1-3. Cua ta algun factor cu ta haci e morto di Hesus diferente for di tur otro morto den historia?

CASI 2.000 aña pasa riba un dia di lente, nan a hiba un homber inocente dilanti tribunal, declar’e culpabel di crimennan cu e no a comete, anto tortur’e te na morto. Esei no tawata e prome ehecucion cruel y inhusto di historia, y lamentablemente no e ultimo tampoco. Sinembargo, su morto ta diferente for di tur otro.

² Ora e homber tawata sufri su ultimo oranan di agonia, asta shelo a mustra cu ta un cos grandi tawata tumando luga. Diripiente un scuridad a tapa tera, maske tawata di dia. Un historiado a describi loke a pasa di e manera aki: “Solo a bira scur.” (Lucas 23:44, 45) Anto net prome cu e homber a hala su ultimo rosea, el a bisa e palabranan inolvidabel aki: “Ta cumpli!” Asina mes. Door di entrega su bida el a cumpli, of logra, algo maraviyoso. Su sacrificio ta e muestra di amor di mas grandi cu cualkier ser humano a yega di haci.—Huan 15:13; 19:30.

³ Naturalmente, ta di Hesucristo nos ta papiando. Su sufrimento y morto riba e dia scur ei, 14 di nisan di aña 33 di nos era, ta un echo bon conoci. Sinembargo, tin un otro echo importante cu hopi bes ta ser pasa por alto, esta, cu maske Hesus a sufri masha hopi riba e dia ei, tin un otro persona cu a sufri asta mas. De echo, e sacrificio cu e otro persona aki a haci riba e dia ei ta e sacrificio di mas grandi, y e muestra di amor di mas grandi, cu cualkier persona den henter universo a yega di haci. Ta di kico nos ta papiando? E contesta ta sirbi como un excelente introduccion pa e tema di mas importante cu nos por trata: Yehova su amor.

4. Con un solda Romano a bin compronde cu Hesus no tawata un homber comun y coriente, y na ki conclusion el a yega?

⁴ E solda Romano cu a supervisa e ehecucion di Hesus a keda profundamente impresiona door di e scuridad cu a baha prome cu Hesus a muri y e temblor fuerte cu a sosode net ora el a caba di muri. El a bisa: “Di berdad esaki tawata e Yiu di Dios!” (Mateo 27:54) E por a mira bon cla cu Hesus no tawata un homber comun y coriente. E solda ei a caba di yuda ehecuta e Yiu unigenito di e Dios Haltisimo! Con precioso e Yiu aki tawata pa su Tata?

5. Con nos lo por ilustra e inmenso cantidad di tempo cu Yehova y su Yiu a pasa cu otro den shelo?

⁵ Bijbel ta yama Hesus “e primogenito di henter creacion.” (Colosensenan 1:15) Djis purba imagina bo: Yehova su Yiu tawata existi prome cu universo fisico. Cuanto tempo anto e Tata y e Yiu a pasa hunto cu otro? Algun cientifico ta calcula cu universo tin 13 mil miyon aña di existencia. Bo no por ni imagina bo un tempo asina largo, no? Pa yuda hende realisa cuanto tempo universo ta existi caba, un planetario a pone un liña horizontal di 110 meter na muraya. Segun cu e bishitantenan ta cana pasa banda di e liña, cada paso cu nan dal ta representa mas o menos 75 miyon aña. Na final di e liña henter historia humano ta ser representa pa un marca mes fini cu un cabei di hende! Awor, ban bisa cu e calculo aki ta corecto; ni asina, henter e liña di 110 meter ei lo no ta suficiente pa mustra cuanto tempo Yehova su Yiu tin na bida! Kico el a haci durante tur e tempo ei?

6. (a) Kico Yehova su Yiu tawata haci prome cu el a bira un ser humano? (b) Describi e laso di unidad cu tin entre Yehova y su Yiu.

