Inyanak ak ed La Ceiba, Honduras, siak so bolirek tan bukbukor koy laki ed sikami ya limaran sanaagi. Siak labat so emel ed pamilya mi. Delikado diad lugar ya panaayaman mi, tan mair-irap so bilay mi. Nen manga apat taon ko ni labat, naaksidente ed trabaho si tatay ko kanian mas inmirap so situasyon mi.

 Ginawa nen nanay so anggaay nayarian da pian nasuportaan kami ran ananak da, balet kulang so nanaalmo da kanian matalag da ak ya naisaliwan na kawes. No onuran, lanang ak ya nakeketel ta anggapoy makapal ya kawes ko.

 Nen binmaleg ak la, naaralan koy Honduras Sign Language (LESHO), kanian makakapitongtong ak ed saray kaparak ya emel. Ag-amta nen nanay tan saray atsik so LESHO, pigaran sinyas labat so amta ra tan say arum et ginawa da labat pian makapitongtong ed siak. Balet, inar-aro ak nen nanay ko tan prinotektaan da ak ed saray peligro. Anggano daiset labat so amta dan sinyas, binilin da ak ya iwasan iray bisyo a singa say pansigarilyo tan sobran iyinum na alak. Kanian misalsalamat ak lapud binmaleg ak ya agnaadik ed saratan.

 Nen ugaw ak ni, ipipila ak nen nanay ko ed simbaan na Katoliko, balet anggapoy natatalosan ko ta anggapoy mangipapatalos ed siak ed sign language. A-boring ak kanian tinmunda ak lan mimisa nen samplora so taon ko. Balet, labalabay ko ni makaaral nipaakar ed Dios.

 Nen 1999, sanen 23 años ko, walay akabat kon bii ya tagad United States ya membro na evangelical church. Wala ray imbangat tod siak nipaakar ed Biblia tan binangatan to ak na American Sign Language (ASL). Labalabay ko ray nanaaralan ko ed Biblia kanian nandesisyon ak a magmaliw ya pastor. Insan ak linma ed Puerto Rico pian manaral ed sakey ya Kristianon eskuelaan parad saray emel. Kapawil ko ed La Ceiba nen 2002, angiletneg ak na simbaan parad saray emel diad tulong na pigaran kakaarok. Sakey ed sikara si Patricia, a nagmaliw ya asawak.

 Bilang pastor ed simbaan mi, mangiiter ak na sermon panamegley na LESHO, ipapanengneng ko ray litrato na saray istorya ed Biblia, tan iyaaktok iray istorya pian natalosan iratan na saray emel. Ombibisita ak met ed saray emel diad asingger iran baley pian pasesegen tan tulongan ira ed saray problema da. Linma ak ni ingen ed United States tan Zambia bilang misionero. Balet diad tua, anggapoy masyadon amtak ed Biblia. Ibabagak labat no anto ray imbangat ed siak tan no anto ray atalosan ko ed saray litrato. Diad tua, mas dakel ni tepet ko nen say ebat ko.

 Aminsan, wala ray membro na simbaan mi ya angikayat na tila nipaakar ed siak. Ibabaga ran buanges ak tan manbibii ak kuno. Adismaya tan nampasnok ak. Kanian ag-abayag, inmekal kami nen Patricia ed relihyon mi.

 Mabetbet ya wala ray Tasi nen Jehova ya ombibisita ed sikami nen Patricia, pero agmi ran balot dedengelen. Balet nen inmekal kami la ed relihyon mi, pinmayag si Patricia ya paiyaralan na Biblia ed sanasawan Tasi ya si Thomas tan si Liccy. Mandinayew ak ta anggano aliwa ran emel, amta day man-sign language. Kanian akila ak met la ed si Patricia ed panaaral toy Biblia.

 Pigaran bulan da kamin inyaralan panamegley na saray video diad ASL. Balet nen imbaga ed sikami na pigaran kakaaro mi ya Saray Tasi nen Jehova kuno et papatumbok labat na totoo, intunda mi panaaral mi na Biblia. Anggano impanengneng la nen Thomas ed siak iray ebidensya ya Saray Tasi nen Jehova et aliwan papatumbok na saray totoon lider, siansian agak anisia ed sikato.

