Naynay ya ibabase mid Biblia iray papanisiaan mi, kanian wala ray gagawaen min pananguman no mas onlinew so pakatalos mi ed Kasulatan. a

 Say gagawaen min pananguman et akabase ed prinsipyo na Biblia ya walad Proverbio 4:​18: “Say basbas na matunong et singa liwawa na kabuasan ya onliliwawa lan onliliwawa anggad kagkaagewan la.” No panon ya no onsisinag so agew et kalkalnan nanengneng so itsura na dalin, say pakatalos ed katuaan na Biblia et kalkalna met ya ipapalinew na Dios, diad dugan panaon. (1Pe 1:10-12) Singa imbaga la na Biblia, mas papepelesen to iya legan na “panaon na anggaan.”​—Daniel 12:4.

 Agkami nepeg ya nabigla odino manpaga ed sarayan pananguman ed pakatalos mi. Saray mandadayew ed Dios nensaman et alingo met ed saray iisipen da tan ed iilaloan da kanian kailangan dan umanen so pakatalos da.

•   Kinmiwas lay Moises pian iliktar so nasyon na Israel 40 taon antis ni na panaon ya iliktar na Dios so totoo To.​—Gawa 7:23-25, 30, 35.

•   Ag-atalosan na saray apostol so propesiya ya ompatey tan nabilay lamet so Mesias.​—Isaias 53:​8-​12; Mateo 16:21-​23.

•   Arum ya Kristiano nensaman et aliway pakatalos da no kapigan onsabi so “agew nen Jehova.”​—2 Tesalonica 2:​1, 2.

 Impetek lanlamang na Dios so pakatalos da, tan ipipikasi min ontan met so gawaen to ed sikami.​—Santiago 1:5.