LES 35

Con Nos Por Tuma Bon Decision?

PLAY

Nos tur mester tuma decision den bida. Hopi di e decisionnan aki por influencia nos bida y nos amistad cu Jehova. Por ehempel, kisas nos mester dicidi unda nos ta bay biba, con nos lo sostene nos mes financieramente y si nos lo casa of no. Ora nos ta tuma bon decision, nos lo tin un bida feliz y nos lo agrada Jehova.

1. Con bo por laga Bijbel yuda bo tuma bon decision?

Prome cu bo tuma un decision, pidi Jehova yuda bo y wak kico Bijbel ta bisa tocante e asunto. (Lesa Proverbionan 2:3-6.) Den algun caso, Jehova ta duna mandamento specifico. Si esey ta e caso, ta mihor nos obedece e mandamento ey.

Pero, kico awor si no tin mandamento specifico den Bijbel cu ta bisa bo kico pa haci? E ora ey tambe Jehova lo guia bo “den e caminda cu bo mester cana.” (Isaias 48:17) Con lo e haci esey? Wel, Jehova lo guia bo pa medio di principio di Bijbel. Principio di Bijbel ta berdad fundamental, of basico, cu ta yuda nos sa con Jehova ta pensa y sinti. Hopi biaha, nos ta haya sa con Jehova ta pensa tocante un asunto ora nos lesa un relato den Bijbel. Ora nos haya sa con Jehova ta pensa, nos por tuma decision cu ta agrad’e.

2. Kico bo mester tene cuenta cu ne prome cu bo tuma un decision?

Bijbel ta bisa: “Un persona sabi ta pensa bon prome cu e dal un paso.” (Proverbionan 14:15) Ku otro palabra, prome cu nos tuma decision, nos tin cu tuma tempo pa pensa riba nos opcionnan. Segun cu bo ta analisa bo opcionnan, puntra bo mes: Ki principio di Bijbel mi por sigui den e asunto aki? Cua di e opcionnan lo laga mi keda cu un consenshi limpi? Ki efecto mi decision por tin riba otro hende? Mas importante ainda, lo e haci Jehova contento?—Deuteronomio 32:29.

Jehova tin derecho di bisa nos loke ta bon y loke ta malo. Ora nos ta siña e ley- y principionan di Jehova bon y ta dicidi di sigui nan, nos ta entrenando nos consenshi. Nos consenshi ta bisa nos loke ta bon y loke ta malo. (Romanonan 2:14, 15) Ora nos consenshi ta bon entrena, nos por tuma bon decision.

KICO MAS NOS POR SIÑA?

Laga nos wak con principio di Bijbel y nos consenshi ta yuda nos ora di tuma decision.

3. Laga Bijbel yuda bo ora di tuma decision

Con principio di Bijbel por yuda nos ora di tuma decision? Pasa e VIDEO. Despues, analisa e siguiente preguntanan:

VIDEO: Laga Prinsipionan di Beibel Guia Bo (5:54)

Kico ta boluntad liber?
Dicon Jehova a duna nos boluntad liber?
Kico Jehova a duna nos pa yuda nos uza nos boluntad liber bon?

Pa wak ehempel di un principio di Bijbel, lesa Efesionan 5:15 y 16. Despues, analisa con bo por “[uza bo] tempo di e mihor manera” pa ...

lesa Bijbel tur dia.
bira un mihor esposo, esposa, mayor of yiu.
asisti na nos reunionnan.

4. Entrena bo consenshi pa yuda bo tuma bon decision

Ora Bijbel ta duna un mandamento specifico tocante un asunto, por ta mas facil pa tuma e decision corecto. Pero kico si no tin un mandamento specifico? Pasa e VIDEO. Despues, analisa e siguiente pregunta:

VIDEO: “Mantené un Bon Konsenshi” (5:13)

Den e video, kico e ruman muher a haci pa entrena su consenshi y tuma un decision cu lo agrada Jehova?

Dicon nos no mester pidi otro hende pa tuma decision pa nos? Lesa Hebreonan 5:14. Despues, analisa e siguiente preguntanan:

Aunke por parce mas facil pa pidi otro hende tuma decision pa nos, kico nos mes mester siña distingui?
Kico por yuda nos entrena nos consenshi y tuma bon decision?

Mescos cu un mapa ta guia nos, nos consenshi tambe ta guia nos pa tuma bon decision den bida

5. Tene cuenta cu consenshi di otro hende

No ta tur hende lo tuma e mesun decisionnan. Con nos por tene cuenta cu consenshi di otro hende? Laga nos wak dos situacion:

Situacion 1: Un ruman muher cu ta gusta uza makeup ta muda bay un congregacion unda e ruman muhernan ta sinti nan incomodo ora nan mira otro hende cu makeup.

Lesa Romanonan 15:1 y 1 Corintionan 10:23, 24. Despues, analisa e siguiente preguntanan:

A base di e versiculonan aki, kico e ruman muher por dicidi di haci? Kico abo lo haci si bo ta cu un persona kende su consenshi no ta permitie haci algo cu bo consenshi si ta permiti bo haci?

Situacion 2: Un ruman homber sa cu Bijbel ta bisa cu no ta malo pa bebe alcohol na un manera modera. Pero e ta scoge pa no bebe alcohol. E ruman homber ta haya invitacion pa pasa tempo cu algun ruman y e ta mira nan ta bebe alcohol.

Lesa Eclesiastes 7:16 y Romanonan 14:1, 10. Despues, analisa e siguiente preguntanan:

A base di e versiculonan aki, kico e ruman homber por dicidi di haci? Kico abo lo haci si bo mira un persona ta haci algo cu bo consenshi no ta permiti bo haci?

Kico bo mester haci pa tuma bon decision?

1. Haci oracion. Pidi Jehova yuda bo dicidi kico pa haci.—Santiago 1:5.

2. Haci investigacion. Uza Bijbel y e publicacionnan basa riba Bijbel pa busca informacion y pa haya principio cu por yuda bo. Bo por pidi ruman cu experencia pa conseho tambe.

3. Pensa riba e resultado di bo decision. Pensa ki efecto bo decision lo tin riba bo consenshi y riba consenshi di otro hende.

LOKE HENDE SA BISA: “Bo tin derecho di haci loke bo kier. Bo no mester worry cu loke otro hende ta pensa.”

Dicon nos mester tene cuenta cu e sintimentonan di Dios y di otro hende?

RESUMEN

Nos por tuma bon decision ora nos haya sa kico Jehova ta pensa di un asunto y ora nos ta tuma tempo pa pensa si nos decision lo yuda otro hende of haci nan daño.