Uusaren mi ray donasyon pian suportaan so relihyoson kimey na organisasyon mi tan pian natulongan so arum. Gagawaen mi irayan kimey bilang kabiangan na manunan gagala mi​—pian tulongan iray totoo ya magmaliw ya disipulo nen Kristo Jesus.​—Mateo 28:19, 20.

 Agmin balot uusaren so donasyon pian payamanen so sakey a too. Agmi susueldoan iray elder odino ministro mi, tan agbabayaran iray Tasi nen Jehova ed pampupulong da. Saramay manlilingkor ed saray branch office tan ed world headquarters mi, kaiba la ray membro na Mananguley ya Ulop, et agmet susueldoan.

•   Panag-publish: Mangipapatalos, mangiimprinta, mangipapawit, tan mangibubunog kami na minilyon ya Biblia tan arum nin Kristianon publikasyon kada taon, amin et libre. Ontan met, say website mi ya jw.org tan say app ya JW Library ya ditan na-access iray publikasyon mi et libre tan anggapo ray advertisement ed saratan.

•   Panagpaalagey tan Panagmintina: Mangipapaalagey tan manmimintina kami na saray pasen parad panagdayew mi diad interon mundo ya uusaren parad pantitipon na saray kongregasyon mi tan diad panagdayew ed Dios. Mangipapaalagey kami met na saray branch office tan translation office. Maslak ed saray mankikimey et boluntaryo, kanian makakatipid kami ed panagpaalagey tan panagmintina.

•   Panangorganisa: Saray gagawaen ed world headquarters, saray branch office, tan ed saray translation office mi, ontan met ed kimey na saray ombiabiahen ministro, et susuportaan panamegley na saray donasyon parad sankamundoan a kimey mi.

•   Panagpulong: Agbabayaran iray Tasi ed pampupulong da na maong a balita odino diad pangibabangat da ed arum nipaakar ed “salita na Dios.” (2 Corinto 2:17) Balet, singa met ed ginawa na saray Kristiano nen inmunan siglo, saray apili tan impasal ya ministro ya dakel so panaon ya uusaren da ed panagpulong et tataryaan na simplin ayaman tan susuportaan ed saray manunan pankaukolan da.​—Filipos 4:16, 17; 1 Timoteo 5:17, 18.

•   Panagbangat: Saray asemblea tan kombension mi et susuportaan panamegley na saray donasyon. Ontan met, mamapawala kami na saray nibase ed Biblia iran audio tan video ya programa. Wala ray eskuelaan mi ya ditan ipapasal iray elder tan full-time ya ministro pian magmaliw iran mas epektibo ed asainmin da.

•   Itutulong ed Saray Biktima na Kalamidad: Mangitatarya kami na naakan, danum, tan panayaman na saramay biktima na natural iran kalamidad tan arum nin trahedya. Diad sarayan itutulong mi, aliwan saray “kapananisiaan” mi labat so nagugunggonaan noagta ontan met ed saray aliwan Tasi.​—Galacia 6:10.