CRISTIANNAN a haya e mandamento pa conmemora e morto di Cristo. E Memorial aki ta ser yama tambe “e Cena di Señor.” (1 Corintionan 11:20) Kico ta hacie asina importante? Ki tempo y con mester conmemor’e?

Hesucristo a institui e conmemoracion aki riba e anochi di e Pasco Hudiu na aña 33 di nos era. E Hudiunan tawata celebra e Pasco un biaha pa aña so, riba e di 14 dia di e luna Hudiu nisan. Pa calcula e fecha, nan evidentemente tawata warda pa e dia den lente (yama equinox) ora cu tin aproximadamente 12 ora di lus di dia y 12 ora di scuridad. E prome luna nobo cu nan por a mira mas serca di e dia aki a marca principio di e luna di nisan. Pasco tawata despues di 14 dia, y a cuminsa despues cu solo baha.

Hesus a celebra e Pasco hunto cu su apostelnan, caba el a manda Hudas Iscariot bai, pa despues e institui e Cena di Señor. E cena aki a remplasa e Pasco Hudiu y pesei mester conmemor’e un biaha pa aña so.

E Evangelio di Mateo ta informa: “Hesus a cohe pan, y despues di a bendicion’e, el a kibr’e y a duna su disipelnan y a bisa: ‘Tuma, come; esaki ta mi curpa.’ Y despues cu el a cohe un copa y a duna gradicimento,  el a duna nan esei, bisando: ‘Boso tur bebe for di dje; pasobra esaki ta mi sanger di e aliansa, cu ta wordo drama pa hopi pa pordon di pica.’”—Mateo 26:26-28.

Tin hende ta kere cu Hesus a comberti e pan den su carni literal y e biña den su sanger. Sinembargo, Hesus su curpa carnal tawata intacto ainda ora cu el a ofrece e pan aki. Acaso Hesus su apostelnan di berdad a come su carni literal y bebe su sanger? No, pasobra esei lo tawata canibalismo y un violacion di e lei di Dios. (Genesis 9:3, 4; Levitico 17:10) Segun Lucas 22:20, Hesus a bisa: “E copa aki, cu a wordo drama pa boso, ta e aliansa nobo den mi sanger.” E copa literalmente a bira “e aliansa nobo”? Esei lo ta imposibel, pasobra un aliansa ta un acuerdo, no un obheto material.

Pues, tanto e pan como e biña ta simplemente simbolo. E pan ta simbolisa Cristo su curpa perfecto. Hesus a uza pan cu a sobra di e cena di Pasco. E pan ei tawata traha sin zuurdeeg of yeast. (Exodo 12:8) Bijbel ta uza zuurdeeg hopi biaha como un simbolo di pica of corupcion. Pesei e pan ta representa e curpa perfecto cu Hesus a sacrifica. E tawata sin pica.—Mateo 16:11, 12; 1 Corintionan 5:6, 7; 1 Pedro 2:22; 1 Huan 2:1, 2.

E biña cora ta representa Hesus su sanger. E sanger ei ta haci e aliansa nobo valido. Hesus a bisa cu su sanger lo ser drama pa “pordon di pica.” Di e manera ei hende por bira limpi den bista di Dios y por drenta den e aliansa nobo cu Yehova. (Hebreonan 9:14; 10:16, 17) E aliansa aki of contract, ta haci posibel pa 144.000 cristian fiel bai shelo. Den shelo nan lo sirbi como rei y sacerdote pa e bendicion di henter humanidad.—Genesis 22:18; Yeremias 31:31-33; 1 Pedro 2:9; Revelacion 5:9, 10; 14:1-3.

Ken lo mester come di e simbolonan of emblemanan aki di e Conmemoracion? Logicamente ta solamente esnan den e aliansa nobo—esta, esnan cu tin e speransa di bai shelo—mester come di e pan y bebe di e biña. Dios su spirito santo ta combence e personanan ei cu nan a ser scohi pa bira rei celestial. (Romanonan 8:16) Nan ta tambe den e aliansa cu Hesus a sera cu nan pa haya e Reino.—Lucas 22:29.

 Kico di e hendenan cu tin e speransa di biba pa semper den Paradijs riba tera? Nan ta obedece Hesus su mandamento y ta asisti na e Cena di Señor, pero nan ta bin como observado respetuoso, no como participante di e cena. Un biaha pa aña, despues cu solo baha riba 14 di nisan, Testigonan di Yehova ta conmemora e Cena di Señor. Aunke ta apenas algun mil hende rond mundo ta declara di tin e speransa celestial, e conmemoracion aki ta precioso pa tur cristian. E ta un ocasion cu tur cristian por reflexiona riba e amor sublime di Yehova Dios y Hesucristo.—Huan 3:16.