1, 2. Ki perdidanan ta haci e famia humano tristo awe, y ki efecto esakinan tin riba nos?

UN MUCHA ta perde of kibra su co’i hunga stima y ta cuminsa yora tristo asina. Su yoramento ta kibra bo curason! Pero bo a yega di mira con e cara di e mucha ta briya ora su tata dun’e bek loke el a perde? Pa e mayor, kisas ta djis un asunto di haya e co’i hunga of drech’e. Pero e mucha si ta masha contento y ta keda fasina. El a haya bek loke el a kere cu lo e no mira nunca mas!

² Yehova, e Tata di tur tata, tin e poder pa recupera loke su yiunan riba tera lo por considera totalmente perdi. Claro cu nos no ta referi na un simpel co’i hunga. Den e “temponan trabahoso” aki nos tin cu enfrenta perdidanan mucho mas serio. (2 Timoteo 3:1-5) Awe mas cu nunca, hende ta core peliger di perde cosnan cu nan ta duna hopi balor, manera cas, propiedad, empleo y asta nan salu. E destruccion di medioambiente y e exterminacion cu esei ta causa di hopi sorto di cosnan viviente tambe lo tin nos bastante molestia. Pero no tin nada cu ta dal nos mas duro cu e morto di un ser keri. E sintimento di perdida y impotencia ei por ta devastador.—2 Samuel 18:33.

3. Ki perspectiva y consuelo Echonan 3:21 ta ofrece, y pa medio di kico Yehova lo realisa esaki?

³ Ta un gran consuelo anto pa siña tocante e poder cu Yehova tin pa restaura cosnan! Manera nos lo mira, e variedad di cos cu Dios por y lo recupera pa su yiunan riba tera ta berdaderamente asombroso. De echo, Bijbel ta mustra cu e proposito di Yehova ta pa ‘restaura tur cos.’ (Echonan 3:21) Pa logra esaki, Yehova lo uza e Reino Mesianico den man di su Yiu Hesucristo. Evidencia ta mustra cu e Reino aki a  cuminsa goberna den shelo na 1914. * (Mateo 24:3-14) Kico lo ser restaura? Laga nos considera algun di Yehova su actonan grandioso di restauracion. Tin un di nan cu nos por mira y experencia caba. E otronan ta bai tuma luga na gran escala den futuro.

4, 5. Kico a sosode cu e pueblo di Dios na aña 607 prome cu nos era, y ki speransa Yehova a duna nan?

⁴ Un di e cosnan cu Yehova a restaura caba ta adoracion puro. Pa por capta loke esaki ta nifica, laga nos analisa brevemente e historia di e reino di Huda. Esei lo yuda nos compronde algun di e maneranan emocionante cu Yehova ta uza su poder pa restaura.—Romanonan 15:4.

⁵ Djis imagina con e Hudiunan fiel a sinti nan na aña 607 prome cu nos era, ora Herusalem a ser destrui. Nan stad stima tawata un ruina completo y su murayanan a keda tur destrosa. Piyo ainda, e tempel glorioso cu Salomon a construi, e unico centro di adoracion puro na Yehova riba henter e tera, tawata un monton di ruina. (Salmo 79:1) A hiba e sobrevivientenan den exilio na Babilonia, lagando nan tera natal como un luga bandona frecuenta pa bestia salbahe. (Yeremias 9:11) For di un punto di bista humano, a parce manera cu tur cos a caba pa nan. (Salmo 137:1) Pero Yehova, kende hopi tempo pasa a profetisa e destruccion aki, a duna speransa cu un tempo di restauracion tawata acercando.

6-8. (a) Ki tema varios profeta Hebreo a skirbi tocante dje, y con e profecianan ei a cumpli inicialmente? (b) Den tempo mas resien, con e pueblo di Dios a mira hopi profecia di restauracion cumpli?

 ⁶ De echo, e tema di restauracion ta uno cu varios profeta Hebreo a skirbi tocante dje. * Via nan, Yehova a priminti un tera restaura y habita di nobo, fertil, proteha for di bestia feros y atake di enemigo. El a describi nan tera restaura como un berdadero paradijs! (Isaias 65:25; Ezekiel 34:25; 36:35) Pero mas importante ainda, adoracion puro lo a ser reestableci y e tempel lo a ser reconstrui. (Mikeas 4:1-5) E profecianan aki a duna e Hudiunan exilia speransa, loke a yuda nan soporta nan 70 aña di cautiverio den Babilonia.

