1, 2. Dicon hopi bes ta bon pa haci pregunta?

BO A yega di ripara con mucha ta haci pregunta? Hopi di nan ta cuminsa puntra asina cu nan siña papia. Cu wowo hancho habri y ansioso pa sa, nan ta hisa cara wak bo y puntra cosnan manera: Dicon shelo ta blou? Dicon streya ta briya? Ken a siña paharito canta? Podise bo ta haci bo best pa duna un contesta, pero esei no ta semper facil. Asta bo mihor contesta por hiba na un otro pregunta: Dicon?

² Mucha no ta e uniconan cu ta haci pregunta. Segun cu nos ta crece, nos ta sigui puntra. Nos ta puntra pa nos por sa con pa yega na un adres, pa haya sa di peligernan cu nos tin cu evita of pa satisface nos curiosidad. Pero ta parce cu hopi hende cu tempo ta stop di haci pregunta, specialmente e preguntanan di mas importante. Of a lo menos, nan ta stop di busca contesta.

3. Dicon hopi hende ta stop di purba haya contesta riba e preguntanan di mas importante?

³ Pensa riba e pregunta cu tin  riba e kaft di e buki aki, tambe e preguntanan haci den e introduccion of esnan na comienso di e capitulo aki. Nan ta algun di e preguntanan di mas importante cu bo por haci. Sinembargo, hopi hende a stop di purba haya contesta riba nan. Dicon? Bijbel tin contesta pa nan? Tin hende ta haya cu Bijbel su contestanan ta mucho dificil pa compronde. Algun hende ta precupa cu hacimento di pregunta lo por laga nan pasa berguensa. Y tin hende ta dicidi cu mihor laga e tipo di preguntanan ei pa lider- y guianan religioso. Kico abo ta pensa?

4, 5. Cua ta algun di e preguntanan di mas importante cu nos por haci den bida, y dicon nos tin cu busca nan contesta?

⁴ Muy probablemente abo ta interesa den haya contesta riba e preguntanan importante di bida. Casi sigur bo a yega di puntra bo mes: ‘Kico ta e proposito di bida? Acaso su unico proposito ta pa nace, bira bieu anto caba muri? Con Dios ta realmente?’ Ta bon pa haci e tipo di preguntanan ei. Y ta importante pa bo no stop di sigui busca sino te ora bo haya contestanan confiabel cu ta laga bo keda satisfecho. E famoso maestro Hesucristo a bisa: “Pidi, y lo wordo duna na boso; busca, y boso lo haya; bati, y lo wordo habri pa boso.”—Mateo 7:7.

⁵ Si bo sigui “busca” contesta riba e preguntanan importante, lo bo ripara cu e buskeda ei por ta masha recompensador. (Proverbionan 2:1-5) Maske kico otro hende lo por a bisa bo, tin contesta pa nan, y abo por haya nan, den Bijbel. E contestanan no ta dificil pa compronde. Ademas, nan ta duna speransa y goso. Y nan por yuda bo hiba un bida cu for di awor ta duna bo satisfaccion. Pa cuminsa, laga nos considera un pregunta cu a molestia hopi hende.

6. Dicon hopi hende ta pensa cu Dios no tin cu nes cu sufrimento humano?

⁶ Hopi hende ta pensa cu e contesta riba e pregunta ei ta  si. Nan ta rasona: ‘Si Dios tawata interesa den nos, mundo lo mester tawata un luga hopi distinto, toch?’ Nos ta wak rond y ta mira un mundo yen di guera, odio y miseria. Y como persona, nos ta bira malo, nos ta sufri y nos sernan keri ta muri. Pesei hopi hende ta bisa: ‘Si Dios tawata interesa den nos y den nos problemanan, lo e mester a preveni e tipo di cosnan ei, toch?’

7. (a) Con guianan religioso a pone hopi hende pensa cu Dios no tin sintimento? (b) Kico Bijbel ta siña realmente tocante e dificultadnan cu nos ta sufri?

