Binmaleg ak ya Katoliko diad Rochester, New York. Nansian iray atateng ko nen waloy taon ko ni labat. Kada Lunes anggad Biernes, wala ak ed nanay ko diad panaayaman dan apartment parad saray mairap-bilay. Balet no weekend, oonla ak ed tatay ko ya manaayam ed mas mainawan abung. Nakakasian koy nanay ko ta agaylay irap da pian nalegpet kamin anemiran ananak da, kanian labay koy onyaman pian natulongan koy pamilyak.

 Labay nen tatay ko ya maong so pansumpalan ko, kanian nanggawa ray paraan pian makapasyar ak ed sakey ya kabkabat ya eskuelaan parad kurson hotel management. Agustoan ko kanian diman ak nanaral, inisip ko ya ebat iman na Dios ed pikakasik ya magmaliw ak ya mayaman tan maliket. Diad loob na limaran taon, nanaral ak na hotel management, business law, tan corporate finance legan ak ya mantratrabaho ed sakey ya casino hotel diad Las Vegas, Nevada.

 Nen 22 años ko, nagmaliw ak ya assistant vice president na sakey ya casino hotel. Nibagan mayamyaman ak tan maong so nansumpalan na bilay ko, tan mabetbet kon natatawayan iray sankasarapan ya naakan tan sankabilian iran alak tan iinumen. Ibabaga na saray kakaarok ed negosyo, “Manpokus ka ed no antoy sankaimportantian ed mundo​—say kuarta.” Parad sikara, kuarta so sekreto pian magmaliw ya maliket.

 Kaiba ed trabahok so pangasikaso ed saray mayamyaman ya totoon oonla ed Las Vegas pian mansugal. Anggaman mayamyaman ira, ag-ira balet maliket. Anggan siak et agak met la naliliketan. Diad tua, no diman ondadakel so kuartak, mas napapagaan ak tan agak laingen makakaugip. Naisip ko ingen so manbikkel. Lapud agak maliket ed bilay ko, tinepetan koy Dios, “Antoy gawaen ko pian magmaliw ak ya tuan maliket?”

 Diad saman ya panaon, nanayam ed Las Vegas so duaran atsik, a nagmaliw ya Tasi nen Jehova. Anggaman agko aawaten iray iiter dan literatura, babasaen koy sarilin kopyak na Biblia a kaiba ira. Diad Bibliak, amin ya imbaga nen Jesus et ambalanga so inkaimprinta to. Lapud panisiaan koy amin ya imbaga to, say itotongtong ed siak na saray atsik et nipaakar labat ed si Jesus. Tan manbabasa ak met na Biblia no bukbukor ko.

 Abigla ak ed dakel ya naamtaan ko ed pambabasak. Singa bilang, imbaga nen Jesus: “Sano manpipikasi ka, agmo uulit-uliten ya ibaga iray apasakey a bengatla a singa gagawaen na totoo na saray nasyon, ta say abaloan da et narengel ira no mangusar ira na dakel a salita.” (Mateo 6:7) Aminsan, walay sakey ya pari ya angiter ed siak na litrato nen Jesus tan imbaga to ya no manpikasi ak ed saman ya litrato, na samploran Ama Mi tan samploran Hail Mary, iter na Dios so anggan pigaran kuarta ya kaukolan ko. Balet naisip ko ya no i-memorize ko irayan pikakasi, agta singa uulit-uliten ko iray apasakey ya salita ya agko met natatalosan? Binasak met so imbaga nen Jesus: “Agyo tatawagen ya ama yo so siopaman a too diad dalin, ta saksakey so Ama yo, samay walad tawen.” (Mateo 23:9) Kanian inisip ko, ‘Akin balet et say tawag mi ran Katoliko ed pari mi et “Father” o “Ama”?’