⁶ E Yiu tawata contento di sirbi como “trahado experto” di su Tata. (Proverbionan 8:30) Bijbel ta bisa: “Fuera di dje [esta, sin mediacion di e Yiu] nada di loke ta existi no a bini na existencia.” (Huan 1:3) Pues, Yehova y su Yiu a traha hunto pa produci tur otro cos. Imagina bo con emocionante y felis e tempo ei mester tawata pa nan! Mayoria hende lo ta di acuerdo cu entre  mayor y yiu ta existi un amor sumamente grandi. Y amor ta “e laso perfecto di unidad.” (Colosensenan 3:14) Cu esei na mente, ken di nos por bisa cu e tin sikiera un idea di con fuerte e laso aki ta bira despues di un tempo hopi largo asina? Claramente, e laso di amor cu ta uni Yehova Dios y su Yiu ta esun di mas fuerte cu a yega di forma.

7. Ora Hesus a batisa, con Yehova a expresa loke el a sinti pa su Yiu?

⁷ Apesar di esei, e Tata a despacha su Yiu pa e bin nace na tera como un baby humano. Esei a nifica cu Yehova mester a keda algun decada sin asocia intimamente cu su Yiu stima den shelo. Cu gran interes el a vigila for di shelo y mira con Hesus a crece bira un homber perfecto. Ora Hesus tawatin rond di 30 aña, el a batisa. Nos no tin nodi specula kico Yehova a sinti p’e. E Tata a papia personalmente for di shelo y bisa: “Esaki ta mi Yiu stima, den kende mi tin goso.” (Mateo 3:17) Hesus su Tata mester a keda hopi contento cu Hesus, pasobra el a cumpli fielmente cu tur loke a ser profetisa y cu tur loke su Tata a pidie haci!—Huan 5:36; 17:4.

8, 9. (a) Kico Hesus a pasa aden dia 14 di nisan di aña 33 di nos era, y con esaki a afecta su Tata den shelo? (b) Pakico Yehova a permiti su Yiu sufri y muri?

⁸ Pero con Yehova a sinti dia 14 di nisan di aña 33 di nos era? Con el a sinti ora nan a traiciona Hesus? Ora un multitud a arest’e den anochi? Ora su amigonan a bandon’e y hende a tene un huicio inhusto contra dje? Ora nan a tene mofa di dje, scupie y dal e cu mokete? Ora nan a sut’e laga su lomba na werki? Ora nan a claba su man cu su pia na un staca anto lag’e colga pa hende insult’e? Con su Tata a sinti ora su Yiu stima a sclama na dje den agonia? Con Yehova a sinti ora Hesus a hala su ultimo rosea y pa di prome bes for di comienso di creacion su Yiu stima a stop di existi?—Mateo 26:14-16, 46, 47, 56, 59, 67; 27:38-44, 46; Huan 19:1.

⁹ Si nos purba splica, palabra lo laga nos na caya. Yehova tin sintimento. Pues, e dolor cu el a sufri pa morto di su Yiu ta bai mas aya di loke nos por splica cu palabra. Loke si nos por splica  ta kico a motiva Yehova pa laga e cos ei sosode. Pakico e Tata a permiti su mes pasa den tanto dolor asina? Yehova ta revela algo maraviyoso na Huan 3:16—un versiculo di Bijbel asina importante cu hende a yega di yam’e e Evangelio na miniatura. E ta bisa: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” Pues, den un solo palabra, loke a motiva Dios ta esaki: amor. E regalo aki di Dios, e echo cu el a manda su Yiu pa sufri y muri pa nos, tawata e muestra di amor mas grandi di tur tempo.

