Dios ta invita tur sorto di hende pa hala cerca dje den oracion. (Salmo 65:2) Pero no ta tur oracion e ta scucha of acepta. Por ehempel, e no ta scucha oracion di un homber cu ta maltrata su esposa. (1 Pedro 3:7) Y tempo cu e Israelitanan a persisti den maldad, Dios no a scucha nan oracionnan tampoco. No obstante, Dios lo scucha oracion hasta di hende cu comete pica serio, basta nan arepenti. Pesey, ta un privilegio di por haci oracion na Jehova.—Lesa Isaias 1:15; 55:7.

Oracion ta parti di nos adoracion. Pesey, nos mester haci oracion solamente na nos Creador, Jehova. (Mateo 4:10; 6:9) Ademas, como hende imperfecto nos tin cu haci oracion den nomber di Hesus, ya cu el a muri pa nos picanan. (Juan 14:6) Jehova no kier pa nos ripiti oracion cu nos a siña for di cabes of oracion skirbi. Mas bien, e kier pa nos papia cu ne di curason.—Lesa Mateo 6:7; Filipensenan 4:6, 7.

Nos Creador por scucha hasta oracion cu hende ta haci den silencio. (1 Samuel 1:12, 13) Dios ta anima nos pa haci oracion tur ora bay, por ehempel, ora nos lanta, prome cu nos bay drumi, ora di come y ora nos tin problema.—Lesa Salmo 55:22; Mateo 15:36.

No ta facil pa hala cerca Dios pasobra nos ta biba meymey di hende cu no tin fe den Dios y cu ta haci bofon di su promesa di trece paz riba tera. (2 Timoteo 3:1, 4; 2 Pedro  3:3, 13) Pesey, nos tin mester di e animacion di nos rumannan cristian, mescos cu nan tin mester di esun di nos.—Lesa Hebreonan 10:24, 25.

Nos por hala cerca Dios ora nos ta asocia cu hende cu ta stima Dios. Y e reunionnan di Testigonan di Jehova ta duna nos bon oportunidad pa ricibi estimulo for di nos rumannan.—Lesa Romanonan 1:11, 12.

Bo por hala cerca Jehova ora bo ta medita riba loke bo ta siña for di su Palabra. Reflexiona riba Jehova su actividad-, instruccion- y promesanan. Oracion y meditacion ta yuda nos compronde con grandi Dios su amor y sabiduria ta.—Lesa Josue 1:8; Salmo 1:1-3.

Bo por tin un bon relacion cu Dios solamente si bo tin confianza y fe den dje. Fe ta manera un mata. Mescos cu bo tin cu muha un mata regularmente pa e keda na bida, asina bo tin cu sigui alimenta bo fe pa e keda bibo. Y bo por haci esey ora bo ta repasa e base di bo creencianan regularmente.—Lesa Mateo 4:4; Hebreonan 11:1, 6.

Jehova ta hopi interesa den hende cu ta stim’e. E por proteha nan contra tur loke por pone nan perde nan fe y speransa di bida eterno. (Salmo 91:1, 2, 7-10) E ta spierta nos contra un estilo di bida cu ta perhudica nos salud y kita nos felicidad. Si, Jehova ta siña nos e mihor manera di biba.—Lesa Salmo 73:27, 28; Santiago 4:4, 8.