Inyanak ak ed syudad na Calgary diad Alberta, Canada. Nen kapangiyanak ak ni, nansian so atateng ko, kanian akiayam kami nen nanay ko ed abung di lakik tan baik. Inar-aro kami nen lakik tan baik, tan malikeliket ak nen ugaw ak. Siansian sankanonot ko iramay makapaliket ya panaon na impanugaw ko.

 Balet nen pitoy taon ko, anguma-uman so bilay ko nen akipawilan si nanay ko ed si tatay ko tan inmalis kami ed St. Louis, Missouri, diad United States. Naamtaan kon maruksa manaya si tatay ko. Aminsan, kasempet ko manlapud eskuelaan, naamtaan to ya a-bully ak balet agak binmawi. Nampasnokan to ak tan pinoniti to ak ya mas ansakit ni nen say ginawa na saray kaeskuelak. Agko iman nalinglingwanan ya imbangat nen tatay ko kanian pitoy taon ko ni labat, milalaban ak la.

 Lapud mapaspasnok si tatay ko, nagmaliw met ya mapasnok si nanay ko, kanian lanang iran mankokolkol. Ginmapo ak ya man-druga tan oninum na alak nen 11 so taon ko. Nagmaliw ak met ya mapasnok tan naynay ak ya kaiba no wala ray laban diad karsada. Nen man-graduate ak ed high school, nagmaliw ak ya marukruksa.

 Nen 18 lay taon ko, nan-enroll ak diad U.S. Marine Corps. Akaawat ak ditan na training no panon so pamatey na too. Kayari limay taon, inmalis ak ed military tan nanaral ak na psychology lapud labay koy mantrabaho ed Federal Bureau of Investigation. Ginapoan koy manaral ed sakey ya unibersidad diad United States tan intuloy ko itan ed Canada.

 Diad panaaral kod unibersidad, adismaya ak ya maong ed saray totoo ed kaliberliber ko. Parad siak, makasarili ira, tan amin ya walad sayan mundo et anggapoy kana to, singa anggapo lay solusyon na saray problema na totoo. Agko la iilaloan ya naparakep ni na totoo so kipapasen na sayan mundo tayo.

 Lapud singa anggapo lay gagala na bilay ko, ontetelek labat so bilay ko ed alak, druga, kuarta, tan ed pisekso. Say sankanonot ko labat et say onsublay ya laen kon party tan no siopan bii so onsublay ya piseksoan ko. Lapud training kod military, anggapoy takot kon milaban. Say amtak et siak so makapangibaga no antoy duga tan no antoy aliwa, kanian lalabanan koy siopaman ya manlalames ed arum. Balet diad tua, nagmaliw ak ya aripen na inkaruksa.

 Aminsan, siak tan samay kaarok et walad basement tan kakkayari min angusar na druga. Legan min ipaparaan iray ilako min marijuana, tinepetan to ak no kasin manisia ak ed Dios. Kuan ko, “No manlalapud Dios so paniirap tayo, agko labay ya nakabat!” Diad sinmublay ya agew, nen linmoob ak ed balon pantratrabahoan ko, tinepetan ak na katrabahok ya sakey a Tasi nen Jehova, “Parad sika, kasin manlalapud Dios so amin ya paniirap ed sayan mundo?” Abigla ak ed saman ya intepet to ta aman met may tepet ko nen imbeneg ya agew. Diad sinmublay ya anemiran bulan, dakel so apantongtongan mi, tan impanengneng tod siak iray ebat na Biblia ed saray tepet kod bilay.

 Walay ka-live in ko ya asingger kami lan mankasal, tan agto labay ya ibagak ed sikato iray nanaaralan kod Biblia. Aminsan ya Simba, imbagak ed sikato ya inimbitaan ko iray Tasi ya onla ed abung mi pian iyaralan kami na Biblia. Balet diad sinmublay ya agew, kasempet ko manlapud trabaho, naamtaan kon linmayas tan inawit ton amin so gamit mid abung. Manak-akis ak diad paway na abung mi. Insan ak nampikasi ed Dios ya tulongan to ak. Aman so unonan pankanawnawa ya binitlak ed pikakasik so personal ya ngaran na Dios ya Jehova.​—Salmo 83:18.