10. Ki necesidad ser humano tin, y kico a sosode cu e nificacion di e palabra “amor”?

¹⁰ Kico e palabra “amor” ta nifica? Hende a yega di bisa cu amor ta e necesidad principal di un ser humano. For di ora un hende nace te ora e muri, e ta lucha pa amor. Amor ta hacie crece saludabel, y si e falta amor e por asta para caba na nada y muri. Y toch amor ta masha dificil pa defini. Claro cu tur ora hende ta papia di amor. Tin buki, cantica y poema tocante amor pa no caba nunca. Pero no ta tur ta yuda aclara e nificacion di amor. Al contrario, nan ta uza e palabra aki asina tanto, cu ta parce mas dificil cu nunca pa haya su berdadero nificacion.

11, 12. (a) Unda nos por siña hopi tocante amor, y dicon? (b) Ki diferente tipo di amor e idioma Griego antiguo tawatin palabra p’e, y cua di e palabranan aki ta ser uza mas tanto den e Scritura Griego Cristian? (Mira tambe e nota na pia di pagina.) (c) Kico ta a·gá·pe?

¹¹ Di otro banda, Bijbel si ta siña bon cla kico ta amor. Expository Dictionary of New Testament Words di Vine ta comenta lo siguiente: “E unico manera pa bo compronde amor ta door di mira kico e ta motiva un persona pa haci.” E relatonan registra den Bijbel tocante e echonan di Yehova ta siña nos hopi tocante su amor, esta, e cariño cu e tin pa su criaturanan y cu ta motiv’e na haci bon pa nan. Por ehempel, ki miho manera por tin pa splica e cualidad aki di Yehova, cu di mira e muestra  supremo di Dios su amor cu nos a menciona anteriormente? Den e capitulonan cu ta sigui nos lo mira hopi otro ehempel di Yehova su amor den accion. Un otro cos cu lo yuda nos compronde e nificacion di amor mas miho ta di examina e palabranan original cu Bijbel ta uza pa “amor.” Den e idioma Griego antiguo tawatin cuater palabra pa “amor.” * Di nan cuater, esun mas uza den e Scritura Griego Cristian ta a·gá·pe. Un diccionario biblico ta yam’e “e palabra mas poderoso posibel pa amor.” Dicon?

¹² E tipo di amor cu a·gá·pe ta referi na dje ta amor guia door di principio. Pues, e no ta djis un reaccion emocional riba loke un otro persona ta bisa of haci. E ta un tipo di amor mas amplio, y compara cu e otro tiponan e tin mas di aber cu bo mente y bo boluntad personal. Mas cu tur cos, a·gá·pe no tin ni un solo elemento egoista. Por ehempel, ban wak atrobe kico Huan 3:16 ta bisa. Ta cua “mundo” Dios a stima asina tanto cu el a duna su Yiu unigenito? E mundo di hende cu por ser rescata. Hopi di e hendenan aki ta hiba un bida di pica. Acaso Yehova ta stima cada un di nan como un amigo personal, mescos cu el a stima fiel Abraham? (Santiago 2:23) No, pero den su amor e ta trata tur hende cu bondad, apesar cu esei a nifica un gran sacrificio di su parti. E ta desea pa tur hende repenti y cambia nan bida. (2 Pedro 3:9) Hopi di nan ta cambia, y den tal caso e ta acepta nan como su amigo.

13, 14. Kico ta mustra cu hopi bes a·gá·pe ta encera cariño tierno tambe?

¹³ Pero algun hende tin un idea robes tocante a·gá·pe. Nan ta pensa cu e ta nifica un tipo di amor friu y puramente intelectual. Pero den hopi caso a·gá·pe ta encera cariño personal  intimo tambe. Por ehempel, ora Huan a skirbi: “E Tata ta stima e Yiu”, el a uza un forma di e palabra a·gá·pe. (Huan 3:35) Esei kiermen cu e amor cu e Tata ta sinti pa Hesus ta friu y sin cariño? No, pasobra na Huan 5:20 nota cu Hesus a bisa cu “e Tata ta stima e Yiu”, pero einan e texto a uza un forma di e palabra fi·lé·o. Den hopi caso e amor di Dios ta encera tierno cariño tambe. Pero nunca e no ta laga sentimentalismo controla su amor. Semper e ta laga su principionan sabi y husto guia su amor.