 Kayari pigaran bulan, nen a-depress ya maong si Patricia, impikasi to ed Dios ya mangibaki na Saray Tasi nen Jehova diad abung mi. Ag-abayag, walay Tasi nen Jehova diad kaabay min abung ya binmisita ed si Patricia tan namboluntaryon ibagad si Liccy ya bisitaen si Patricia. Talagan tuan kaaro si Liccy. Kada simba et bibisitaen toy Patricia pian pasesegen to tan iyaralan to na Biblia. Balet, siansia nin wala ray panduaruwak ed saray Tasi.

 Nen 2012, walay espisyal a kampanya na Saray Tasi nen Jehova ya iyopresi so video ya Kasin Labay Mon Naamtaan so Katuaan? diad LESHO. Inikdan kami nen Liccy na kopya na video. Nen abantayan ko itan, abigla ak ya maong ta dakel ed saray doktrina ya imbangat ko, singa say impierno tan say ag-ompatey ya kamarerwa, et anggapo manaya ed Biblia.

 Diad tinmumbok ya simba, linma ak ed Kingdom Hall na Saray Tasi nen Jehova pian mitongtong ed si Thomas. Imbagak ed sikato ya labay kon ibangat so katuaan na Biblia ed saray emel, balet agko labay so magmaliw ya Tasi nen Jehova. Planok so mangiletneg na balo tan biig ya relihyon parad saray emel. Kinomendaan ak nen Thomas lapud pinmawil so seseg ko, balet impaimano to ed siak so Efeso 4:5, idadanet na satan ya kaukolan ya walay pankakasakey ed kongregasyon na saray tuan Kristiano.

 Inikdan ak met nen Thomas na video ya Jehovah’s Witnesses—Faith in Action, Part 1: Out of Darkness diad ASL. Impanengneng na sayan video no panon ya maalwar ya inusisa na sakey a grupo na lalaki so Biblia pian naamtaan da so katuaan nipaakar ed saray manunan doktrina. Legan kon babantayan so video, atalosan koy liknaan na saraman ya lalaki. Labay ko met ya naromog so katuaan. Akombinse ak na saman a video ya ibabangat na saray Tasi so katuaan lapud diad Biblia labat so pangibabasiyan da na saray papanisiaan da. Kanian nampaiyaral ak lamet na Biblia, tan nen 2014, abautismoan kami nen Patricia bilang Tasi nen Jehova.

 Labalabay koy kongregasyon na Saray Tasi nen Jehova lapud malinis so kabibilay da tan aaligen da so Dios ya malinis. Saray mandadayew ed sikato et aliwan mabanday so panagsalita da tan maomaong so panagtrato da ed arum. Mareen iran totoo tan papasesegen day sakey tan sakey. Walay pankakasakey na saray Tasi tan parehon katuaan ed Biblia so ibabangat da inerman ya bansa so kawalaan da odino antokaman ya lenguahe so sasalitaen da.

 Malikeliket ak nen naaralan ko so ibabangat na Biblia. Singa bilang, naamtaan ko ya si Jehova et Makapanyarin-amin ya Dios, say Soberano ed interon dalin. Inar-aro to ray emel tan saray makasalita. Papablien kon maong so panangaro na Dios ed siak. Naaralan ko met ya say dalin et magmaliw a marakdakep ya paraiso tan sarag tayo so manbilay na andi-anggaan ya perpekto lay laman tayo. Labalabay ko lan nanengneng ya nagawa iratan!

 Labalabay mi nen Patricia ya itongtong ed saray emel so nipaakar ed Biblia. Natan et iyaaralan mi na Biblia so arum ed saray membro na datin relihyon mi. Balet natan, agko la panduaruwaan iray ibabangat ko, aliwan singa nen pastor ak ni. Aromog ko ya siansia iray ebat ed saray tepet ko nen inyaralan ak na Biblia na Saray Tasi nen Jehova.