Na Nos Rumannan Stima,

Pa algun aña caba hopi idioma rond mundo tabatin den nan edicion publico di E Toren di Vigilancia un serie di articulo titula “Imita Nan Fe.” E proposito di e articulonan aki tabata pa haci e personahenan di e relatonan di Bijbel mas bibo pa nos den e tempo moderno aki. Esaki ta yuda nos haya un idea kico e homber- y muhernan di e tempo ey a pasa aden pa demostra nan fe ora nan a enfrenta cierto reto y situacion dificil. Kico tabata e reaccion riba e serie di articulo aki?

Despues cu un lector a lesa e articulo tocante Marta, el a skirbi: “Mi a hari hopi ora mi a les’e, pasobra mi ta mescos cu Marta! Semper mi kier trata mi invitadonan lo mihor posibel, pero tin biaha mi ta lubida cu mi mester para keto un rato y disfruta di nan compania.” Un mucha muher teenager a saca e conclusion interesante aki for di e relato di Ester: “Mi a reconoce e sintimento di ta obsesiona cu bistimento y ultimo moda. Ta berdad cu nos mester ta bon bisti y bon aregla, pero nos no mester exagera si.” Y el a agrega: “Pa Jehova, loke ta conta ta e persona cu nos ta di paden.” Relaciona cu e articulo tocante apostel Pedro, un ruman muher a skirbi entusiasma: “Mi a biba cu e relato. E tabata asina real! Mi a uza tur mi sentidonan pa sinti loke no tabata aparece directamente den e pasashinan di Bijbel.”

Masha hopi lector a expresa nan aprecio pa e serie. Nan cartanan ta confirma e palabranan di apostel Pablo: “Tur loke a ser skirbi anteriormente a ser skirbi pa nos instruccion.” (Rom. 15:4) Pues, Jehova a inclui e relatonan aki den Bijbel pa siña nos lesnan valioso. No ta importa cuanto aña nos conoce e berdad; nos tur por siña for di nan.

E articulonan aki no tabata disponibel na papiamento. Pesey pa nos ta un placer di por comparti nan cu boso awor den e publicacion aki. Nos kier anima boso pa lesa e buki aki mas pronto posibel. Inclui e buki aki den boso programa di Adoracion Como Famia; boso yiunan lo bay gust’e un mundo. No perde niun siman ora ta analisa e informacion durante e Estudio di Bijbel di Congregacion. Tuma boso tempo pa les’e cu atencion; disfruta di dje. Uza boso imaginacion; uza tur boso sentidonan. Purba di sinti loke e personahenan ey a sinti y di mira loke nan a mira. Compara e manera cu nan a reacciona den cierto situacion cu e manera cu boso lo a reacciona.

Nos ta spera cu e publicacion aki lo ta un bendicion pa boso y boso famia. Nos ta stima boso y ta desea boso tur cos bon,

Cuerpo Gobernante di Testigonan di Jehova