1. Dicon henter Silo tabata yora?

SAMUEL por a sinti e tristeza cu tabata reina na Silo. Henter e stad tabata yora. Riba un solo dia, Israel a perde 30.000 soldaat den un derota teribel na man di e Filisteonan. Y esaki a tuma luga algun dia despues cu nan a perde 4.000 soldaat den un otro bataya. Un cantidad incontabel di hende muher y mucha tabata yora morto di nan sernan keri; nan tata, esposo, ruman y yiu homber lo no bolbe cas mas.—1 Sam. 4:1, 2, 10.

2, 3. Ki serie di suceso tragico a trece berguensa riba Silo y pone e stad perde su gloria?

² E tragedia aki tabata apenas uno mas den un serie di suceso tragico. Tur cos a cuminsa ora cu Ofni cu Finees, e dos yiu hombernan malbado di Sumo Sacerdote Eli, a sali for di Silo cu e arca di pacto y a bay cu ne na e campo di bataya. E Arca tabata un caha precioso cu a simbolisa Dios su presencia. Normalmente nan tabatin e Arca den e Santisimo di e tabernakel, un tent cu a sirbi como tempel. E Israelitanan a kere cu si nan tabatin e Arca hunto cu nan, esey lo a sirbi como un talisman y duna nan victoria. Esta bobo di nan parti! E Filisteonan a vence e Israelitanan, captura e Arca y mata Ofni cu Finees.—1 Sam. 4:3-11.

³ Pa siglonan, e Arca tabata den e tabernakel na Silo. Esta un gran honor esey tabata! Pero awor e no tabat’ey mas. Ora Eli, kende tabatin 98 aña, a tende e noticia ey, el a cay di lomba for di su stoel y muri. Su nuera, cu riba e dia ey a bira viuda, a muri durante parto. E ultimo palabranan di e nuera tabata: “E gloria a bay for di Israel.” Sin e arca di pacto, Silo nunca mas lo tabata mescos.—1 Sam. 4:12-22.

4. Kico nos ta bay analisa den e capitulo aki?

⁴ Tur esaki lo mester tabata golpinan duro pa Samuel. Con el a trata cu e decepcionnan aki? Su fe tabata suficiente fuerte pa yuda un pueblo cu a perde Jehova su proteccion y aprobacion? Nos tur awe por haya nos cu decepcion y golpi di bida cu ta pone nos fe na prueba. Pues laga nos wak kico mas nos por siña for di e ehempel di Samuel.

5, 6. Riba kico e relato di Bijbel a enfoca pa un periodo di 20 aña, y kico Samuel a haci durante e tempo ey?

⁵ Na e punto aki, Bijbel ta kita atencion for di Samuel y bay enfoca riba kico a pasa cu e Arca sagrado. E relato ta conta nos con e Filisteonan a sufri pasobra nan a bay cu e Arca, y con nan a haya nan obliga di mand’e bek. Ora Bijbel bolbe dirigi atencion na Samuel, mas o menos 20 aña a pasa. (1 Sam. 7:2) Kico el a haci tur e tempo ey? Wel, Bijbel ta bisa nos.

⁶ Nos ta lesa cu prome cu e periodo di 20 aña aki a cuminsa, “e palabra di Samuel a yega na henter Israel”, loke ta indica cu e tabata instrui e pueblo. (1 Sam. 4:1) Despues di e periodo ey, el a sigui haci mescos, pasobra nos ta lesa mas despues cu tur aña Samuel tabatin custumber di pasa bishita tres stad di Israel pa atende desacuerdo y resolve problema di e habitantenan. Despues e tabata bay bek Rama, caminda e tabata biba. (1 Sam. 7:15-17) Ta bisto anto cu Samuel semper tabata ocupa, y durante e 20 añanan ey, e tabatin hopi cos di haci.

7, 8. (a) Ki mensahe Samuel a duna e pueblo despues di a traha 20 aña pa yuda nan? (b) Con e pueblo a reacciona riba e garantia cu Samuel a duna nan?