⁷ Piyo ainda, guianan religioso tin biaha ta pone hende pensa cu Dios su curason ta duro, sin sintimento. Con asina? Wel, ora un tragedia sosode, nan ta bisa “es cu Dios kie”, esta, cu ta Dios su boluntad. En realidad, e guianan religioso ei ta culpa Dios pa e mal cosnan cu ta pasa. Esei ta e berdad tocante Dios? Kico Bijbel ta siña realmente? Santiago 1:13 ta contesta: “No laga ningun hende bisa ora cu e wordo tenta: ‘Mi ta wordo tenta door di Dios’; pasobra Dios no por wordo tenta door di maldad, y e mes no ta tenta ningun hende.” Pues, Dios nunca no ta esun cu ta causa e maldad cu bo ta mira den mundo rond di bo. (Job 34:10-12) Ta berdad cu e ta permiti cos malo sosode. Pero tin un diferencia grandi entre permiti algo sosode y caus’e.

8, 9. (a) Ki ehempel bo por uza pa mustra e diferencia entre permiti maldad existi y caus’e? (b) Dicon no ta husto pa nos critica Dios su decision di permiti humanidad sigui e caminda di rebeldia?

⁸ Por ehempel, pensa riba un tata sabi y amoroso cu tin un yiu homber grandi cu ainda ta biba na cas serca su mayornan. Si e yiu bira rebelde y dicidi di bai for di cas, su tata no ta strob’e di bai. E yiu ta hiba un mal bida y ta haya su mes den problema. Ta e tata ta e causa di e problemanan di su yiu? No. (Lucas 15:11-13) Asina tambe, Dios no a stroba hende ora cu nan a scohe pa sigui un mal caminda, pero tampoco e no ta e causa di e problemanan cu a  resulta. Pues anto, sigur no ta husto pa culpa Dios pa tur e problemanan di humanidad.

⁹ Dios tin bon motibo pakico el a permiti humanidad sigui un mal caminda. Como nos Creador sabi y poderoso, e no tin cu duna nos splicacion di su motibonan. Sinembargo, amor ta motiva Dios pa hacie toch. Lo bo siña mas tocante e motibonan aki den Capitulo 11. Pero keda trankil, Dios no ta responsabel pa e problemanan cu nos ta confronta. Al contrario, e ta duna nos e unico speransa pa un solucion!—Isaias 33:2.

10. Dicon nos por tin confiansa cu Dios lo drecha tur e efectonan di maldad?

¹⁰ Ademas, Dios ta santo. (Isaias 6:3) Esaki ta nifica cu e ta puro y limpi. No tin ningun rastro di maldad den dje. Pues nos por confi’e plenamente. Nos no por tin e pleno confiansa ei den hende, pasobra tin biaha nan ta bira corupto. Asta e persona di mas honesto den puesto di autoridad hopi bes no tin e poder pa drecha e daño cu mal hende ta haci. Pero Dios ta todopoderoso. E por y lo drecha tur e efectonan cu maldad tawatin riba humanidad. Ora Dios bai actua, lo e haci esei den un manera cu lo pone fin pa semper na maldad!—Salmo 37:9-11.

11. (a) Kico Dios ta pensa di inhusticia? (b) Kico Dios ta pensa di bo sufrimento?

¹¹ Mientrastanto, kico Dios ta pensa di loke ta pasa den mundo y den bo bida? Wel, Bijbel ta siña cu Dios “ta stima husticia.” (Salmo 37:28) Pues, e ta masha interesa den loke ta corecto y loke ta incorecto. E ta odia tur clase di inhusticia. Bijbel ta bisa cu Dios “tawata tristo den su curason” ora cu den pasado mundo a yena cu maldad. (Genesis 6:5, 6) Dios no a cambia. (Malakias 3:6) Ainda Dios tin rabia  di mira e sufrimento cu ta tumando luga rond mundo. Y Dios tin rabia di mira hende sufri. Bijbel ta anima nos pa ‘tira tur nos precupacion riba dje, pasobra e ta percura pa nos.’—1 Pedro 5:7.

12, 13. (a) Con bin nos tin bon cualidad manera por ehempel amor, y amor ta laga nos sinti kico pa cu e inhusticia den mundo? (b) Dicon bo por ta sigur cu Dios realmente lo haci algo cu e problemanan di mundo?

¹² Con nos por ta sigur cu Dios tin rabia di mira sufrimento? Ata mas prueba. Bijbel ta siña cu hende a ser traha den Dios su imagen. (Genesis 1:26) Pues nos tin bon cualidad pasobra Dios tin bon cualidad. Por ehempel, ora bo mira hende inocente sufri, esei ta molestia bo? Si abo ta precupa pa tal inhusticia, bo por ta sigur cu Dios ta precupa mas tanto ainda cu esei.

