Inyanak ak ed Montreal City, say sankabalegan ya syudad ed probinsya na Quebec, diad Canada. Talora kamin sanaagi tan pinabaleg kami na maaron atateng mi diad Rosemont. Simpli tan mareen so bilay mi.

 Interesado ak ed Biblia nen ugaw ak ni. Natatandaan ko nen 12 años ak, labalabay kon basaen so New Testament, amay istoryay bilay nen Jesus. Labay kon aligen ta pambiliban koy aro tan panangasi tod totoo. Makapaermen balet ta kalkalnan abalang man ya interes ko nen tinedyer ak la, ta abarkada ak.

 Maong ya mantogtog na saxophone so Tatay ko. Agto labat impatawir ed siak so saxophone to, impatawir to met ed siak so panangaro tod musika ya nampokusan na bilay ko. Na-enjoy kon maong so musika, kanian inaral ko met so man-gitara. Nanbuo ak met na banda kaibay barkadak, tan nan-perform kami. Akabat kami na pigaran sikat ya producer tan inikdan da ak na offer. Nanpirma ak na kontrata ed baleg ya recording company. Nagmaliw ya sikat so musikak tan lanang dan ipapatogtog ed radyo diad Quebec.

 Singa wala lad siak so amin ya pinangarap ko. Kakkaksilan kod saman, sikat ak, baleg so naalmok tan labalabay koy trabahok. No agew​—training kod gym, manpa-interbyu, autograph signing, tan nanenengneng ak ed saray TV show. No labi—​music show tan onla ak ed saray party. Pian nasarag koy stress lapud karakel na fans ko, anggano ugaw ak ni naaralan koy oninum na alak, anggad angusar ak met lay drugs. Palaran so kabibilay ko tan imoral ak.

 Dakel so naiinggit ed siak ta singa maliket ak. Balet dia tua, naliliknak ya walay kulang ed bilay ko, lalo no bukbukor ko la. Nadi-depress ak tan aburido ak. Grabe lanti, ta nen panaon ya sikat ak lan maong, duara ed saray producer ko so inatey lapud AIDS. Abigla ak ya maong! Anggano labalabay koy musika, singa aliwliwa balet so pagmamaliwan na bilay ko.

 Tua sikat ak, pero amtak ya walay aliwa ed sayan mundo. Akin et amayamay so nagagawan ag-inkahustisya? Pankelawan ko, akin et anggapoy gagawaen na Dios? Diad tua, lanang kon idadasal ed Dios ya naebatan komoy pikakasik. Nen anggapoy music tour ko, binasak lamet so Biblia. Anggano dakdakel so agko natatalosan ed babasaen ko, amtak ya asingger lay anggaan na mundo.

 Legan kon babasaen so Biblia, naamtaan kon nanayunal o nan-fasting si Jesus diad desierto, ya ag-angan ed 40 ya agew. (Mateo 4:1, 2) Naisip ko ya no gawaen ko met man, ompan ipakabat na Dios so sarili tod siak, kanian in-set koy iskedyul no kapigan ak man-fasting. Duaran simba antis ak ya man-fasting, walay duaran Tasi nen Jehova ya tinmoktok ed abung mi, tan pinatuloy ko ra ya singa talagan iilaloan ko ra. Akimataan ak ed samay sakey ya Tasi, si Jacques, insan ko tinepetan, “Panon tayon naseguron manbibilay tayo lad kaunoran iran agew na sayan mundo?” Bilang ebat, nilukasan toy Biblia tan imbasa toy 2 Timoteo 3:1-5. Amayamay so intepet kod sikaran dua. Pambiliban koy ebat da, ya akabase ya lanang ed Biblia. Aminpiga da ak ya pinawil, insan ko atalosan ya agko la kaukolay man-fasting.

 Nanpa-Bible study ak ed saray Tasi. Anggad nen kien, impakatlik so andukey ya buek ko, insan ak la inmatendi ed amin ya aral diad asingger ya Kingdom Hall. Amay malikeliket ya impan-welcome dad siak ed saray aral, aman so akakombinse ed siak ya nalmok lay tuan relihyon.

 Siempre, pian naunor ko ray nanaaralan kod Biblia, kailangan koy manggawa na angkakabaleg ya pananguman ed bilay ko. Unona, dapat kon itunda so pandra-drugs ko tan say imoral ya kabibilay ko. Kailangan kon umanen so makasarilin ugalik tan kaukolan kon ipanengneng so panangarod arum. Bilang single parent, kaukolan kon asikasoen so emosyonal tan espiritual ya pankaukolan na duaran ananak ko. Kanian inikbanan koy career kod musika tan nantrabaho ak ed factory ya melag labat so sueldo.

 Aliwan mainomay so panggawa ed sarayan pananguman. Legan kon itutunda so bisyok ya drugs, agaylay irap ta anap-anapen ko nin siansia, tan no maminsan et napawil ko. (Roma 7:19, 21-24) Tan nairapan ak met ya itunday imoral ya kabibilay ko. Sakey ni, makapabanal may balon trabahok, tan makapadismaya so melmelag ya sueldok. Say sueldok ed taloran bulan et duaran oras ko labat ya almoen nen musician ak ni.

 Akatulong ed siak so pikakasi pian agak onsuko ya gawaen irayan mairap ya pananguman. Akatulong met ed siak so regular a panagbasa na Biblia. Wala ray partikular ya bersikulo ed Biblia ya talagan amabiskeg ed siak. Say sakey et amay bilin ed saray Kristiano diad 2 Corinto 7:1 ya “linisan tayoy sarili tayo ed amin a karutakan na laman tan espiritu.” Say sakey nin bersikulo ya amabiskeg ed siak pian nasarag kon itunda iray aliwliwan kagagawak et amay walad Filipos 4:13, kuan to: “Walay biskeg kon arapen so amin a bengatla lapud samay mangiiter ed siak na pakayari.” Inebatan na Dios a Jehova so pikakasik tan tinulongan to ak ya natalosan tan niyaplika iray ibabangat na Biblia. Kanian apakiwas ak ya idedika so bilay kod sikato. (1 Ped. 4:1, 2) Abautismoan ak bilang sakey ya Tasi nen Jehova nen 1997.

 No bilang ta agko intunday datin kabibilay ko, seguradon inatey ak la natan. Balet kabaliktaran ta malikeliket lay bilay ko! Bendisyon ed siak so maomaong ya asawak, si Elvie. Panliliketan min dua ya ibangat ed arum so Biblia bilang full-time ya ministro. Malikeliket tan kontento kami. Pisalamatan kon maong si Jehova ta inyasingger to ak ed sikato.​—Juan 6:44.