Aliwan tua: Saray Tasi nen Jehova et aliwa ran Kristiano kanian ag-ira manseselebra na Easter.

 Say tua: Manisia kamin si Jesu-Kristo so Manangilaban tayo, tan gagawaen mi anggaay nayarian min ‘tumboken a maapit iray bakat to.’​—1 Pedro 2:21; Lucas 2:11.

  Aliwan tua: Agkayo manisian binmilay lamet si Jesus.

 Say tua: Manisia kamin binmilay lamet si Jesus; amta min importante itan ya bangat na Kristianismo tan sakey itan ed saray manunan ipupulong mi.​—1 Corinto 15:3, 4, 12-15.

  Aliwan tua: Isisiblet yod ananak yo so liket na panselebrad Easter.

 Say tua: Inaro mi ray anak mi. Gagawaen mi anggaay nayarian min ibangat ira pian magmaliw iran maliket.​—Tito 2:4.

•   Ag-akabase ed Biblia so selebrasyon na Easter.

•   Ingganggan nen Jesus ya nodnonoten tayoy impatey to, aliwan say imbilay to. Tinaon min nonodnonoten so impatey to diad eksakton petsa ya base ed lunar calendar na Biblia.​—Lucas 22:19, 20.

•   Manisia kamin aglabay na Dios so Easter ta nanlapu itan ed saray ritual nensaman ya walay koneksion tod panag-anak. Labay na Dios ya sikato labat so pangiteran tayoy debosyon tayo. Nasasakitan so Dios no sikatoy dayewen na totoo diad paraan ya agto labay.​—Marcos 12:28-30; Lucas 4:8.

 Amta min say desisyon mi ya agmanselebra na Easter et talagan base ed Biblia. Ibabaga na Biblia ya usaren tayoy “kakabatan tan pakatalus” imbes ya unor-unor ti labat ed saray tradisyon. (Probirbio 3:21, Maung a Balita; Mateo 15:3) No walay mantepet no akin et agkami manseselebra na Easter, ibabaga mi rason, balet rerespetoen mi karapatan na arum ya mandesisyon no antoy labay da.​—1 Pedro 3:15.