⁷ Por fin e tempo di restauracion a yega. Libra for di Babilonia, e Hudiunan a regresa Herusalem y reconstrui e tempel di Yehova ei. (Esdras 1:1, 2) Tanten cu nan a keda fiel na adoracion puro, Yehova a bendiciona nan y haci nan tera fertil y prospero. El a proteha nan di enemigo y di bestia feros cu a invadi nan tera pa decadanan. Cuanto nan mester a alegra den Yehova su poder pa restaura! Pero e susesonan ei a representa solamente un cumplimento inicial y limita di e profecianan di restauracion. Lo mester a tuma luga un cumplimento mayor “den e ultimo dianan”, den nos propio tempo, ora e Heredero di Rei David priminti hopi tempo pasa lo a ser entronisa.—Isaias 2:2-4; 9:6, 7.

⁸ Un poco despues cu Hesus a wordo entronisa den e Reino celestial na 1914, el a atende e necesidadnan spiritual di e pueblo fiel di Dios riba tera. Mescos cu e conkistado Ciro di Persia a libra un resto di Hudiu for di Babilonia na aña 537 prome cu nos era, Hesus a libra un resto di Hudiu spiritual—su siguidonan—for di e influencia di un Babilonia moderno, e imperio mundial di religion falso. (Romanonan 2:29; Revelacion 18:1-5) For di 1919 padilanti,  adoracion puro a recupera su debido luga den bida di cristiannan berdadero. (Malakias 3:1-5) For di e tempo ei, e pueblo di Yehova a ador’e den su tempel spiritual cu el a haci limpi, es decir, e areglo di Dios pa adoracion puro. Pakico esaki ta importante pa nos awe?

9. Despues di e era apostolico, kico e iglesianan di cristiandad a haci cu e adoracion di Dios, pero kico Yehova a haci den nos tempo?

⁹ Laga nos repasa historia. E cristiannan di prome siglo a disfruta di hopi bendicion spiritual. Pero Hesus y e apostelnan a profetisa cu adoracion berdadero lo degenera y disparce. (Mateo 13:24-30; Echonan 20:29, 30) Despues di e era apostolico, cristiandad a aparece. Miembronan di clero a adopta siñansanan y custumbernan pagano. Tambe nan a haci casi imposibel pa hende acerca Dios, door di pint’e como un Trinidad misterioso y door di siña hende confesa na pasto y resa na Maria y varios “santo” en bes di siña nan resa na Yehova. Awor, despues di hopi siglo cu siñansa cristian a ser corumpi asina, kico Yehova a haci? Den e mundo djawe—un mundo yen di falsedad religioso y contamina pa practicanan malbado—el a interveni y restaura adoracion puro! Sin exagera nos por bisa cu e restauracion aki ta un di e desaroyonan mas importante den tempo moderno.

10, 11. (a) Ki dos aspecto e paradijs spiritual tin, y ki efecto esakinan tin riba bo? (b) Ki tipo di personanan Yehova a reuni den e paradijs spiritual y kico nan lo haya e privilegio di mira?

¹⁰ Pesei awe cristiannan berdadero ta disfruta di un paradijs spiritual. Kico e paradijs aki ta encera? Dos aspecto principal. E prome ta e adoracion puro di e Dios berdadero, Yehova. El a bendiciona nos cu un forma di adoracion cu ta liber di mentira y siñansanan troci. El a bendiciona nos cu alimento spiritual. Esaki ta permiti nos siña tocante nos Tata celestial, agrad’e y hala serca dje. (Huan 4:24) E di dos aspecto di e paradijs spiritual tin di aber cu hende.  Manera Isaias a profetisa, “den e ultimo dianan”, Yehova a siña su adoradonan e camindanan di pas. El a aboli guera entre nos. Apesar di nos imperfeccionnan, e ta yuda nos bisti e personalidad di “e hende nobo.” E ta bendiciona nos esfuersonan cu su spirito santo, locual ta produci bunita fruta den nos. (Efesionan 4:22-24; Galationan 5:22, 23) Ora bo ta obra na harmonia cu e spirito di Dios, bo ta echt forma parti di e paradijs spiritual.

¹¹ Yehova a trece hunto den e paradijs spiritual aki e clase di hende cu e ta stima; hende cu ta stim’e, cu ta stima pas y cu ta “conciente di nan necesidad spiritual.” (Mateo 5:3, NW) Hende asina lo haya e privilegio di mira un restauracion asta mas espectacular: esun di humanidad y di henter tera.

12, 13. (a) Pakico e profecianan di restauracion mester cumpli den mas manera? (b) Kico ta e proposito di Yehova pa e tera manera el a declara den Eden, y pakico esaki ta duna nos speransa pa futuro?

