Kaslakan et simpli labat so seremonya ed bansal na saray Tasi nen Jehova, tan walay antikey ya paliwawa a base ed Biblia. Kayari na seremonya, walay nagawan panliliket, odino reception, ya nayarin kaiba ed satan so panangan. a Inmatendi si Jesus ed ontan ya okasyon ed syudad na Cana diad kagapo na ministeryo to.​—Juan 2:1-11.

•  Panon ya gagawaen so seremonya na kasal?

•  Iner so pankakasalan na saray Tasi nen Jehova?

•  Siopa ray nayarin onatendi?

•  Wala kasi tutumboken da no antoy isulong?

•  Nayari kasi mangiter na regalo iray bisita?

•  Nayari kasi man-toast ed reception?

•  Nayari kasi mangisibwag na belas odino confetti ed nobyo tan nobya?

•  Kasin walay iparaan ya naakan tan iinumen?

•  Kasin walay musika tan pansasayaw ed reception?

•  Kasin seselebraan na saray Tasi nen Jehova so anniversary na kasal?

 Say paliwawa ed kasal so sankaimportantian ya parte ed seremonya, say karukey na satan et 30 minuto tan ipaliwawa itan na sakey a ministro na saray Tasi nen Jehova. Diad satan ya maaro tan maligsan paliwawa, idanet to ed nobyo tan nobya no panon ya makatulong so Biblia ed sikara pian tuloytuloy so aroan da tan magmaliw ya maliket so ulopan da.​—Efeso 5:33.

 Diad dakel ya bansa, autorisado na gobierno iray ministro na saray Tasi nen Jehova ya mangasal. Kanian diad sampot na paliwawa ed kasal, mansipanan so nobyo tan nobya. Nayarin, isulong da met ed sakey tan sakey iray singsing da. Kayari to, say ministro ya inautorisaan na gobierno ya mangasal so mangipakabat ya say nobyo tan nobya et sanasawa la.

 Diad arum ya bansa balet, kaukolan ya diad opisina na gobierno so pakagawaan na legal ya parte na kasal. Gawaen ni iyan magano na nobyo tan nobya antis na paliwawa ed kasal. No agni nansipanan so nobyo tan nobya diad opisina na gobierno, gawaen da itan diad bandad sampot na paliwawa. No asumpal la ran nansipanan, nayarin uliten da itan, balet diad past tense ya paraan. Kayari na paliwawa, walay pikakasi ya kerewen ed Dios ya bendisyonan to so balon kasal.

 Labay na dakel ya Tasi ya diad Kingdom Hall so pakagawaan na seremonya na kasal no posible itan. b Balet no walay reception na balon kasal, gagawaen da itan ed arum ya pasen.

 No nagawa so kasal diad Kingdom Hall, maslak et nayarin onatendi so anggan siopa​—balanglan Tasi odino aliwan Tasi. No walay reception na nobyo tan nobya, nayarin pilien da no siopa labat so imbitaan da.

 Anggaman anggapoy espisipikon tutumboken ya isulong ed kasal no onatendi ed Kingdom Hall, tutumboken na saray Tasi iray prinsipyo ed Biblia nipaakar ed masimpit ya panangawes pian napansiansia so respeto ed sayan importantin okasyon. Maliket ira no ontan met so gawaen na arum. (1 Timoteo 2:9) Ontan met so tutumboken dan prinsipyo nipaakar ed panangawes ed reception.

 Ibabangat na Biblia so pagmaliw ya maiter. (Salmo 37:21) Kanian maliket iray Tasi ya mangiter tan mangawat na saray regalo. (Lucas 6:38) Balet, papaliisan na saray Tasi so onkerew na regalo odino agda iyaanunsio ed publiko iray angiter na regalo. (Mateo 6:3, 4; 2 Corinto 9:7; 1 Pedro 3:8) Aliwa itan ya makasulatan tan ompan nababaingan laingen iray onatendi.

 Andi. Saray Tasi et agmanto-toast ta satan ya kagagawa et nanlapu ed saray palson bangat. c Mililiket iray Tasi ed balon kasal diad arum ya paraan.

 Andi. Diad arum ya lugar, saray bisita et mangisisibwag na belas, confetti, odino arum nin mipara ed saratan ed saray balon kasal. Papanisiaan dan mangiter iratan na suerte, liket, tan andukey a bilay ed balon sanasawa. Balet, papaliisan na saray Tasi nen Jehova iray pananisia ya akabase ed saray pamahiin. Kaiba ed saraya so pangibaga na “good luck,” lapud kontra itan ed saray prinsipyo ed Biblia.​—Isaias 65:11.

 Anggapoy itataryan naakan tan iinumen ed seremonya na kasal diad Kingdom Hall. Kaslakan ya mankasal et manpipili na arum ya lugar parad reception ya ditan so kawalaan na saray naakan tan iinumen. (Eclesiastes 9:7) No nandesisyon iran walay alak, seguroen dan dugaruga labat so nainum ya alak tan say oninum labat et saramay wala lad suston edad.​—Lucas 21:34; Roma 13:1, 13.

 No walay reception na kasal, mandesisyon so nobyo tan nobya no kasin walay musika tan sayaw. (Eclesiastes 3:4) Say pampili na musika et depende ed no antoy labay da tan ed kultura da, balet ikonsidera da no antoy epekto na satan ed saray bisita da. Say musika ed seremonya na kasal diad Kingdom Hall et akabase ed Biblia.

 Anggapo so prinsipyo ed Biblia no kasin kaukolan ya manselebra na anniversary odino andi. Kanian, saray sanasawa so mandesisyon no kasin selebraan da so anniversary na kasal da odino andi. Seselebraan na arum ya sanasawa itan ya sikaran dua labat, odino seselebraan da itan ya kaiba so pamilya tan kakaaro da.