Imagina bo e siguiente escena: Tim ta hunga cu su amigonan y ta tira un bala cu ta bay dal den bentana di un bisiña y kibr’e.

Si ta abo ta Tim, kico lo bo haci?

BO TIN TRES OPCION:

1. Core bay na careda.

2. Tira culpa riba otro hende.

3. Bisa e bisiña kico a pasa y ofrece pa paga pa e daño cu bo a haci.

Kisas lo bo tin gana di scoge Opcion A. Pero, semper tin bon motibo pa admiti bo foutnan, sea cu esey ta encera un bentana cu a kibra of algo otro.

1. Esey ta e mihor cos pa haci.

   Bijbel ta bisa: “Nos kier comporta nos mes na un manera honesto den tur cos.”—Hebreonan 13:18.

2. Ta mas facil pa pordona un persona cu ta admiti su foutnan.

   Bijbel ta bisa: “Esun cu sconde su picanan lo no prospera, ma esun cu confesa y laga nan lo haya misericordia.”—Proverbionan 28:13.

3. Mas importante ainda, Dios lo keda contento cu esey.

   Bijbel ta bisa: “Pasobra SEÑOR ta repudiá esnan ku no ke tin di aber kunÉ, pero ku esnan ku ta tende di djE E ta anda ku konfiansa.”—Proverbionan 3:32, BPK.

Karina, di 20 aña di edad, a purba di sconde un boet for di su tata. Pero, e no por a sconde esey pa semper. Karina ta bisa: “Mas o menos un aña despues, mi tata a haya sa cu tabatin un boet na mi nomber. El a rabia hopi cu mi.”

Kico nos por siña for di esaki? Karina ta bisa: “Ora bo sconde algo, ta pio so e ta bira. Tardi of trempan lo bo tin cu carga e consecuencianan.”

Bijbel ta bisa: “Nos tur ta faya hopi biaha.” (Santiago 3:2, nota) Y manera nos a mira, si bo admiti bo foutnan, mesora bo ta mustra cu bo ta un hende humilde y maduro.

E siguiente paso ta pa siña di bo foutnan. Un mucha muher cu yama Vera a bisa: “Mi ta purba di mira cada fayo como algo cu mi por siña for di dje y lag’e yuda mi bira un mihor persona y mihor prepara pa trata cu e situacion na un manera diferente un otro biaha.” Ban wak con bo por haci esey.

Bo ta fia bo tata su bais y ta kibra algo na dje. Kico lo bo haci?

• Keda keto y spera cu bo tata no ta ripara nada.

• Bisa bo tata precies kico a pasa.

• Bisa bo tata kico a pasa pero tira culpa riba otro hende.

Bo a haya mal punto pa un proefwerk cu bo no a siña p’e. Kico lo bo haci?

• Tira culpa riba e proefwerk.

• Acepta cu bo a haya un mal punto pasobra bo no a siña pa e proefwerk.

• Bisa cu ta e maestro no ta gusta bo.

 Awor ban bek na e escenanan anterior y purba di imagina cu bo ta (1) bo tata y (2) bo maestro. Kico bo tata of e maestro lo pensa di bo si bo ta cla pa admiti bo fout? Kico nan lo pensa di bo si bo ta purba di sconde bo fout?

Awor pensa riba un fout cu bo a comete den e aña cu a pasa y purba di contesta e siguiente preguntanan.

Kico tabata e fout? Con bo a trata cu e fout?

• Mi a scond’e.

• Mi a tira culpa riba otro hende.

• Mi a admiti mi fout mesora.

Si bo no a admiti bo fayo, con bo a sinti bo despues?

• Bon—Nan no a gara mi.

• Malo—Mi mester a papia e berdad.

Con bo por a trata mas mihor cu e situacion?

Kico bo a siña di bo fout?

Dicon algun hende no kier admiti nan foutnan?

Kico hende lo pensa di bo si semper bo ta purba di sconde bo foutnan, pero kico nan lo pensa di bo si bo ta admiti bo foutnan?—Lucas 16:10.