Si Bryn ya tagad North Carolina, U.S.A. et membro na Hospital Liaison Committee diad lugar da. Oonla ira ed saray ospital pian naasikaso iray pankaukolan na saray pasyente ya Tasi nen Jehova.

 Lapud COVID-19 pandemic, dakel ya ospital so agmanpapaloob na saray bisita. Tinawagan nen Bryn so direktor na pastoral care na sakey ya ospital diman pian amtaen no panon ton natulongan iray pasyenten Tasi.

 Say akatongtong nen Bryn et say assistant na direktor. Lapud agnayari ombisita, tinepet nen Bryn no nayari kasin iter so phone number to ed saray pasyenten Tasi pian nakatongtong to ra. Pinmayag ira ed satan.

 Naisip met nen Bryn iray mantratrabahod ospital. Imbaga tod samay assistant ya naaapresya toy gagawaen na saray staff na ospital tan imbaga ton komon ta ag-ira mansakit. Insan to ni imbaga ya nababasa ton lapud sayan pandemic, grabe so stress na saray totoo anggan iner, lalo la ray mantratrabahod ospital.

 Imbaga na assistant ya pinagrabe na COVID-19 so stress diad ospital.

 Kanian imbaga nen Bryn: “Wala ray impormasyon diad website mi ya makatulong ed saray totoo pian nasarag day stress. No onla kayo ed jw.org tan i-type yoy ‘stress’ diad Search field, nanengneng yo ray makapaseseg ya artikulo parad saray staff yo.”

 Legan iran mantotongtong, nilukasan na assistant so website tan in-type toy salitan “stress” diad Search field, tan anengneng to ray irerekomendan artikulo. “Wow!” kuan to. “Ipanengneng ko iya ed direktor. Natulongan mi ray staff mid saya tan say arum ni. Man-print ak na saray kopya tan iter kod sikara.”

 Kayari pigaran simba, akatongtong nen Bryn so direktor, imbaga na direktor ya alukasan da lay website tan nan-print ira na saray kopya na saray artikulon nipaakar ed stress tan arum nin mikonektaan ya topic. Inter da iratan ed saray nurse tan arum nin staff na ospital.

 Kuan nen Bryn: “Akisalamat so direktor ed siak lapud kimey tayo tan saray balibalin artikulo tayo. Talagan baleg ya tulong iratan.”