1, 2. (a) Dicon e echo cu nos a yega di tende di un hende famoso no kiermen cu realmente nos conoc’e? (b) Ki confusion tin tocante Hesus?

TIN hopi hende famoso na mundo. Tin di nan ta bon conoci den nan propio comunidad, stad of pais. Otronan ta conoci rond mundo. Sinembargo, si bo djis sa nomber di un persona famoso no kiermen cu di berdad bo conoc’e. Esei no kiermen cu bo conoce detayenan di su background y con e ta realmente como persona.

² Hende rond mundo a yega di tende algo tocante Hesucristo, maske el a biba riba tera un 2.000 aña pasa. Sinembargo, hopi hende no sa precis ta ken Hesus realmente tawata. Tin hende ta bisa cu e tawata simplemente un bon homber. Otronan ta pretende cu e no tawata nada mas cu un profeta. Tambe tin hende ta kere cu Hesus ta Dios y cu mester ador’e. Berdad mester ador’e?

3. Dicon ta importante pa abo conoce e berdad tocante Hesus?

³ Ta importante pa abo sa e berdad tocante Hesus. Dicon? Pasobra Bijbel ta bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Si, conoce e berdad tocante Yehova Dios y Hesucristo por hiba na bida eterno den un paradijs riba tera. (Huan 14:6) Ademas, Hesus a pone e mihor ehempel pa nos den con pa biba y  con pa trata otro hende. (Huan 13:34, 35) Den e prome capitulo di e buki aki, nos a considera e berdad tocante Dios. Awor laga nos analisa loke Bijbel realmente ta siña tocante Hesucristo.

4. Kico e titulonan “Mesias” y “Cristo” ta nifica?

⁴ Hopi tempo prome cu Hesus a nace, Bijbel a predeci binida di un persona cu Dios lo a manda como e Mesias of Cristo. Tanto e titulo “Mesias” (cu ta bin di un palabra Hebreo) como “Cristo” (cu ta bin di un palabra Griego) ta nifica “E Ungi.” Dios lo a ungi, es decir, nombra Esun priminti aki na un puesto special. Den capitulonan mas despues di e buki aki nos  lo siña mas tocante e papel importante cu e Mesias ta hunga den cumplimento di e promesanan di Dios. Tambe nos lo siña tocante e bendicionnan cu Hesus por trece pa nos for di awor. Pero prome cu Hesus a nace, hopi hende sin duda tawata puntra nan mes: ‘Ken lo resulta di ta e Mesias?’

5. E disipelnan di Hesus tawata plenamente combenci di kico relaciona cu ne?

⁵ Den prome siglo di nos era, e disipelnan di Hesus di Nazaret tawata plenamente combenci cu Hesus tawata e Mesias priminti. (Huan 1:41) Un di su disipelnan, un homber cu yama Simon Pedro, abiertamente a bisa Hesus: “Abo ta e Cristo.” (Mateo 16:16) Pero con e disipelnan ei—y con nos—por tin sigur cu Hesus realmente ta e Mesias priminti?

6. Cu kico nos por compara e manera cu Yehova a yuda personanan fiel identifica e Mesias?

⁶ E profetanan di Dios cu a biba prome cu Hesus, a predeci hopi detaye tocante e Mesias. E detayenan aki lo a yuda hende identific’e. Nos lo por compar’e asin’aki: Supone cu nan a pidi bo pa bai na un bushalte hopi druk of na un stacion di trein of na un aeropuerto pa busca un persona cu nunca bo a yega di topa. Lo no ta bon si un hende duna bo algun detaye di e persona? Asina tambe, pa medio di e profetanan di Bijbel, Yehova a duna un descripcion bastante detaya di loke e Mesias lo haci y loke lo e pasa aden. Cumplimento di e tantisimo profecianan aki lo a yuda personanan fiel identific’e claramente.