⁷ E comportacion inmoral y corupto di e yiunan di Eli a debilita e fe di e pueblo. Como resultado, gran parti di e hendenan a bay adora dios falso. Despues di a pasa 20 aña trahando duro pa yuda e Israelitanan spiritualmente, Samuel a bisa nan: “Si boso bolbe cerca SEÑOR cu henter boso curason, kita e diosnan stranhero y e Astarot for di meymey di boso y dirigi boso curason na SEÑOR y sirbi e so, e lo libra boso for di man di e Filisteonan.”—1 Sam. 7:3.

⁸ E “man di e Filisteonan” tabata oprimi e hendenan sin piedad. Como cu e ehercito di Israel tabata casi completamente destrosa, e Filisteonan a pensa cu nan lo por a maltrata e pueblo di Dios sin haya castigo. Pero Samuel a garantisa e Israelitanan cu e situacion ey lo a cambia si nan a bolbe cerca Jehova. Nan lo tabata dispuesto pa haci esey? Si! Nan a deshaci di nan diosnan falso y a cuminsa ‘sirbi Jehova so.’ Samuel sin duda a keda hopi contento, y el a manda yama henter e pueblo pa reuni na Mizpa, un stad den e region montañoso panort di Jerusalem. Eynan e hendenan  a yuna y mustra Jehova cu nan a arepenti di tur nan actonan di idolatria.—Lesa 1 Samuel 7:4-6.

9. E Filisteonan kier a probecha di ki oportunidad, y con e pueblo di Dios a reacciona?

⁹ Pero e Filisteonan a tende di e reunion grandi aki, y nan a mir’e como un bon chens pa lansa un atake. Pues, nan a manda nan ehercito Mizpa pa caba cu e pueblo di Jehova. Ora e Israelitanan a tende di e peliger cu tabata menasa nan, nan a keda morto spanta y a pidi Samuel roga Jehova pa nan. El a bay di acuerdo, y hunto cu su oracion el a ofrece un sacrificio. Durante e ceremonia sagrado ey, e ehercito Filisteo a ataca Mizpa. Jehova a contesta e oracion di Samuel y, na moda di bisa, a expresa su indignacion: El a laga strena zona hopi duro mes riba cabes di e Filisteonan, locual a causa un gran confusion den nan.—1 Sam. 7:7-10.

10, 11. (a) Dicon e strena cu Jehova a laga zona riba e ehercito Filisteo mester tabata algo extraordinario? (b) Con e bataya cu a cuminsa na Mizpa a termina?

¹⁰ E Filisteonan ey tabata guereronan balente y experencia den bataya. Nan no tabata mucha chikito cu ta core bay sconde cerca nan mama ora nan tende strena zona. Pero toch nan a huy bay. Pues, e zonido di strena aki lo mester tabata algo cu nunca nan a yega di tende. Dicon nan a spanta asina tanto? Acaso tabata e zonido “duro”? Ta inespera e strena a zona meymey di un cielo blauw, of e strena a keda resona hopi duro den e seronan? En todo caso, nan a keda tur confundi y morto spanta; en bes di ataca, nan mes a bira e blanco di atake. E hombernan di Israel a sali for di Mizpa, persigui e Filisteonan pa basta kilometer y derota nan na un luga zuidwest di Jerusalem.—1 Sam. 7:11.

¹¹ E bataya ey a marca un cambio den e historia di Israel. Durante e resto di e dianan cu Samuel a sirbi como hues, e Filisteonan a keda retira nan mes, y e pueblo di Dios a recupera poder riba un stad tras di otro.—1 Sam. 7:13, 14.

12. Den ki sentido Samuel a “haci loke tabata husto”, y cua ta e cualidadnan cu a yud’e logra esey?

¹² Siglonan despues, apostel Pablo a menciona Samuel entre e huesnan y profetanan cu a “haci loke tabata husto.” (Heb. 11:32, 33) Samuel a haci loke tabata bon y husto den bista di Dios y a yuda otro hende haci mescos. El a logra esey pasobra, a pesar di  decepcion, el a sigui haci su trabou fielmente mientras cu el a spera cu pasenshi riba Jehova pa drecha e situacion. Ademas, Samuel a demostra di ta un hende hopi agradecido. Despues di e victoria na Mizpa, el a laga traha un monumento pa conmemora e manera cu Jehova a proteha su pueblo.—1 Sam. 7:12.

