo to, inrekord nen Yanmei iray tepet tan saray teksto ed libro ya Organisadon Manggawa na Linawa nen Jehova. Nen Hulyo 2018, abautismoan si Mingjie. Oniay imbaga to: “Alikliknak so panangaro na agagi diad saman a kombension. Diad liket ko, agko apokpokay luak ta nalmok a siansia so tuan kongregasyon na Dios.” (Juan 13:34, 35) Labalabay nen Mingjie ya ipanengneng met itan ya panangaro ed arum ya totoo, kanian natan et sikatoy manlilingkor bilang full-time.