¹⁴ Manera nos a mira caba, tur Yehova su cualidadnan ta di un caliber moral halto, y tur ta perfecto y atractivo. Pero di nan tur, amor ta esun mas atractivo. Nada otro no ta atrae nos na Yehova asina tanto. Y nos por ta masha contento tambe cu ta amor ta su cualidad dominante. Con nos por sa esei?

15. Kico Bijbel ta declara tocante e amor di Yehova, y den ki sentido e declaracion ei ta unico? (Mira tambe e nota na pia di pagina.)

¹⁵ Bijbel ta bisa algo tocante amor cu e no ta bisa tocante ningun di Yehova su otro cualidadnan principal. E Scritura no ta bisa cu Dios ta poder, cu Dios ta husticia, y ni sikiera cu Dios ta sabiduria. Dios ta posee tur e cualidadnan ei, e ta e origen di nan y e ta incomparabel den nan tur. Pero pa loke ta e di cuater cualidad, Bijbel ta bisa algo mas profundo: “Dios ta amor.” * (1 Huan 4:8) Kico esei kiermen?

16-18. (a) Dicon Bijbel ta bisa cu “Dios ta amor”? (b) Di tur e criaturanan riba tera, dicon ta hende ta un simbolo apropiado pa e amor di Dios?

¹⁶ Ora Bijbel bisa cu “Dios ta amor” e no kiermen cu “Dios y  amor ta e mesun cos.” Si nos cambia e declaracion y bisa cu “amor ta Dios”, esei lo no ta corecto. Yehova ta hopi mas cu un cualidad abstracto. E ta un persona cu un variedad amplio di sintimento y otro caracteristica ademas di su amor. Pero amor ta un caracteristica integral di Yehova. Pesei un obra di referencia ta bisa tocante e versiculo aki: “Amor ta e esencia di Dios su personalidad, su manera di ta.” Generalmente, nos lo por expresa e asunto asin’aki: Yehova su poder ta permitie actua. Su husticia y sabiduria ta guia su accionnan. Pero ta su amor ta motiv’e pa actua. Y semper cu e uza su otro cualidadnan, e ta hacie cu amor.

¹⁷ Ta ser bisa hopi bes cu Yehova ta amor en persona. Pesei, si nos kier siña tocante amor basa riba principio, nos mester siña tocante Yehova. Claro cu nos por mira e bunita cualidad aki den hende tambe. Pero, ta con bin hende tin amor? Ora Yehova a crea hende, el a expresa e siguiente palabranan, evidentemente papiando cu su Yiu: “Laga nos traha hende segun nos imagen, conforme nos semehansa.” (Genesis 1:26) Di tur e criaturanan cu tin riba e mundo aki, ta hende so por dicidi di stima, y asina imita nan Tata den shelo. Corda cu Yehova a uza diferente criatura pa simbolisa su cualidadnan principal. Pero pa simbolisa su cualidad dominante, amor, Yehova a scohe su creacion terenal di mas halto.—Ezekiel 1:10.

¹⁸ Ora nos stima na un manera sin egoismo y guia door di principio, nos ta reflehando Yehova su cualidad dominante. Esei ta precis loke apostel Huan a skirbi: “Nos ta stima, pasobra el a stima nos prome.” (1 Huan 4:19) Pero, con Yehova a stima nos prome?

