Diad Biblia, say Griegon salita ya ipapatalos no maminsan ya “simbaan” et ontutukoy ed grupo na managdayew, aliwan say bilding ya pantitiponan da.

 Nengnengen iyan alimbawa: Nen nansulat si Pablo ed saray Kristiano ed Roma, nampakomusta ed sanasawan Aquila tan Priscila, tan oniay inyarum to: “Komustam so simbaan ya mantitipon ed abung da.” (Roma 16:5, Contemporary English Version) Aliwan say bilding so papakomustaan nen Pablo, noagta saray totoo​—say kongregasyon ya mantitipon ed abung da. a

 Kanian imbes ya simbaan so tawag mid pantitiponan o panaaralan mi, uusaren mi so terminon “Kingdom Hall.”

 Duga iyan termino lapud sarayan rason:

•   Say bilding et sakey ya hall, odino pantitiponan.

•   Mantitipon kami pian dayewen si Jehova, say ibabaga na Biblia ya Dios, tan pian mantasi o mantestigo parad sikato.​—Salmo 83:18; Isaias 43:12.

•   Mantitipon kami met pian aralen so Panarian na Dios, amay mabetbet ya ibabaga nen Jesus.​—⁠Mateo 6:9, 10; 24:14; Lucas 4:43.

 Welcome ka ya ombisitad Kingdom Hall ya asingger ed sikayo tan obserbaan mon mismo no panon ya manaaral iray Tasi nen Jehova.