13. (a) Cua ta e cualidadnan cu nos tin mester si nos kier imita Samuel? (b) Ki ora bo ta pensa ta bon pa cuminsa cultiva e cualidadnan ey?

¹³ Abo tambe kier ‘haci loke ta husto’ den bista di Jehova? Si ta asina, imita Samuel su pasenshi, su humildad y su actitud agradecido. (Lesa 1 Pedro 5:6.) Cua di nos no tin mester di e cualidadnan ey? Ta bon cu Samuel a cultiva e cualidadnan ey na un edad relativamente jong, pasobra den su biehes el a enfrenta decepcionnan mucho mas grandi, manera nos ta bay mira awor.

14, 15. (a) Samuel a hay’e cu ki decepcion grandi ora el a “bira bieu”? (b) Samuel a neglisha su debernan como tata manera Eli a haci? Splica esey.

¹⁴ E siguiente biaha cu Bijbel ta menciona Samuel, ya el a “bira bieu” y tabatin mester di yudansa cu e trabou di husga e pueblo. Pues, el a nombra su dos yiu hombernan adulto, Joel y Abdias, pa sirbi como hues. Pero lamentablemente, nan a laga su  cara na berguensa. Samuel tabata husto y honesto, pero su yiu hombernan no a sigui su ehempel. Al contrario, nan a uza nan posicion pa nan mes probecho y a comete inhusticia y acepta soborno.—1 Sam. 8:1-3.

¹⁵ Un dia, e ancianonan di Israel a bin keha lo siguiente cerca e profeta di edad: “Bo yiunan no ta cana den bo camindanan.” (1 Sam. 8:4, 5) Samuel tabata sa di e problema? Bijbel no ta bisa. Pero contrario na Eli, Samuel si no a neglisha su debernan como tata. Jehova a scual y castiga Eli pasobra e no a corigi su yiunan ora nan a haci malo y pasobra el a honra nan mas cu el a honra Dios. (1 Sam. 2:27-29) Pero Jehova no a constata esey cerca Samuel.

16. Ki dolor mayornan cu tin yiu rebelde ta sinti, y con e ehempel di Samuel por duna nan consuelo y guia?

¹⁶ E relato no ta bisa con Samuel a sintie ora el a haya sa di e mal comportacion di su yiunan. Pero hopi mayor por imagina nan e berguensa, e preocupacion, tristeza of decepcion cu esey ta causa. Awe, masha hopi yiu ta lanta contra e autoridad y disciplina di nan mayornan. (Lesa 2 Timoteo 3:1-5.) Abo ta sufri pa motibo di un yiu cu no ta mustra respet ni sumision? Den tal caso, e ehempel di Samuel lo por duna bo consuelo y guia. E no a laga e mal comportacion di su yiunan kit’e for di su caminda di fieldad. No lubida cu ora palabra y disciplina no ta yuda, bo fiel ehempel como mayor lo por touch e curason di bo yiu. Ademas, mescos cu Samuel, abo como mayor semper tin e oportunidad di laga bo Tata, Jehova Dios, sintie orguyoso di bo.

17. Kico e ancianonan di Israel a exigi di Samuel, y con el a reacciona?

¹⁷ E yiunan di Samuel hamas lo por a imagina nan cu nan golosidad y egoismo lo tabatin consecuencia asina grandi. Despues di a hala atencion na nan mal comportacion, e ancianonan di Israel a pidi Samuel: “Awor nombra un rey pa nos pa husga nos, manera tur otro nacion tin.” Samuel a tuma esaki como un rechaso di su persona? Con cu bay bin, pa decadanan el a husga e pueblo como representante di Jehova. Awor nan tabata kier pa un rey manda riba nan, no un simpel profeta manera Samuel. Tur e nacionnan rond di nan tabatin rey, y e Israelitanan tambe tabata kier un rey! Con Samuel a reacciona? Nos ta lesa cu “esaki tabata desagradabel den bista di Samuel.”—1 Sam. 8:5, 6.