7. Menciona dos profecia cu a cumpli en conexion cu Hesus.

⁷ Considera djis dos ehempel. Na prome luga, mas cu 700 aña di antemano, profeta Mikeas a predeci cu Esun priminti lo a nace na Betlehem, un stad chikito den e teritorio di Huda. (Mikeas 5:2) Na unda Hesus a nace? Wel, precis den e stad ei! (Mateo 2:1, 3-9) Na di dos luga,  siglonan di antemano e profecia cu tin para skirbi na Daniel 9:25 a señala precis e aña cu e Mesias mester a aparece—aña 29 di nos era. * Cumplimento di e profecianan aki y otronan mas ta duna prueba cu Hesus tawata e Mesias priminti.

8, 9. Ki prueba cu Hesus tawata e Mesias a bira bisto na su bautismo?

⁸ Mas prueba cu Hesus tawata e Mesias a bira bisto casi na fin di aña 29. Esei ta e aña ora cu Hesus a bai serca Huan Bautista pa ser batisa den Riu Yordan. Yehova a priminti Huan cu lo e dun’e un señal pa asina e por a identifica e Mesias. Huan a mira e señal ei na Hesus su bautismo. Bijbel ta bisa cu esaki ta loke a sosode: “Despues di a wordo batisa, Hesus a sali mesora for di awa; y ata, e shelonan a wordo habri y el a mira e spirito di Dios baha manera un paloma y keda riba dje. Y ata, un bos for di e shelonan, bisando: ‘Esaki ta mi Yiu stima, den kende mi tin goso.’” (Mateo 3:16, 17) Despues di mira y tende loke a sosode, Huan no tawatin duda cu ta Dios a manda Hesus. (Huan 1:32-34) Na momento cu Dios a drama su spirito, of forsa activo, riba Hesus e dia ei, Hesus a bira e Mesias of Cristo, esun nombra pa ta Lider y Rei.—Isaias 55:4.

⁹ Cumplimento di profecia biblico y Yehova Dios su propio testimonio ta mustra bon cla cu Hesus tawata e Mesias priminti. Pero tambe Bijbel ta contesta dos otro pregunta importante tocante Hesucristo: Di unda el a bin, y ki clase di persona e tawata?

10. Kico Bijbel ta siña tocante Hesus su existencia prome cu el a bin na tera?

¹⁰ Bijbel ta siña cu Hesus tawata biba den shelo prome  cu el a bin na tera. Mikeas a profetisa cu e Mesias lo a nace na Betlehem y tambe cu Su origen tawata “for di hopi tempo pasa.” (Mikeas 5:2) Na hopi ocasion Hesus mes a bisa cu el a biba den shelo prome cu el a nace como hende. (Huan 3:13; 6:38, 62; 17:4, 5) Como criatura spiritual den shelo, Hesus tawatin un relacion special cu Yehova.

11. Con Bijbel ta mustra cu Hesus ta Yehova su Yiu mas stima?

¹¹ Hesus ta Yehova su Yiu mas stima, y cu bon motibo. E ta ser yama “e primogenito di henter creacion”, pasobra e tawata Dios su prome creacion. * (Colosensenan 1:15) Tin un cos mas cu ta haci e Yiu aki special. E ta e “Yiu unigenito.” (Huan 3:16) Esaki ta nifica cu Hesus ta e unico crea directamente door di Dios. Tambe Hesus ta e unico cu Dios a uza ora Dios a crea tur otro cos. (Colosensenan 1:16) Anto tambe Bijbel ta yama Hesus “e Palabra.” (Huan 1:14) Esaki ta laga nos compronde cu el a papia pa Dios, sin duda entregando mensahe y instruccion na e otro yiunan di e Tata, tanto e yiunan spiritual como humano.

