“No labay mon talaga ya naaralan so nipaakar ed Dios, itultuloy moy mila ed saray Tasi nen Jehova.” Abigla ak nen arengel ko itan. Manaaral ak lay Biblia ed Saray Tasi nen Jehova ed saman. Balet pian natalosan yo no akin ya onman so reaksion ko, labay kon iyistorya na daiset so bilay ko.

 Inyanak ak ed Quezaltepeque, sakey ya baley ed El Salvador. Komanem ak ya anak tan labinlima kamin sanaagi. Pinabaleg ak na atateng ko ya magmaliw a matua tan maunor ed gobierno. No maminsan, ibabangat kami met nen Leonardo tan arum nin Tasi nen Jehova nipaakar ed Biblia. Balet imbaliwalak so inaral ko tan aliwliwa ray gagawaen ko. Nen 14 años ko, ginapoan koy oninum na alak tan man-druga kaiba iray barkadak ed eskuelaan. Sansasakey iran tinmunda ed paneeskuela da tan akila ed sakey ya gang, tan inalig ko ra. Lanang kamin walad karsada, sasabaten mi ray ondadalan tan kekerewan mi ray kuarta, tan mantatakew kami parad bisyo mi.

 Say gang so nagmaliw ya pamilyak. Inisip ko ya dapat ya matoor ak ed sikara. Singa bilang, aminsan et walay akadruga ya barkadak ed gang tan inataki to imay kaabay mid abung. Legan na laban, atalo na kaabay mi so barkadak tan anawag na pulis. Lapud pasnok ko, binabatlak so kotse to may kaabay mi pian ibulos to la may barkadak. Mikakasi so kaabay mi ya ontunda ak la, legan kon sansakey ya bebetagen iray bintana na kotse to ya anggad dineral ko lan talaga so interon kotse to, balet agko dinengel.

 Nen 18 años ko, akilaban ed saray pulis so gang ko. Nen kuan ko lan ibuntok so bomba ya ginawa mi, biglan sinmabog ed limak​—agko amta no panon ya agawa iman. Anengneng ko labat lan amugay so limak​—kayari to, nalmay ak lad saman. Kabangon kod ospital, aputot lay kawanan ya limak tan agla makarengel so kawanan ya layag ko tan ngalngali la bulag so kawanan ya matak.

 Anggan onia so agawa ed siak, kapaway kod ospital, pinmawil ak lamet ed gang. Agnambayag, inaresto ak na pulis tan akulong ak. Diad prisoan, lalon binmiskeg so ulopan min sanbabarkada ed gang. Saniba kamin sanagew​—manlapud almusal, no mansungap kami lay marijuana, anggad iyugip mi.

 Legan ya wala ak ed prisoan, binmisita ed siak si Leonardo. Legan kamin mantotongtong, inturo to so tattoo ed kawanan ya taklay ko. “Antam no antoy labay ton ibaga ’tay taloran tuldok ditan?” “On,” so kuan ko, “sex, druga, tan rock and roll.” Balet imbaga nen Leonardo: “Aliwa. Ospital, prisoan, tan patey. Naospital ka la, natan et wala kad prisoan. Kanian antam lay ontumbok ya nagawa.”

 Agak akasel ed imbaga nen Leonardo. Duga so imbaga to. Mankokotkot ak na sarilin ponponan ko lapud mauges ya kabibilay ko. Inopresian to ak nen Leonardo ya manaral na Biblia, tan inawat ko. Lapud saray naaralan kod Biblia, nauman so bilay ko. Singa bilang, ibabaga na Biblia ya “say piulop ed mauges et maneral ed maong iran ugali.” (1 Corinto 15:33) Kanian nananap ak na balon kakaaro. Agak la oonla ed miting na saray barkadak, noagta, diad miting na Saray Tasi nen Jehova ya nagagawa ed loob na prisoan. Diman ko akabat si Andres, sakey met ya priso balet abautismoan bilang sakey ya Tasi nen Jehova. Inimbitaan to ak ya man-almusal. Kayari to man, agak lan balot nansungap na marijuana. Say gagawaen ko la et pantotongtongan min dua nen Andres so sakey ya bersikulo na Biblia kada kabuasan.