 Nen binasak so sakey a libro ed Biblia ya Santiago, apaisip ak a maong nipaakar ed saray labay kon nagawa ed bilay ko. Diad kapitulo 4, oniay insulat nen Santiago: “Agyo ta amta a say pikakaaro ed mundo et kabaliksan toy pambusol ed Dios? Siopaman sirin a labay toy mikaaro ed mundo et pagmamaliwen toy inkasikato a kabusol na Dios.” (Santiago 4:4) Lalo ak ya apaisip diad bersikulo 17: “Kanian no say sakey et amta ton gawaen no antoy duga ingen ta agto gagawaen, sikatoy mankakasalanan.” Kanian tinawagan ko iray atsik tan imbagak ed sikara ya onekal ak la ed trabahok diad casino hotel ta atalosan kon dakel iray bengatla diman ya aglabay na Dios, singa say panagsugal tan inkaagum.

 Labay kon paeleten so relasyon ko ed Dios ontan met ed saray atateng ko tan agagik. Kanian nandesisyon ak ya pasimplien so bilay ko. Balet aliwan mainomay ya gawaen itan. Singa bilang, inopresian ak na mas atagey ya posisyon ed casino hotel tan doble odino triple so sueldok. Balet kayarik ya impikasi itan, nandesisyon ak ya aliwan onman so bilay ya labay ko. Inmekal ak ed trabahok, nanayam ak ed abung nen nanay ko, tan angipaalagey ak na melag ya negosyo.

 Anggaman natutulongan ak na Biblia ya manggaway makabat iran desisyon, agak nin siansia onaatendi ed aral na Saray Tasi nen Jehova. Tinepetan ak na saray atsik no akin ya agko labay iray Tasi nen Jehova. Imbagak: “Ta bubuyaken na Dios yon Jehova iray pamilya. Nakakaibak labat so pamilyak kada no Krismas tan birthday, balet agyo seselebraan iratan.” Inmakis may sakey ya atsik tan tinepetan to ak: “Kulaan mo balet ey no aliwan Krismas tan birthday? Labalabay mi kan nakaiba anggan anton agew. Balet nakakaiba mi ka labat ed saratan ya okasyon—tan oonla ka lapud pakaliknam et obligasyon mo iratan.” Singa pinuyok so pusok lapud saratan ya imbaga to, tan nanakisan kamin dua.

 Nen atalosan ko ya labalabay na Saray Tasi nen Jehova ya nakaiba iray pamilya da​—tan alingo-lingo ak ed inisip kod sikara—​nandesisyon ak ya onatendi ed sakey ed saray aral da diad Kingdom Hall. Akabat ko diman si Kevin, sakey ya eksperiensyadon managbangat na Biblia, ya angiyaral ed siak.

 Simpli so panagbilay di Kevin tan say asawa to kanian mas dakel so panaon da pian tulongan so arum ya natalosan so Biblia. Dugaruga labat so naaalmo da tan akaonla ni ra ingen ed Africa tan Central America, ya diman et tinmulong irad pangipaalagey na branch na saray Tasi. Malikeliket ira tan inar-aro day sakey tan sakey. Naisip ko, ‘Ontan so klase na bilay ya labay ko.’

 Impabantay nen Kevin ed siak so sakey ya video nipaakar ed liket ya nalikna diad panmisionero, tan atan so labay kon gawaen. Nen 1995, kayari na anem bulan ya impasyan panangiyaral na Biblia, abautismoan ak bilang Tasi nen Jehova. Imbes ya ipikasik ed Dios ya onyaman ak, say ipipikasik la et “Agmo ak komon aabuloyan a manirap odino onyaman.”​—Proverbio 30:8.

 Talagan mayamyaman ak la natan​—aliwan diad pinansyal, noagta diad espiritual. Akabat kod Honduras so inar-arok ya asawa, ya si Nuria, tan manlilingkor kamin dua bilang misionero diad Panama tan Mexico. Tudtua ed siak so ibabaga na Biblia: “Say bendisyon nen Jehova so mamapayaman ed sakey, tan agto itan aaruman na pakasakitan”​—Proverbio 10:22.