Binmaleg ak ed mareen, makiew, tan matanaman ya lugar na Tampere, Finland. Aliwan relihyoso so pamilyak balet importante ed sikami so edukasyon tan maong ya ugali. Say nanay ko et German, tan nen ugaw ak ni, oonla kami no maminsan ed West Germany ta diman manaayam so baik tan lakik.

 Ugaw ak ni, labalabay ko lay isports. Amin ya isports et gagalawen ko, balet nen 14 ak la, nanpokus ak ed tennis. Nen 16 años ak, manpapasal ak kada agew na mamidua anggad mamitlo​—duaran sesyon na professional training tan manprapraktis ak met ya bukor kada labi. Dakel so labalabay kod tennis; nasusubok ed sayan isports so isip tan laman ko. Nae-enjoy kon kaiba iray kakaarok tan oniinum kami beer no maminsan, pero anggan kapigan, agak balot asangkot ed gulo lapud druga o alak. Manuna ed bilay ko so tennis​—atan so bilay ko.

 Ginmapo ak ya nanggalaw ed saray ATP tournament nen 17 ak. a Nen analo ak ed dakel ya tournament, sinmikat ak ed bansa mi. Nen asabik so edad ya 22, kaiba ak lad top 50 ya tennis player ed interon mundo.

 Diad loob na dakel ya taon, aliber koy interon mundo pian manggalaw na professional tennis. Akaonla ak ed mararakep iran lugar, pero anengneng ko met ya amayamay so problema ed mundo, kaiba lay krimen, druga, tan panagderal ed kalikasan. Singa bilang, nen wala ak ed United States, binagaan da kami ya agkami oonla ed pigaran lugar ta grabe so krimen. Naapektoan ak ya maong ed saraman. Anggano labalabay ko so gagawaen ko, singa wala nin siansia so kulang ed bilay ko.

 Say girlfriend ko, si Sanna, et manpapaiyaral na Biblia ed Saray Tasi nen Jehova. Medyo abigla ak ya relihyoso manaya, pero agko kinontra so panaaral toy Biblia. Nen 1990, nankasal kami, tan sikatoy abautismoan bilang Tasi nen Jehova kayari sakey taon. Agko met nibagan relihyoso ak, balet manisia ak ya walay Dios. Nanonotan ko nensaman, say baik ya German et lanang ya manbabasa na Biblia tan imbangat to ak ya manpikasi.

 Aminsan, pinmasyar kami nen Sanna ed sanasawan Tasi. Impanengneng ed siak na asawan laki, si Kari, so propesiya na Biblia nipaakar ed “kaunoran iran agew.” (2 Timoteo 3:1-5) Apaisip ak ed imbaga to, diman ko labat atalosan no akin ya agaylay uges na nagagawa ed mundo. Diad saman ya agew, agmi la masyadon nantongtongan so relihyon. Pero manlapud saman, mantotongtong kami la nen Kari nipaakar ed Biblia, tan nanenengneng ko ya duga so amin ya naaaralan ko. Lapud busy ak tan lanang ak ya ombiabiahe, aliwan regular so tongtongan mi, balet maanos si Kari ed siak. No wala ray tepet ko legan kamin manaaral, sikatoy manpapawit na sulat pian ebatan iratan. Amin ya mairap a tepet kod bilay et malinew ya naebatan na Biblia, tan sandaraiset kon atalosan so pinagkatema na Biblia​—ya sumpalen na Panarian na Dios so gagala na Dios. Grabe so epekto ed siak nen naamtaan kon say ngaran na Dios et Jehova, tan no anto lay ginawa to parad sikatayo. (Salmo 83:18) Balet, say regalo ton dondon so talagan pandinayewan ko. Aliwa labat iyan pormal ya uksoyan odino legal ya proseso, noagta prueba iyan inar-aro tayo na Dios. (Juan 3:16) Naaralan ko met ya sarag koy magmaliw ya kaaro na Dios tan manbilay ak ya anggad angga diad Paraiso. (Santiago 4:8) Kanian intepet kod sarilik, “Panon ko met sirin ya pisalamatan so Dios ey?”

 Inisip kon maong no antoy gagawaen kod bilay ko. Naaralan kon mas maliket so mangiter tan labay kon ibaga ed arum so papanisiaan ko. (Gawa 20:35) Lapud sakey ak ya atleta, ngalngali 200 agew ya anggapo ak ed abung mi ta wala ak a lanang ed tournament. Akasentro ed siak so bilay na pamilyak​—say training ko, saray gagawaen ko, say karerak ed isports. Kanian naisip kon kaukolan koy manguman.

 Marakep so karerak ed isports, kanian seguradon agak natalosan na dakel no taynanan koy isports parad relihyon ko. Balet no ikompara ed antokaman ya premyo ya naawat kod tennis, mas importante ed siak ya mas nakabat koy Jehova tan nawalaan ak na bilay ya andi-anggaan kanian agak nairapan ya nandesisyon. Determinado ak ya agko la pansinen so ibaga na arum—sarilin desisyon ko iya. Akatulong ed siak imay walad Salmo 118:6: “Si Jehova et walad abay ko; agak ontakot. Antoy nagawaan na too ed siak?”

 Diad saman ya panaon, wala ray sponsor ya nan-offer ed siak na balibalin deal—makapanggalaw ak na tennis ed pigaran taon tan anggapo lay problemaen ko. Balet desidido ak la, kanian agko inawat so offer da tan intundak lay panggalaw ed saray ATP tournament. Intuloy koy panag-aral koy Biblia, tan nen Hulyo 2, 1994, abautismoan ak bilang sakey ya Tasi nen Jehova.

 Anggapo met so dinalan kon graben trahedya pian naisip koy Dios. Agko met nibagan inanap koy katuaan. Pakaliknak nensaman, balibali lay bilay ko tan wala lad siak ya amin. Balet, singa inalagar ak na katuaan tan agko ilaloan ya naromog ko. Naamtaan kon wala manayay mas maliket ya bilay, tan talagan mas balibali bilay ko natan! Mas mabiskeg tan nankakasakey so pamilya mi. Tan makakaliket ak ta talora ed saray ananak ko et inalig da ak​—aliwan bilang atleta, noagta bilang Kristiano.

 Mani-enjoy ak nin siansia ya manggalaw na tennis. Konektado nin siansia ed tennis so trabahok, singa bilang, coach ak tan manager ak ed sakey ya tennis center. Pero aliwa lan isports so akasentroan na bilay ko. Nensaman, dakel so uusaren kon panaon ya manpraktis kada simba pian manalo ak tan magmaliw ya mas marunong ya tennis player. Pero natan, bilang sakey ya full-time ya manbabangat na Biblia, panliliketan kon usaren so panaon ko pian tulongan so arum ya aralen tan iyaplika iray prinsipyo na Biblia ya anguman ed bilay ko. Naaralan ko ya sankaliketan so bilay no iyunak so relasyon kod Dios ya Jehova tan ibagak ed arum so marakdakep ya nagawa ed arapen.​—1 Timoteo 6:19.