 Naimanon tampol na saray membro na gang ya manguuman ak la. Kanian imbaga na sakey ya lider na gang ed siak ya mantongtong kami. Natatakot ak ya maong. Agko amta no antoy gawaen tod siak no naamtaan toy desisyon ko, ta singa imposible so onalis ed gang. Imbaga tod siak: “Naiimano mi, agka la oonla ed miting tayo, dia ka la oonla ed miting na Saray Tasi nen Jehova. Antoy planom a?” Imbagak ed sikato ya labay kon ituloy so panaaral koy Biblia tan umanen ko lay kabibilay ko. Mankelaw ak ta imbaga ton respetoen ak na gang basta napaneknekan ko ya talagan labay koy magmaliw ya Tasi nen Jehova. Insan imbaga to ni: “No labay mon talaga ya naaralan so nipaakar ed Dios, itultuloy moy mila ed saray Tasi nen Jehova. Ilaloan min itundam lay manggawa na aliwa. Makakaliket ak ed sika. Duga ’tay gagawaen mo. Talagan tulongan ka na saray Tasi. Inyaralan ak nensaman na saray Tasi diad United States, tan wala ray kakanayon kon Tasi nen Jehova. Agka natatakot. Ituloy mo labat.” Natatakot ak nin siansia, pero malikeliket ak. Pisalamatan kon maong so Dios ya Jehova. Singa ak malapati ya nablos ed kulongan, tan atalosan ko may inkuan nen Jesus: “Naamtaan yo so katuaan, tan say katuaan so mangibulos ed sikayo.”​—Juan 8:32.

 Balet wala ray datin kakaarok ya susuboken da ak, oopresian da ak na druga. Aminen ko ya no maminsan natukso ak. Anggad sinmabi panaon, kayari masimoon iran pikakasi, nitundak ya siansia so bisyok.​—Salmo 51:10, 11.

 Kapaway kod prisoan, ibabaga na dakel ya pawilen ko lanlamang kuno so datin kabibilay ko, balet andi. Diad tua, pinmawil ak ed prisoan pian ibagak so nanaaralan kod Biblia ed saray apriso. Akombinsik ya siansia iray datin kakaarok ya anguman ak lan talaga. Pero agmanisia iray datin kalaban ko.

 Sakey ya agew nen pinmaway ak pian manpulong, siak tan say partner ko et biglan pinaliberan na saray armadon membro na kalaban kon gang nensaman, tan labay da ak ya pateyen. Makmakpel ya inmarap so partner ko tan magalang ton impaliwawa ya agak la membro na gang. Nansiansia ak labat ya kalmado. Kayari da ak ya binugbog tan binagaan ya agak lan balot onloloob ed teritorya da, inleksab day armas da, insan da kami la pinaalis. Inuman ya talaga na Biblia so bilay ko. No nensaman, talagan ombawi ak. Balet natan, uunoren ko lay bilin na Biblia ed 1 Tesalonica 5:15: “Seguroen yon anggapod sikayo so ombales na mauges ed mauges a ginawa na arum, noag ingen manggawa kayon naynay na maabig ed balang sakey tan ed amin.”

 Manlapu la nen nagmaliw ak ya Tasi nen Jehova, mansasagpot ak lan magmaliw ya matua. Aliwan mainomay, balet asarag ko diad tulong na Dios ya Jehova, saray bilin ed Biblia, tan suporta na kakaarok. Agko lan balot pawilen so datin kabibilay ko.​—2 Pedro 2:22.

 Nensaman, alabas so inkaruksak tan misasabo so dalak. No agko intunda so maruksan kabibilay ko, seguradon inatey ak la natan. Inuman ak na saray naaralan kod Biblia. Intundak iray bisyok. Naaralan koy mikareenan ed saray datin kalaban ko. (Lucas 6:27) Tan natan et wala ray kaarok ya ontutulong ed siak ya nawalaan na maabig ya ugali. (Proverbio 13:20) Malikeliket ak tan wala lay direksion na bilay ko, tan manlilingkor ak ed Dios ya akaparaan a mamerdona ed amin ya aliwliwan ginawak.​—Isaias 1:18.

 Nen 2006, nanaral ak ed espisyal ya eskuelaan pian ipasal iray balolakin Kristianon ebanghelisador. Kayari pigaran taon, angasawa ak. Saniba min pababalegen so anak min bii. Uusaren ko natan so panaon ko pian ibangat ed arum iray prinsipyo na Biblia ya tinmulong ed siak. Manlilingkor ak met bilang elder ed kongregasyon mi, tan tutulongan ko ray kabataan pian napaliisan da ray lingo ya agawaan ko nensaman. Imbes ya mankotkot na sarilin ponponan ko, ipapaalagey ko natan so andi-anggaan ya arapen ko ya insipan na Dios ed Biblia.