12. Con nos por sa cu e Yiu primogenito no ta igual cu Dios?

¹² Acaso e Yiu primogenito ta igual cu Dios, manera algun hende ta kere? Esei no ta loke Bijbel ta siña. Manera nos a nota den e paragraf anterior, e Yiu a ser crea. Pues ta bisto cu e tawatin un cuminsamento, mientras cu Yehova Dios no tin cuminsamento ni fin. (Salmo 90:2) E Yiu unigenito nunca no a yega di pensa mes pa purba di ta igual cu su Tata. Bijbel ta siña bon cla cu e Tata ta mas cu e Yiu. (Huan 14:28; 1 Corintionan 11:3) Yehova so ta  “Dios Todopoderoso.” (Genesis 17:1) Pues anto, e ta sin igual. *

13. Kico Bijbel kiermen ora e ta referi na e Yiu como “e imagen di e Dios invisibel”?

¹³ Yehova y su Yiu primogenito tawatin un amistad intimo cu otro pa miles di miyones di aña, hopi prome cu creacion di e shelo yen di streya y e tera. Nan lo mester tawata stima otro masha hopi! (Huan 3:35; 14:31) E Yiu stima aki tawata mescos cu su Tata. Ta pesei Bijbel ta referi na e Yiu como “e imagen di e Dios invisibel.” (Colosensenan 1:15) Si, mescos cu un yiu humano den varios manera por parce su tata masha hopi, asina e Yiu celestial aki a refleha e cualidadnan y personalidad di su Tata.

14. Con tawata posibel pa Yehova su Yiu unigenito nace como hende?

¹⁴ Yehova su Yiu unigenito boluntariamente a bandona shelo y a bin na tera pa biba como hende. Pero kisas bo ta puntra bo mes: ‘Con por tawata posibel pa un criatura spiritual nace como hende?’ Pa logra esaki, Yehova a haci un milager. El a transferi e bida di su Yiu primogenito for di shelo te den matris di un birgen Hudiu cu tawata yama Maria. Ningun tata humano tawata envolvi den esaki. Pues Maria a duna lus na un yiu homber perfecto y a yam’e Hesus.—Lucas 1:30-35.

15. Dicon nos por bisa cu pa medio di Hesus nos ta siña conoce Yehova mihor?

¹⁵ Loke Hesus a bisa y haci tempo cu e tawata riba tera ta yuda nos siña conoc’e bon. Ademas, pa medio di Hesus nos ta siña conoce Yehova mihor. Dicon ta asina? Corda cu e Yiu aki ta un refleho perfecto di su Tata. Ta pesei  Hesus a bisa un di su disipelnan: “Esun cu a mira mi a mira e Tata.” (Huan 14:9) E cuater bukinan di Bijbel conoci como e Evangelionan—Mateo, Marco, Lucas y Huan—ta conta nos hopi cos tocante Hesucristo su bida, actividadnan y cualidadnan personal.

16. Kico tawata Hesus su mensahe principal, y di unda su siñansanan a bin?

¹⁶ Hesus tawata bon conoci como “Maestro.” (Huan 1:38; 13:13) Kico el a siña hende? Su mensahe principal tawata “e evangelio di reino”, esta, e bon noticia tocante e Reino di Dios, e gobierno celestial cu lo goberna henter e tera y lo trece bendicion sin fin pa hende obediente. (Mateo 4:23) Di ken e mensahe aki tawata? Hesus mes a bisa: “Mi siñansa no ta di mi, ma di Esun cu a manda mi”, esta, Yehova. (Huan 7:16) Hesus tawata sa cu su Tata kier pa hende tende tocante e bon noticia di e Reino. Den Capitulo 8, nos lo siña mas tocante e Reino di Dios y kico lo e logra.

17. Na unda Hesus a siña hende, y dicon el a haci asina tanto esfuerso pa siña hende?

¹⁷ Na unda Hesus a siña hende? Tur caminda cu el a haya hende: den cunucu y tambe den stad, den pueblito, den plasa y den nan cas. Hesus no a sinta warda pa hende bin serca dje. El a bai serca nan. (Marco 6:56; Lucas 19:5, 6) Dicon Hesus a haci asina tanto esfuerso y dedica asina tanto tempo na predica y siña hende? Pasobra esei tawata loke Dios tawata kier pa e haci. Hesus semper a haci e boluntad di su Tata. (Huan 8:28, 29) Pero tawatin un motibo mas pakico el a predica. El a sinti compasion pa e multitudnan di hende cu a sali bin serca dje. (Mateo 9:35, 36) E hendenan ei a ser neglisha door di nan lidernan religioso, kendenan lo mester tawata siña nan e berdad tocante Dios y su propositonan. Hesus tawata sa cu  e hendenan tawatin hopi necesidad di tende e mensahe di Reino.