¹³ Un di e mihor cosnan cu nos como hende tin ta e capasidad di stima. Esei tambe ta refleha un cualidad di Dios. Bijbel ta siña cu “Dios ta amor.” (1 Huan 4:8) Nos ta stima pasobra Dios ta stima. Amor lo a motiva bo pa pone un fin na e sufrimento y inhusticia cu bo ta mira den mundo? Si bo tawatin e poder pa haci esei, lo bo a hacie? Claro cu si! Wel, bo por ta sigur cu Dios tambe lo pone fin na sufrimento y inhusticia. E promesanan menciona den e introduccion di e buki aki no ta djis un ilusion of speransa vano. Dios su promesanan lo cumpli sigur! Pero pa bo por pone fe den e promesanan ei bo tin cu sa mas tocante e Dios cu a priminti nan.

14. Con Dios su nomber ta, y dicon nos tin cu uz’e?

¹⁴ Si bo kier pa un hende siña conoce bo, kico bo ta haci? Bo ta bisa e persona bo nomber, no ta asina? Dios tin un nomber? Hopi religion ta contesta cu su nomber ta “Dios” of “Señor”, pero eseinan no ta nomber personal. Nan ta simplemente titulo, mescos cu “rei” y “presidente” ta titulo. Bijbel ta siña cu Dios tin hopi titulo, entre nan, “Dios” y “Señor.” Sinembargo, Bijbel ta siña tambe cu Dios tin un nomber personal: Yehova. Salmo 83:18 (NW) ta bisa: “Abo, kende su nomber ta Yehova, abo so ta e Haltisimo  riba henter tera.” (Wak tambe e nota na pia di pagina di Exodo 3:14, BPK) Si bo traduccion di Bijbel no tin e nomber ei, lo bo por consulta e articulo di Apendix, “E Nomber di Dios—Su Uzo y Su Nificacion.” E berdad ta cu Dios su nomber ta aparece miles di biaha den manuscritonan antiguo di Bijbel. Pues Yehova kier pa bo conoce su nomber y uz’e. Den un sentido, e ta uza Bijbel pa introduci su mes na bo.

15. Kico e nomber Yehova ta nifica?

¹⁵ Dios a duna su mes un nomber cu ta yen di nificacion. Su nomber, Yehova, ta nifica cu Dios por cumpli cu cualkier promesa cu e haci y cu cualkier proposito cu e tin na mente. * Dios su nomber ta unico. E ta pertenece na e so. Yehova ta unico den varios manera. Con asina?

16, 17. Kico nos por siña tocante Yehova for di e siguiente titulonan: (a) “Todopoderoso”? (b) “Rei eterno”? (c) “Creador”?

 ¹⁶ Nos a mira cu Salmo 83:18 a bisa di Yehova: “Abo so ta e Haltisimo.” Asina tambe, ta Yehova so Bijbel ta yama “Todopoderoso.” Revelacion 15:3 ta bisa: “Grandi y maraviyoso bo obranan ta, o SEÑOR Dios Todopoderoso; husto y berdadero bo camindanan ta, abo, Rei di e nacionnan.” E titulo “Todopoderoso” ta siña nos cu Yehova ta e ser mas poderoso cu tin. Su poder ta sin igual; e ta supremo. Na 1 Timoteo 1:17, Bijbel ta yama Yehova e “Rei eterno.” E titulo “Rei eterno” ta recorda nos cu Yehova ta unico den un otro sentido. E ta e unico persona cu semper a existi. Salmo 90:2 ta bisa: “Si, for di eternidad te na eternidad, abo ta Dios.” Esei ta yena bo cu respet profundo p’e, no ta asina?

¹⁷ Yehova ta unico tambe pa e echo cu ta e so ta e Creador. Revelacion 4:11 ta bisa: “Digno bo ta, nos Señor y nos Dios, pa ricibi gloria y honor y poder; pasobra abo a crea tur cos, y pa motibo di bo boluntad nan tawata existi, y a wordo crea.” Tur cos cu bo por imagina—sea ta criaturanan spiritual invisibel den shelo of e streyanan cu ta yena shelo anochi of e frutanan cu ta crece na palo of e piscanan cu ta landa den lama y riu—tur ta existi pasobra Yehova ta e Creador.