¹² No ta den sentido spiritual so hopi di e profecianan di restauracion mester cumpli. Por ehempel, Isaias a skirbi di un tempo ora cu e enfermonan, e cohonan, e ciegonan y e sordonan lo cura, y ora cu lo traga asta morto pa semper. (Isaias 25:8; 35:1-7) E promesanan ei no a cumpli literalmente den Israel di antiguedad. Y aunke e promesanan aki a cumpli den un sentido spiritual den nos tempo, tin tur motibo pa kere cu den futuro nan lo cumpli literalmente y na gran escala. Con nos por sa esei?

¹³ Den Eden Yehova a splica bon cla kico ta su proposito pa tera: Lo e mester a keda habita pa un famia humano felis, sano y uni. Homber y mohe mester a cuida tera y tur su criaturanan, y transforma henter e planeta den un paradijs. (Genesis 1:28) E realidad actual ta hopi diferente. Pero nos por tin e siguransa cu Yehova su proposito no ta faya nunca.  (Isaias 55:10, 11) Hesus, e Rei Mesianico cu Yehova a nombra, lo trece e Paradijs mundial aki.—Lucas 23:43.

14, 15. (a) Con Yehova lo bai haci “tur cos nobo”? (b) Con bida lo ta den Paradijs, y ki aspecto di dje ta atrae bo mas?

¹⁴ Imagina bo ta mira henter e tera transforma den un Paradijs! Yehova ta bisa di e tempo ei: “Mira, mi ta haci tur cos nobo.” (Revelacion 21:5) Pensa riba kico esei lo nifica. Ora Yehova caba di uza su poder pa destrui contra e mundo malbado bieu aki, lo keda “shelonan nobo y un tera nobo.” Esaki ta nifica cu un gobierno nobo lo reina for di shelo riba un sosiedad nobo riba tera cu ta consisti di hende cu ta stima Yehova y cu ta haci su boluntad. (2 Pedro 3:13) Satanas, hunto cu su demoñonan, lo ser silencia completamente. (Revelacion 20:3) Pa prome bes den miles di aña, humanidad lo ta liber di e influencia corupto, vengativo y negativo ei. Sin duda, hende lo haya un gran alivio.

¹⁵ Porfin nos lo por cuida e bunita planeta aki manera nos lo mester a haci originalmente. Tera tin un capasidad natural di restaura su mes. Lagonan y riunan contamina por purifica nan mes si elimina e fuente di contaminacion; e cicatrisnan di camponan di bataya por cura si gueranan caba. Lo ta un placer pa traha na harmonia cu e leinan natural di tera y yuda transform’e den un parke manera un hardin, un Eden mundial cu tur tipo di bestia y mata! En bes di extermina esakinan pa loco, hende lo ta na pas cu henter creacion riba tera. Ni sikiera mucha lo no tin nodi tene miedo di bestia feros.—Isaias 9:6, 7; 11:1-9.

16. Ki restauracion tur persona fiel lo experencia den Paradijs?

¹⁶ Como persona tambe nos lo experencia un restauracion. Despues di Armagedon, e sobrevivientenan lo mira curacionnan milagroso na escala mundial. Mescos cu Hesus a haci tempo cu e tawata riba tera, lo e uza e poder cu Dios a dun’e pa cura hende ciego, sordo, coho y enfermo. (Mateo 15:30) Hende di edad lo recobra nan salu y lo  keda encanta cu nan vigor hubenil. (Job 33:25) Lachi lo disparce, brasa- y pianan lo bira stret y musculonan lo contrae cu energia renoba. Tur hende fiel lo sinti con e efectonan di pica y imperfeccion ta disparce gradualmente. Nos lo ta masha gradicido na Yehova Dios pa e maraviya di su poder pa restaura. Laga nos enfoca awor riba un aspecto specialmente alentador di e tempo di restauracion emocionante ei.

17, 18. (a) Pakico Hesus a reprende e saduceonan? (b) Ki circunstancianan a conmove Elias pa e roga Yehova resusita e mucha?

¹⁷ Den e prome siglo di nos era algun lider religioso, e saduceonan, no tawata kere den resureccion. Hesus a reprende nan bisando: “Boso ta kiboca; boso no ta compronde e Scrituranan, ni e poder di Dios.” (Mateo 22:29) Si, Bijbel ta revela cu Yehova tin poder pa restaura. Con asina?

