Say ipipila mi labat ed bilang na Saray Tasi nen Jehova et saramay binulan ya aktibon mangipupulong ed maong a balita na Panarian na Dios. (Mateo 24:14) Kaibad saya iray abautismoan ya Tasi tan saray agni abautismoan pero kualipikado lan manpulong.

 Andi. Ag-akadepende ed pandonasyon so pagmaliw ya Tasi. Agmet akadepende ed donasyon so pakaawat na responsabilidad o pribilehyo ed organisasyon mi. (Gawa 8:18-20) Diad tua, maslak ya mandodonasyon et agda ipapakabat so sarili da. Kada Tasi et idodonasyon toy panaon, biskeg, tan kaykayarian to parad sankamundoan a kimey mi depende ed panlabayan tan kipapasen to.​—2 Corinto 9:7.

 Kada bulan, irereport na saray Tasi diad kongregasyon da so impanpulong da. Boluntaryo dan gagawaen so panagreport.

 Saray report na kongregasyon et titiponen, tan saray total et ipapawit ed branch office ed bansa ra. Insan ipapawit na branch iray total na kada bansa o teritoryan walad sakop da diad world headquarters mi.

 Kasumpal na kada serbisyon taon, a bibilangen so sankarakelan ya bilang na Saray Tasi ed kada bansa legan na satan a taon. Paniibaen irayan bilang pian naamtaan no pigaray Tasi ed interon mundo. Saray detalyadon report ed kada bansa, kaiba la ray eksperiensya ed panagpulong, et nanengneng ed seksion ya “Diad Interon Mundo.” Napapabiskeg kami ed sarayan report, a singa alikna na saray inmunan Kristiano nensaman nen akaawat iray singa onia ran report.​—Gawa 2:41; 4:4; 15:3.

 Anggano agmi ra ipipilad bilang na Saray Tasi, aawaten mi ra ed saray kongregasyon mi. Maslak ed sikara et onaatendi ed tinaon ya Memoryal na impatey nen Kristo, kanian naala so bilang da no ibawas so bilang na Saray Tasi ed bilang na inmatendi ed Memoryal. Nen 2023, walay 20,461,767 ya inmatendi ed Memoryal.

 Wala ra met so nagugunggonaan ed iyoopresi min libren panag-aral na Biblia ya ag-onaatendi ed saray pantitipon mi. Nen 2023, walay 7,281,212 ya average a bilang na inyaralan mi na Biblia kada bulan, tan say arum ed saratan et grupo na pigaran indibidual ya saniiban manaaral.

 Maslak et ibabase na saray sensus na gobierno so bilang da diad pantepet dad saray totoo no anton grupo na relihyon so kawalaan da. Singa bilang, imbaga na U.S. Census Bureau ya say gagala na saray survey da et pian “amtaen no kasin saray tetepetan da et ipapasen day sarili da ya membro na sakey a relihyon,” tan imbaga da met ya say naala dan bilang et depende ed opinyon na saray tinepetan da, aliwan no antoy tua. Balet diad sikami, say ibibilang mi labat ya Tasi nen Jehova et saramay manpupulong tan manrereport ed agawaan da, aliwan saramay basta da labat ibabaga ya Tasi ira.