18. Dicon algun hende ta sinti cu nunca nan lo por tin un amistad intimo cu Dios, pero kico Bijbel ta siña?

¹⁸ Tin hende ta sinti nan mes un poco incomodo ora nan lesa tocante Yehova su cualidadnan impresionante. Nan tin miedo cu Dios ta mucho halto pa nan, cu nunca nan lo no por tin un amistad intimo cu Dios of asta conta den bista di un Dios asina sublime. Pero e idea ei ta corecto? Bijbel ta siña net lo contrario. E ta bisa di Yehova: “E no ta leu  di cada un di nos.” (Echonan 17:27) Bijbel ta asta urgi nos: “Hala serca Dios y e lo hala serca boso.”—Santiago 4:8.

19. (a) Con nos por cuminsa hala serca Dios, y cu ki beneficio? (b) Cua ta e cualidadnan di Dios cu mas bo ta gusta?

¹⁹ Con bo por hala serca Dios? Pa cuminsa, bo mester sigui haci loke bo ta haciendo awor, esta, siña tocante Dios. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Si, Bijbel ta siña cu gana conocemento tocante Yehova y Hesus ta hiba na “bida eterno”! Manera a keda menciona caba, “Dios ta amor.” (1 Huan 4:16) Yehova tin tambe hopi otro cualidad mas cu ta bunita y atractivo. Por ehempel, Bijbel ta bisa cu Yehova ta un Dios “yen di compasion y gracia, kende no ta rabia lihe y kende ta abunda den misericordia y berdad.” (Exodo 34:6) E ta “bon, y cla pa pordona.” (Salmo 86:5) Dios tin pasenshi. (2 Pedro 3:9) Dios ta fiel. (1 Corintionan 1:9) Segun cu bo ta lesa mas den Bijbel, lo bo mira con Yehova a demostra cu e tin e cualidadnan atractivo aki y hopi otro mas.

20-22. (a) E echo cu nos no por mira Dios ta stroba nos di tin un amistad intimo cu ne? Splica. (b) Kico algun hende cu bon intencion kisas ta conseha bo pa haci, pero kico lo bo mester haci?

²⁰ Ta berdad cu bo no por mira Dios, pasobra e ta un spirito invisibel. (Huan 1:18; 4:24; 1 Timoteo 1:17) Sinembargo, door di siña loke Bijbel ta bisa tocante dje, bo por bin conoc’e como persona. Manera e salmista a bisa, bo por “contempla e bunitesa di SEÑOR.” (Salmo 27:4; Romanonan 1:20) Mas bo siña tocante Yehova, mas real lo e bira pa bo y mas motibo lo bo tin pa stim’e y sinti cu bo tin un amistad intimo cu ne.

²¹ Lo bo bin compronde dicon Bijbel ta siña nos pa pensa di Yehova como nos Tata. (Mateo 6:9) No solamente pasobra nos bida ta bin for di dje, sino tambe pasobra e kier pa nos tin e mihor bida posibel, mescos cu cualkier tata amoroso  lo kier esei pa su yiunan. (Salmo 36:9) Bijbel ta siña tambe cu hende por bira Yehova su amigo. (Santiago 2:23) Figura bo, bo por bira un amigo di e Creador di universo!

²² Segun cu bo ta siña mas cos for di Bijbel, lo bo ripara cu algun hende cu bon intencion lo conseha bo pa stop cu e estudio di Bijbel ei. Kisas nan ta precupa cu lo bo cambia bo creencianan. Pero no laga ningun hende stop bo di sera e mihor amistad cu ta posibel, esta, amistad cu Dios.

23, 24. (a) Dicon bo tin cu sigui haci pregunta tocante loke bo ta siñando? (b) Kico e siguiente capitulo lo trata?

²³ Claro cu lo tin cosnan cu bo no ta compronde na principio. Bo mester ta humilde pa pidi yudansa, y no laga berguensa stroba bo. Hesus a bisa cu ta bon pa ta humilde, mescos cu un mucha. (Mateo 18:2-4) Y manera nos sa, mucha ta haci masha hopi pregunta. Dios kier pa bo haya e contestanan. Bijbel a elogia algun hende cu tawata ansioso pa siña tocante Dios. Nan a check cuidadosamente den e Scritura pa haci sigur cu loke nan tawata siña ta e berdad.—Echonan 17:11.

²⁴ E mihor manera pa siña tocante Yehova ta door di investiga Bijbel. E ta distinto for di tur otro buki. Den ki manera? E siguiente capitulo lo trata esei.