18. Cua ta e cualidadnan di Hesus cu bo ta haya mas atractivo?

¹⁸ Hesus tawata un homber di tierno cariño y cu hopi sintimento. Pesei hende a consider’e un persona bondadoso y facil pa acerca. Asta mucha a sinti nan comodo serca dje. (Marco 10:13-16) Hesus no a haci distincion di persona. El a odia corupcion y inhusticia. (Mateo 21:12, 13) Den e tempo ei, hende mohe a haya masha tiki respet y tawatin tiki privilegio, pero e si a trata nan cu dignidad. (Huan 4:9, 27) Hesus tawata realmente humilde. Na un ocasion el a laba pia di su apostelnan, un servicio cu normalmente ta un humilde cria tawata haci.

19. Menciona algun ehempel cu ta mustra cu Hesus a mustra comprension pa e necesidadnan di otro hende.

¹⁹ Hesus a mustra comprension pa e necesidadnan di otro hende. Esaki tawata specialmente bisto ora cu el a haci milager of curacion cu poder di e spirito di Dios.  (Mateo 14:14) Por ehempel, un homber cu lepra a bin serca Hesus y a bisa: “Si bo kier, bo por haci mi bira limpi.” Hesus personalmente a sinti e homber aki su dolor y sufrimento. Motiva pa compasion, Hesus a saca su man y mishi cu e homber, bisando: “Mi kier, sea limpi.” Y e homber enfermo a cura! (Marco 1:40-42) Bo por imagina con e homber ei lo mester a sinti?

20, 21. Con Hesus tawata un bon ehempel di fiel obediencia na Dios?

²⁰ Hesus a pone e mihor ehempel di fiel obediencia na Dios. El a keda fiel na su Tata celestial bou di tur sorto di circunstancia y apesar di tur tipo di oposicion y sufrimento. Cu firmesa y exito Hesus a logra resisti Satanas su tentacionnan. (Mateo 4:1-11) Na un tempo, algun miembro di Hesus su propio famia no a pone fe den dje, y asta nan a bisa cu “su cabes no ta bon!” (Marco 3:21) Pero  Hesus no a laga nan influenci’e; el a sigui haci e trabou di Dios gewoon. Apesar di insulto y maltrato, Hesus a mustra dominio propio y nunca el a purba haci daño na su opositornan.—1 Pedro 2:21-23.

²¹ Hesus a keda fiel te na morto, un morto cruel y doloroso na man di su enemigonan. (Filipensenan 2:8) Wak kico el a soporta riba e ultimo dia di su bida como hende. El a ser aresta, acusa door di testigonan falso, sentencia door di huesnan corupto, chercha door di multitudnan y tortura door di soldanan. Claba na un staca, el a hala su ultimo rosea y a grita: “Ta cumpli!” (Huan 19:30) Sinembargo, Hesus su Tata celestial a resusit’e na bida como un persona spiritual riba e di tres dia despues cu el a muri. (1 Pedro 3:18) Un par di siman despues, el a regresa shelo. Einan el “a sinta na man drechi di Dios” y a warda pa ricibi poder como rei.—Hebreonan 10:12, 13.

22. Kico Hesus a logra door di keda fiel te na morto?

²² Kico Hesus a logra door di keda fiel te na morto? Hesus su morto de echo a habri caminda pa nos por haya bida eterno den un paradijs riba tera, na harmonia cu Yehova su proposito original. Den e siguiente capitulo nos lo considera con e morto di Hesus ta haci esei posibel.