19. Dicon nos por bisa cu amor a hunga un papel clave den Yehova su obra di creacion?

¹⁹ Amor no ta nada nobo. Con cu bai bin, ta kico a motiva Yehova pa cuminsa crea tur cos? No ta compaño e tawata kier, como si fuera e tawata sintie su so. Yehova ta completo. No tin  nada cu e falta of cu un otro mester dun’e. Pero como cu su amor ta un cualidad activo, di mes e amor ei a pone cu e kier a comparti e goso di ta na bida cu otro criaturanan inteligente cu por balora tal regalo. “E principio di e creacion di Dios” ta su Yiu unigenito. (Revelacion 3:14) Despues Yehova a uza e como su Trahado Experto pa trece tur otro cos na existencia, cuminsando cu e angelnan. (Job 38:4, 7; Colosensenan 1:16) E spiritonan poderoso aki, bendiciona cu libertad, inteligencia y sintimento, por a forma lasonan di amor entre nan mes, y principalmente cu Yehova Dios. (2 Corintionan 3:17) Pues, nan a stima pasobra nan a ser stima prome.

20, 21. Adam cu Eva por a mira ki evidencianan di Yehova su amor pa nan, y sinembargo con nan a pag’e pa tur esei?

²⁰ Den caso di humanidad tawata mescos. For di cuminsamento, Adam y Eva tawata completamente rondona di amor. Unda cu nan a bira den Eden, e paradijs cu nan tawata biba aden, nan por a mira evidencia di e amor cu nan Tata tawatin pa nan. Wak kico Bijbel ta bisa: “SEÑOR Dios a planta un hofi parti pariba, na Eden; y ayanan el a pone e homber cu el a forma.” (Genesis 2:8) Bo a yega di ta den un hofi of un parke sumamente bunita? Kico bo a gusta mas di dje? E manera cu lus ta filtra pasa meimei di e blachinan den un huki bou di sombra? E colonan impactante di un tapijt di flor? E musica di fondo di un waterval, cantamento di parha y zonido di insecto? Of kico di e holo di e palonan, frutanan y flornan? Awe no tin ningun parke na mundo, pa bunita cu e por ta, cu por para banda di esun di Eden. Dicon no?

²¹ Ta Yehova mes a planta e hofi ei! Lo no tawatin palabra pa describi su bunitesa. Delaster un palo bunita pa bista of cu ta duna fruta dushi, tawata den e hofi. Tawatin awa na abundancia, e hofi tawata espacioso, y tawatin yen di bestia fasinante na gran variedad. Adam cu Eva tawatin tur loke por a haci nan bida felis y interesante; incluso trabou pa duna nan satisfaccion y hende perfecto como compaño. Yehova a stima nan prome, y nan tawatin tur motibo pa stim’e tambe. Y sinembargo  nan no a hacie. Na luga di mustra amor door di obedece nan Tata den shelo, den nan egoismo nan a rebela contra dje.—Genesis, capitulo 2.

22. Con e manera cu Yehova a reacciona riba e rebelion na Eden ta proba cu su amor ta leal?

²² Esta un dolor esei lo mester a causa Yehova! Pero, acaso e rebelion aki a amarga su curason amoroso? No! “Su misericordia [of, “amor leal”, NW, nota na pia di pagina] ta pa semper.” (Salmo 136:1) Pesei, mesora el a dicidi di haci e percuracionnan amoroso necesario pa cumpra bek tur yiu di Adam y Eva cu tin e actitud corecto. Manera nos a mira, un di e percuracionnan ei ta e sacrificio di rescate di su Yiu stima, algo cu tawata un gran sacrificio pa e Tata tambe.—1 Huan 4:10.

23. Kico ta un di e cosnan cu ta haci Yehova e Dios felis, y cua pregunta vital e siguiente capitulo ta bai trata?

²³ Si, for di comienso Yehova a tuma iniciativa pa mustra amor na humanidad. El a “stima nos prome”, y na masha hopi manera. Amor ta promove harmonia y goso. Pesei no ta nada straño cu Yehova ta e Dios felis, of “bendiciona.” (1 Timoteo 1:11) Sinembargo, tin un pregunta importante cu ta lanta. Yehova ta stima nos individualmente tambe? E siguiente capitulo ta bai trata e tema aki.