Nen 2016, awalaan na pribilehyo iray Tasi nen Jehova ya ipaliwawa so baleg ya nitutulong na saray video tan artikulo ya walad jw.org ed sakey a grupo na saray managbangat diad Probinsya na Zamboanga del Norte, diad Pilipinas. Linma nin unona iray Tasi nen Jehova ed Department of Education diad Dipolog City, say capital na satan ya probinsya. Pandinayewan na saray administrator so jw.org kanian inimbitaan da iray Tasi pian mangiter na 30-minuton presentasyon diad nagawan taloran seminar na saray maestro tan maestra manlapud pigaran munisipalidad na Zamboanga del Norte.

Impanengneng na saray Tasi iray pigaran video tan artikulo ed website diad manga 300 ya maestro tan maestra ya inmatendi ed saratan ya seminar. Agusgustoan na saray inmatendi imay topic ya “Kung Paano Haharapin ang Pagkakautang.” Dakel ya maestro tan maestra so angibaga ya aliwan saray estudyante labat so natulongan ed samay presentasyon noagta pati sikara met. Amin da et inawat day tract ya Iner Naamtaay Ebat ed Importante Iran Tepet? ya mangipapaliwawa ya dakdakel so makapainteres tan makatulong ya impormasyon diad jw.org. Say arum ya managbangat et nan-download na saray video ed website.

Maaligwas ya asumpal so taloran presentasyon, inyuksoy ni ingen na Department of Education diad satan ya probinsya so kaaruman ya presentasyon pian natulongan met so manga 600 iran guidance counselor tan arum nin managbangat. Dakel lamet so impapuson akisalamat ed saray Tasi.

Impaliwawa na arum ed saray inmatendi no panon iran atulongan na saray presentasyon tan say website tayo. “Misalsalamat ak ya maong,” so imbaga na sakey ya maestra. “Mausa-usar so website no ibabangat ko ray estudyantek.” Oniay inamin met na sakey nin maestra: “Dakel so nanaaralan ko, lalo la no panon kon nasarag so stress. Baleg so nitutulong na sayan website, aliwa labat ya diad saray kabataan noagta pati met ed saray matatken.”

Say masulok ya 350 ya managbangat ya inmatendi ed presentasyon et kinmerew na kaaruman nin impormasyon. Kanian angiter iray Tasi na kaaruman nin literatura tan anginabang ira na praktikal ya simbawa manlapud Biblia ed amin ya malabay.

Malikeliket iray Tasi nen Jehova ta masulok ya 1,000 ya managbangat so inmatendi ed presentasyon nipaakar ed jw.org diad Zamboanga del Norte tan atalosan da ya say website ya jw.org et baleg so nitulong to ed panagbangat da. Sayan website et mausa-usar ed saray managbangat diad interon mundo ta wadtan iray dakdakel ya impormasyon nipaakar ed moral tan espiritual ya panangigiya. a