¹⁸ Visualisa un suseso di e tempo di Elias. Un biuda tawatin e curpa sin bida di su unico yiu den su brasanan. Profeta Elias, huespet di e biuda pa algun tempo, lo mester a keda den shock. Mas prome, el a yuda preveni cu e mucha aki a muri di hamber. Probablemente Elias a haya hopi cariño pa e chikitin. E mama a keda hopi kibra. E hobensito aki tawata e unico recuerdo bibo di su defunto casa. Talbes el a conta riba e yiu aki pa cuid’e den su biehes. Yen di angustia, e biuda a teme cu e tawata sufriendo castigo pa un fayo di pasado. Elias no por a soporta di mira con esei a haci e dolor di e mohe aki bira piyo. El a tuma e curpa di e mucha suavemente for di scochi di su mama, carg’e hiba den su cuarto y pidi Yehova Dios duna e mucha su alma, of bida, bek.—1 Reinan 17:8-21.

19, 20. (a) Con Abraham a mustra cu e tawatin fe den Yehova su poder pa restaura, y kico tawata e base pa tal fe? (b) Con Yehova a recompensa e fe di Elias?

¹⁹ Elias no tawata e prome persona cu a kere den resureccion. Siglonan mas prome Abraham tambe tawatin fe  cu Yehova tin poder pa restaura—y Abraham tawatin bon motibo pa kere esei. Tempo Abraham tawatin 100 aña y Sara 90, Yehova a restaura nan facultadnan reproductivo cu tawata morto. E milager ei a permiti Sara haya un yiu. (Genesis 17:17; 21:2, 3) Mas despues, ora e mucha tawata grandi caba, Yehova a pidi Abraham sacrifica su yiu. Abraham a mustra fe, reconociendo cu Yehova lo por a duna Isaak, su yiu stima, bida bek. (Hebreonan 11:17-19) E fe firme ei por splica pakico Abraham, prome cu el a subi e sero pa ofrece su yiu, a sigura su sirbidonan cu tanto e como Isaak lo bolbe hunto.—Genesis 22:5.

²⁰ Yehova a laga Isaak keda na bida, pues e no tawatin nodi resusit’e e tempo ei. Sinembargo, den e caso di Elias si e yiu di e biuda tawata morto caba—pero e no a keda asina pa hopi tempo. Yehova a recompensa e fe di e profeta door di resusita e mucha! Despues Elias a entrega e mucha na su mama cu e palabranan inolvidabel aki: “Mira, bo yiu ta bibo!”—1 Reinan 17:22-24.

21, 22. (a) Kico tawata e proposito di e resureccionnan registra den Bijbel? (b) Con extenso e resureccion lo ta den Paradijs, y ken lo efectu’e?

²¹ Pues pa prome bes den Bijbel, nos ta mira con Yehova a uza su poder pa restaura e bida di un ser humano. Mas despues, Yehova a duna Eliseo, Hesus, Pablo y Pedro tambe poder pa lanta morto. Claro cu esnan cu a ser resusita, cu tempo a muri atrobe. No obstante, e relatonan di Bijbel ei ta duna nos un bunita bista adelanta di loke futuro lo trece.

²² Den Paradijs, Hesus lo cumpli cu su papel como “e resureccion y e bida.” (Huan 11:25) Lo e resucita miyones y miyones di hende, dunando nan un oportunidad pa biba pa semper den Paradijs riba tera. (Huan 5:28, 29) Pensa riba e goso inimaginabel cu amigo y famianan stima lo tin di por topa otro di nobo y brasa otro despues cu morto a  separa nan pa hopi tempo! Henter humanidad lo alaba Yehova pa su poder pa restaura.

23. Kico tawata e mayor demostracion di Yehova su poder, y con esaki ta garantisa nos speransa pa futuro?

²³ Yehova a duna nos un garantia solido cu e speransanan ei ta sigur. Den e mayor demostracion di su poder, el a resusita su Yiu, Hesus, como un criatura spiritual poderoso y dun’e un rango cu ta direct bou di E mes. Hesus resusita a aparece na centenares di testigo ocular. (1 Corintionan 15:5, 6) Asta pa esnan cu ta duda, e pruebanan ei mester ta mas cu suficiente. Yehova tin poder pa restaura bida.

24. Pakico nos por ta sigur cu Yehova lo resusita e mortonan, y ki speransa cada un di nos por carga?

²⁴ Aparte di tin poder pa duna bida na e mortonan, Yehova tin e deseo tambe pa haci esei. E homber fiel Job a bisa bou di inspiracion cu Yehova realmente ta anhela pa resusita e mortonan. (Job 14:15) Bo no ta sinti bo atrai na nos Dios, kende ta ansioso pa uza su poder pa restaura den un manera amoroso? Pero corda cu e resureccion ta djis un aspecto di Yehova su gran acto di restauracion pa futuro. Segun cu bo ta hala mas y mas serca dje, semper balora e speransa precioso di por t’ei pa mira Yehova “haci tur cos nobo.”—Revelacion 21:5.