Cristian berdadero ta determina pa no laga nada ni ningun hende stroba nan di adora Jehova. Nos tin sigur cu bo tambe ta determina pa haci mescos. Jehova sigur ta contento cu bo ta leal na dje. (Lesa 1 Cronicanan 28:9.) Den ki situacion por ta dificil pa keda leal na Jehova? Kico por yuda bo trata cu e situacionnan ey?

1. Con otro hende por purba di stroba nos di keda leal na Jehova?

Tin hende ta haci cos pa purba di stop nos di sirbi Jehova. Ken asina lo purba di haci esey? Por ehempel, hende cu a stop di sirbi Jehova y cu awor ta plama mentira tocante e organisacion di Jehova pa nos perde fe. E hendenan aki ta ser yama apostata. Ademas, algun lider religioso ta plama mentira tocante nos pasobra nan kier pone e rumannan cu no ta cauteloso bay tras di e mentiranan aki y stop di sirbi Jehova. Ta peligroso pa nos papia cu nos opositornan, pa lesa nan bukinan y loke nan ta skirbi riba nan websitenan of pa wak nan videonan. Hesus a bisa lo siguiente tocante hende cu kier stroba otro hende di sirbi Jehova lealmente: “Laga nan. Ta guia ciego nan ta. Y si un ciego guia un ciego, tur dos ta cay den buraco.”​—Mateo 15:14.

Kico si un hende cu nos conoce no kier ta testigo di Jehova mas? Nos por sinti nos masha tristo si un amigo of famia di nos stop di sirbi Jehova. Kisas un persona asina ta presiona nos pa scoge entre e y Jehova. Sin importa e situacion, nos mester ta determina pa keda leal na Jehova. (Mateo 10:37) Pues, nos ta obedece Jehova su mandato y no ta pasa tempo cu e hendenan ey.​—Lesa 1 Corintionan 5:11.

2. Con nos decisionnan ta mustra cu nos ta leal na Jehova?

Amor pa Jehova ta pone cu nos no kier tin nada di haber cu religion falso. Nos trabou ni ningun organisacion cu nos ta pertenece na dje ni nada cu nos ta haci no mester tin conexion cu religion falso. Jehova ta spierta nos: “Sali for di [Babilonia e Grandi], mi pueblo.”​—Revelacion 18:2, 4.

 KICO MAS NOS POR SIÑA?

3. Tene cuidou cu maestro falso

Kico nos tin cu haci ora nos tende cos negativo tocante Jehova su organisacion? Lesa Proverbionan 14:15. Despues, analisa e siguiente pregunta:

• Dicon nos no mester bay tras di tur loke hende ta bisa?

Lesa 2 Juan 10. Despues, analisa e siguiente preguntanan:

• Con nos mester trata un apostata?

• Aunke nos no ta papia directamente cu apostata, con nan ideanan por influencia nos toch?

• Con bo ta kere Jehova lo sintie si nos ta scucha cos negativo cu hende ta papia di dje of di su organisacion?

4. Keda leal na Jehova ora un ruman peca

Si nos haya sa cu un hende den e congregacion a comete un pica serio, kico nos mester haci? Wak un principio cu nos por saca for di e ley cu Jehova a duna e Israelitanan den pasado. Lesa Levitico 5:1.

Manera e texto ta mustra, si nos haya sa cu un persona den congregacion a comete un pica serio, nos mester bisa e ancianonan loke nos sa. Pero, prome cu nos haci esey, lo ta bon pa nos anima e persona pa e mes bay papia cu e ancianonan y confesa su pica. Si e no haci esey, nos lealtad na Jehova lo motiva nos pa bisa e ancianonan loke nos sa. Si nos tuma e pasonan cu a ser menciona, con esey ta demostra cu nos tin amor leal pa ...

• Jehova Dios?

• e persona cu a peca?

• otro hende den congregacion?

 5. Keda leu for di Babilonia e Grandi

 RESUMEN

Pa nos por keda leal na Jehova, nos no mester anda cu hende cu no ta leal na dje. Ademas, nos mester separa nos mes completamente for di religion falso.

Repaso

• Dicon nos no mester wak, lesa ni scucha loke e apostatanan ta bisa?

• Con nos mester trata hende cu no kier ta testigo di Jehova mas?

• Con nos por obedece e spiertamento pa sali for di religion falso?