Andi, anggapoy ontan ed Saray Tasi nen Jehova; say kimey mi et susuportaan na saray boluntaryon donasyon tan agmi ipapakabat iray mangiiter. Anto itay kakaplo tan akin ya anggapo itan ed saray Tasi nen Jehova?

 Say ganggan ya pangiter na kakaplo odino samploran porsiento na kaykayarian na sakey et kaibad Ganggan ya niiter ed bansan Israel nensaman. Balet malinew ya ibabaga na Biblia a satan ya Ganggan​—kaiba lay ‘pankolekta na kakaplo’—​et agla onaplika ed saray Kristiano.​—Hebreos 7:5, 18; Colosas 2:13, 14.

 Imbes ya mangiter na kakaukolanen ya kakaplo tan bagat, aaligen na Saray Tasi nen Jehova iray inmunan Kristiano tan susuportaan day ministeryo da diad duaran paraan: personal iran manpupulong tan manbabangat ya anggapoy sueldo tan mangiiter iray boluntaryon donasyon.

 Kanian uunoren mi ibabaga na Biblia ed saray Kristiano: “Gawaen komon na kada sakey so unong ed ginetma to ed puso to, ya aliwan ambelat ed liknaan to odino lapud napapasootan, ta aaroen na Dios so maliket a mangiiter.”​—2 Corinto 9:7.