18. Con Jehova a consola Samuel y alabes revela e gravedad di e pica di Israel?

¹⁸ Samuel a presenta e asunto den oracion na Jehova. Wak con Jehova a reacciona: “Scucha bos di e pueblo den tur loke nan ta  bisa bo, pasobra no ta abo nan a rechasa, sino ta ami nan a rechasa di ta Rey riba nan.” Esey tabata un gran consuelo pa Samuel. Pero esta un gran insulto contra e Dios Todopoderoso! Jehova a bisa su profeta pa spierta e Israelitanan cu si nan tin un hende como rey, esey lo sali nan caro. Pero nan a keda insisti: “No, toch mester tin un rey riba nos.” Wel, Jehova a scoge un rey pa nan y a manda Samuel bay ungie, y manera semper, Samuel a obedec’e.—1 Sam. 8:7-19.

19, 20. (a) Cu ki actitud Samuel a obedece e instruccion pa ungi Saul como rey di Israel? (b) Con Samuel a sigui yuda e pueblo di Jehova?

¹⁹ Pero cu ki actitud Samuel a obedece Dios? Di mala gana y djis pa formalidad? El a laga decepcion venena su curason y a bira amarga? Hopi hende lo a reacciona asina, pero Samuel si no. El a ungi Saul y a reconoce cu ta Dios a scog’e. El a hasta duna Saul un sunchi pa yam’e bonbini y pa mustra su sumision na dje como e Rey nobo. Ademas, el a bisa e pueblo: “Boso ta mira esun cu SEÑOR a scoge? Siguramente no tin ningun hende manera e den henter e pueblo.”—1 Sam. 10:1, 24.

²⁰ Samuel semper a mantene un actitud positivo. En bes di concentra riba e debilidadnan di e homber cu Jehova a scoge, el a wak su bon cualidadnan. Y en bes di depende riba e aprobacion di un pueblo indeciso, el a concentra riba mantene su integridad na Dios. (1 Sam. 12:1-4) Ademas, el a sigui cumpli fielmente cu su asignacion: El a spierta e pueblo di Dios pa e peligernan spiritual cu nan tabata enfrenta y a anima nan pa no bira lomba pa Jehova. Su conseho a conmove nan asina tanto cu nan a roga Samuel pa resa pa nan. El a duna nan e bunita contesta aki: “Leu sea di mi di peca contra SEÑOR door di stop di haci oracion pa boso; ma lo mi instrui boso den e caminda bon y recto.”—1 Sam. 12:21-24.

21. Con e ehempel di Samuel por yuda nos si un dia nos keda decepciona pasobra un otro ruman a haya un privilegio?

²¹ Bo a yega di sinti bo decepciona pasobra nan a duna un otro ruman un puesto of privilegio cu abo a spera di haya? E ehempel di Samuel ta un bon recordatorio pa hamas nos laga jaloersheid, envidia of rencor saca raiz den nos curason. (Lesa Proverbionan 14:30.) No lubida cu Dios tin suficiente trabou cu por duna cada un di su sirbidornan gran satisfaccion.

22. Cua tabata algun bon cualidad cu Saul tabatin na principio?

²² Saul en berdad tabatin bon cualidad; e tabata un homber remarcabel. E tabata halto y di apariencia impresionante. Tambe e tabata un persona cu curashi y hopi ingenioso, y na principio e tabata humilde. (1 Sam. 10:22, 23, 27) Banda di e bon cualidadnan ey, e tabatin un don precioso mas: boluntad liber, es decir, e capacidad di scoge su mes rumbo den bida y tuma su propio decisionnan. (Deu. 30:19) El a haci bon uzo di e don ey?

23. Cua ta e prome bon cualidad cu Saul a perde, y con el a demostra cu e tabata bira mas y mas arogante?

²³ Lamentablemente, hopi biaha ora un hende haya gloria y poder, e prome cualidad cu e ta perde ta modestia. No a tarda mucho cu Saul a bira arogante. El a scoge pa no obedece e ordonan di Jehova cu e tabata haya via Samuel. Un biaha, Saul a cansa di warda y a ofrece un sacrificio cu Samuel tabata bay ofrece. Samuel a scual e y a profetisa cu e reinado lo no a keda den e famia di Saul. En bes di siña un les for di e disciplina, Saul a comete picanan mas grave di desobediencia.—1 Sam. 13:8, 9, 13, 14.

