On, ontutulong iray Tasi nen Jehova no wala ray kalamidad. Mangiiter kami praktikal a tulong ed saray Tasi tan aliwan Tasi, ta uunoren mi so ibabaga na Biblia diad Galacia 6:10: “Manggawa itayo na maabig ed amin, balet nagkalalo la ed saramay kapananisiaan tayo.” Ontutulong kami met ed emosyonal tan espiritual a paraan ta kakkaukolan itan na saray biktima na kalamidad.​—2 Corinto 1:3, 4.

 Kayari na kalamidad, kokontaken na saray elder na apektado iran kongregasyon so amin ya membro na kongregasyon da pian komustaen no antoy situasyon da tan no anto ray kaukolan dan tulong. Insan ireport na saray elder so survey tan tulong ya ginawa ra diad branch office na Saray Tasi nen Jehova ed bansa ra.

 No agnasarag ya iter na saray apektadon kongregasyon so kaukolan ya tulong, say Mananguley ya Ulop na Saray Tasi nen Jehova so mangasikaso ed satan. Pareho iya ed impangasikaso na saray inmuunan Kristiano ed sakey tan sakey nen walay eras ya agawa. (1 Corinto 16:1-4) Mangi-assign so branch office na saray Disaster Relief Committee ya man-organisa tan manasikaso ed itulong ed saray biktima. Saray Tasi ed arum a lugar et manboboluntaryo met ya ontulong tan mangiiter ira na donasyon.​—Uliran 17:17.

 Say sakey ya panguusaran ed donasyon ya ipapawit ed branch office na Saray Tasi nen Jehova et diad itulong ed saray biktima na kalamidad. (Gawa 11:27-30; 2 Corinto 8:13-15) Lapud agbabayaran iray boluntaryon ontutulong, say pundo et talagan nauusar ed pangiter na pankaukolan na saray biktima, aliwan pian ipasueldo ed totoon nan-organisa. Maalwar min uusaren so amin a donasyon.​—2 Corinto 8:20.