 Kalabas na duay agew, diad unonan pankanawnawa, impaiyaralan ak na Biblia ed sanasawan Tasi. Kaalis da, intuloy kon binasa may libron aaralen mi ya You Can Live Forever in Paradise on Earth, tan asumpal ko itan diad saman ya labi. a Sinmabi ed pusok so naamtaan ko nipaakar ed si Jehova a Dios tan say Anak to, si Jesu-Kristo. Naaralan ko ya si Jehova et mapangasi tan nasasakitan ed paniirap tayo. (Isaias 63:9) Alikliknak so panangaro na Dios diad impangisakripisyo toy Anak to parad sikatayo. (1 Juan 4:10) Atalosan ko ya abayag la manayan manaanos si Jehova ed siak “ta agto labay a walay siopaman a naderal noagta labay to ya amin et naikday pankanawnawan magbabawi.” (2 Pedro 3:9) Aliknak ya inyapit to ak ed sikato.​—Juan 6:44.

 Ginapoan koy onatendi ed saray aral na Tasi diad saman ya simba. Anggano andukey so buek ko, akaikaw ak, tan makapataktakot so itsurak, impasen ak na saray Tasi ya singa kapamilyan abaybayag ya agda anengneng. Talagan tua iran Kristiano. Pakaliknak et singa sinmempet ak ed abung di lakik tan baik, balet diad mas marakep ya kipapasen.

 Ag-abayag, lapud saray nanaaralan ko ed Biblia, kalkalnan anguman so bilay ko. Nampakatli ak, intundak so imoral ya panagbilay ko, say panagdrugak, tan say alablabas ya kakainom koy alak. (1 Corinto 6:9, 10; 11:14) Labay kon paliketen si Jehova. Kanian nen naaralan ko ya agto aabobonan so gagawaen ko, agak la nambaraan tan nakokonsiensia ak ya maong. Kanian imbagak ed sarilik, ‘Agko lan balot labay ya gawaen lamet iratan.’ Kanian tampol ya inuman koy panagnonot tan kagagawak. Bilang resulta, naliliknak ya mas maliket so bilay ko lapud gagawaen ko ray panlabayan nen Jehova. Nen Hulyo 29, 1989​—kalabas na anem bulan manlapu nen nanaral ak na Biblia—​abautismoan ak bilang sakey ed saray Tasi nen Jehova.

 Akatulong so Biblia pian nauman koy ugalik. Nensaman, mainomay ak ya onsanok ed toon makapainsulto so ugali to. Balet natan, pansasagpotan koy ‘mikareenan ed amin a totoo.’ (Roma 12:18) Agawaan ko iya lapud tulong nen Jehova panamegley na Salita to tan masanton espiritu to.​—Galacia 5:22, 23; Hebreo 4:12.

 Natan et agak la aripen na druga, inkaruksa, tan imoral iran pilalek. Imbes, mansasagpot ak pian napaliket koy Jehova a Dios tan iter so sankaabigan ko ed sikato. Kaibad satan so itulong ed arum ya nakabat day Dios. Kalabas na pigaran taon kayari na bautismok, namboluntaryo ak ed lugar ya baleg so pankaukolan parad saray manangipulong na maong a balita na Panarian. Diad inlabas na panaon, aliknak so liket legan kon babangatan iray totoo tan no nanenengneng kon uumanen na Biblia so bilay da. Agaylay liket ko met nen nagmaliw ya Tasi nen Jehova si nanay ko. Say sakey ya akatulong ed sikara et lapud saray anengneng dan positibon pananguman ed bilay ko, diad ugalik tan kagagawak.

 Nen 1999, diad El Salvador, nan-graduate ak ed sakey ya eskuelaan ya tatawagen la natan ya School for Kingdom Evangelizers. Impasal tan imbangat ak na satan ya eskuelaan pian nidaulo so panagpulong a kimey tan pian nibangat tan napastolan so kongregasyon. Diad satan lanlamang ya taon, nankasal kami nen Eugenia, say inar-arok ya asawa. Natan et manlilingkor kami bilang full-time diad Guatemala.

 Nensaman, maermen ak tan dismayado ak ed bilay ko, balet natan et agko nipaliwawa so liket ya naliliknak. Lapud inyaplikak iray ibabangat na Biblia, nibulos ak la ed imoral tan maruksan kabibilay tan natan et panliliketan ko lay bilay ya napnoy tuan panangaro tan kareenan.