24. (a) Con Saul a desobedece Jehova den e guera contra Amalek? (b) Con Saul a reacciona riba e disciplina, y kico tabata Jehova su decision?

²⁴ Via Samuel, Jehova a duna Saul ordo pa bringa contra Amalek. E mester a destrui tur nan propiedadnan y ehecuta nan Rey malbado, Agag. Pero Saul a spaar e bida di Agag y lo mihor di e botin. Ora Samuel a bin corigi Saul, e por a mira cuanto Saul a cambia. En bes di acepta e disciplina cu humildad, el a pusta boca cu e profeta; el a bin cu excuus pa hustifica su mes y a trata di minimisa su fout. El a hasta tira culpa riba e pueblo! Un di e excuusnan tabata cu el a tuma parti di e botin pa ofrec’e como sacrificio na Jehova. Samuel a contest’e cu e palabranan bon conoci: “Mira, obedece ta mihor cu sacrificio.” Cu curashi, Samuel a scual e Rey y a inform’e di Jehova su decision: Lo e kita e reino for di Saul y dun’e na un otro homber, uno mihor cu ne. *—1 Sam. 15:1-33.

25, 26. (a) Dicon Samuel a yora Saul, y con Jehova a corigie na un manera suave? (b) Ki les Samuel a siña ora el a bay e cas di Isai?

 ²⁵ Samuel a keda hopi tristo pa e fayonan cu Saul a comete. El a pasa henter un anochi ta sclama na Jehova tocante esey, y mas despues el a keda yora Saul. Samuel a mira asina tanto potencial den Saul, asina tanto bon cualidad, y awor el a keda tur desilusiona. E homber cu e tabata conoce a cambia; el a perde su mihor cualidadnan y a bira contra Jehova. Samuel no kier a ni mir’e mas. Pero cu tempo, Jehova a corigi Samuel na un manera suave, bisando: “Te ki dia bo ta keda yora Saul, siendo cu mi a rechas’e como Rey riba Israel? Yena bo cacho cu zeta y bay; lo mi manda bo cerca Isai e Betlehemita, pasobra mi a scoge un rey pa mi mes for di su yiu hombernan.”—1 Sam. 15:34, 35; 16:1.

²⁶ Pa Jehova cumpli cu su boluntad, e no ta depende di hende imperfecto cu por ta leal awe y desleal mañan. Si un hende cu el a scoge bira infiel, e ta busca un otro pa cumpli cu Su boluntad. Pues, Samuel a stop di yora Saul. Riba ordo di Jehova, el a bay na cas di Isai na Betlehem pa ungi e rey nobo. Eynan el a cera conoci cu varios yiu impresionante di Isai. Pero for di e prome yiu, Jehova a spierta Samuel pa wak mas leu cu djis nan apariencia. (Lesa 1 Samuel 16:7.) Por ultimo, Samuel a cera conoci cu esun mas jong, David, y e tabata esun cu Jehova a scoge.

27. (a) Kico a yuda Samuel su fe bira mas fuerte? (b) Kico ta loke mas bo ta aprecia di e ehempel di Samuel?

²⁷ Durante Samuel su ultimo añanan di bida, e por a mira bon cla cu Jehova su decision di pone David na luga di Saul tabata corecto. Saul a bira un apostata domina pa jaloersheid y odio asesino. Y David, en cambio, a demostra bunita cualidadnan, manera curashi, integridad, fe y lealtad. Samuel tabata yegando na fin di su bida, pero su fe a sigui bira mas fuerte. El a mira cu Jehova por yuda nos recupera di cualkier desilusion y supera nos dificultadnan, y cu e por transforma cualkier decepcion of golpi di bida den un bendicion. Finalmente, Samuel a muri cu casi 100 aña. E tabatin un bida remarcabel y a laga atras un registro ireprochabel di sirbishi fiel na Jehova. No ta nada straño cu henter Israel a yora su morto! Sirbidornan di Jehova awe ta haci bon di puntra nan mes: ‘Mi ta imita e fe di Samuel?’