Casamento ta comienso di un famia nobo. Maske semper lo bo keda stima y respeta bo mayornan, awor e persona di mas importante pa bo riba e mundo aki ta bo casa. Podise ta dificil pa algun di bo famianan acepta esey. Pero Bijbel por yuda bo pa bo ta balansa den e asunto aki. Ademas, e por yuda bo mantene un bon relacion cu bo mayornan, suegronan y otro miembronan di boso famia mientras bo ta traha duro pa fortalece boso bida di famia nobo.

LOKE BIJBEL TA BISA: “Honra bo tata y bo mama.” (Efesionan 6:2) Maske con grandi bo bira, semper bo mester honra y respeta bo mayornan. Pero corda cu bo casa tambe ta yiu. E tambe mester duna su mayornan atencion. “Amor no ta jaloers”, pues nunca sinti cu e relacion cu bo casa tin cu su mayornan ta un menasa pa bo.—1 Corintionan 13:4; Galationan 5:26.

LOKE BO POR HACI:

• Evita di duna comentario exagera manera: “Semper bo famia ta critica mi” of “Nada cu mi haci ta bon pa bo mama”

• Pone bo mes den sapato di bo casa

LOKE BIJBEL TA BISA: “Un homber lo bandona su tata y su mama y lo uni cu su esposa. Y nan lo bira un carni.” (Genesis 2:24) Hasta despues cu boso casa, boso mayornan kisas ta sigui sinti cu nan ta responsabel pa boso, y kisas nan ta mete den boso matrimonio.

Ta abo cu bo casa mester dicidi te con leu boso kier pa nan yega y splica nan esey na un manera bondadoso. Si, boso por ta franco pero sin perde respet pa nan. (Proverbionan 15:1) Humildad, suavidad y pasenshi lo yuda boso haya un bon relacion cu boso famianan y sigui ‘soporta nan den amor.’—Efesionan 4:2.

LOKE BO POR HACI:

• Si bo ta preocupa cu boso famianan ta mete den boso bida, papia riba e asunto cu bo casa na un momento cu boso tur dos ta trankil

• Dicidi hunto con boso ta bay atende e asunto aki