1, 2. (a) Ki situacion dificil e cristiannan na Judea tabata confronta? (b) Ki muestra di amor e cristiannan na Judea a experencia?

 ROND di aña 46 di e prome siglo, tabatin scarsedad di cuminda na Judea. E discipelnan Hudiu di Cristo cu tabata biba eynan no por a paga e prijsnan exorbitante cu e hendenan tabata cobra pa e tiki grano cu tabatin disponibel. Nan tabatin hamber. Y tabata comosifuera nan ta den un callejón sin salida. Sinembargo, nan tabata a punto di experencia e proteccion di Jehova na un manera cu niun otro discipel di Cristo no a yega di experencia. Kico a sosode?

² Wel, conmovi pa e sufrimento di e cristiannan Hudiu na Jerusalem y Judea, e cristiannan Hudiu y esnan cu no tabata Hudiu na Antiokia (Siria) a dicidi di colecta fondo pa yuda nan rumannan den fe. Despues nan a scoge dos ruman homber responsabel, Barnabas y Saulo, pa entrega e contribucion na e ancianonan di e congregacion na Jerusalem. (Lesa Echonan 11:27-30; 12:25.) Manera bo por imagina, e muestra di amor aki di parti di e rumannan na Antiokia lo mester a conmove e rumannan den necesidad na Judea.

3. (a) Con e pueblo di Dios den tempo moderno ainda ta sigui e ehempel di e prome cristiannan di Antiokia? Menciona un ehempel. (Wak tambe e cuadro “ Nos Prome Campaña Grandi den Tempo Moderno pa Yuda Esnan den Necesidad.”) (b) Ki preguntanan nos lo analisa den e capitulo aki?

³ E suceso ey, cu a tuma luga casi 2.000 aña pasa, ta e prome caso cu tin registra den cua cristiannan di un parti di mundo a manda fondo pa yuda cristiannan cu tabata biba na un otro parti. Awe, nos ta sigui e ehempel ey di nos rumannan di Antiokia. Nos ta bay yuda nos rumannan di un otro area ora nos haya sa cu nan ta confronta un calamidad of prueba. a Pa compronde con nos dunamento di ayudo ta conecta cu nos otro actividadnan di sirbishi, laga nos analisa tres pregunta relaciona cu esey: Dicon nos ta considera dunamento di yudansa, ora tin calamidad, parti di nos sirbishi? Kico ta e metanan cu nos kier logra? Kico ta e beneficionan cu nos ta haya?

4. Kico Pablo a bisa e rumannan di Corinto tocante e sirbishi cristian?

⁴ Den Pablo su di dos carta na e Corintionan, el a splica cu e sirbishi cristian ta consisti di dos parti. Aunke e carta di Pablo tabata dirigi na cristiannan ungi, awe su palabranan ta aplica tambe na e “otro carne[nan]” di Cristo. (Juan 10:16) Un parti di nos sirbishi ta “e sirbishi pa declara ... e mensahe di  reconciliacion”, esta, nos trabou di predica y di siña hende. (2 Cor. 5:18-20; 1 Tim. 2:3-6) E otro parti ta encera un sirbishi cu nos ta rindi pa yuda nos rumannan den fe. Na 2 Corintionan 8:4 Pablo a referi specificamente na e sirbishi aki ora el a uza e expresion “sirbi nan” en conexion cu e yudansa cu a duna otro rumannan. Tanto e palabra “sirbishi” como e expresion “sirbi nan” ta traduci for di e palabra Griego “diakonia.” Dicon e punto ey ta importante?

5. Dicon e echo cu Pablo a uza e palabra Griego pa referi na dunamento di yudansa ta importante?

⁵ E echo cu Pablo a uza e mesun palabra Griego pa ambos actividad ta indica cu Pablo a agrupa dunamento di yudansa ora tin calamidad hunto cu otro formanan di sirbishi cu e congregacion cristian ta efectua. Mas prome Pablo a bisa: “Tin diferente tipo di sirbishi, y toch tur ta pa e mesun Señor; y tin diferente tipo di actividad ... Pero ta e mesun spirito ta haci tur e actividadnan aki.” (1 Cor. 12:4-6, 11) En realidad, Pablo a conecta e diferente tipo di sirbishinan den congregacion cu “sirbishi sagrado.” b (Rom. 12:1, 6-8) Ta pesey mes el a sinti cu tabata na su luga pa e dedica un parti di su tempo pa sirbi of “yuda e santonan.”—Rom. 15:25, 26.

6. (a) Manera Pablo a splica, dicon nos por bisa cu dunamento di yudansa ta parti di nos adoracion? (b) Splica con nos trabou di duna yudansa ta tuma luga rond mundo. (Wak e cuadro “ Plan di Accion.”)

⁶ Pablo a yuda e rumannan di Corinto mira dicon dunamento di yudansa ora tin calamidad ta parti di nan sirbishi y adoracion na Jehova. Ban wak con el a rasona: Cristiannan cu ta duna yudansa ta haci esey pasobra nan ta “obedesidu na e bon notisia di Kristu.” (2 Cor. 9:13, BPK) Pues, motiva pa e deseo di pone e siñansanan di Cristo na practica, cristiannan ta yuda nan rumannan den fe. Segun Pablo, e obranan di bondad cu nan ta haci na fabor di nan rumannan no ta nada menos cu muestranan di “e bondad inmereci extraordinario [di] Dios.” (2 Cor. 9:14; 1 Ped. 4:10) Pesey ora La Atalaya di 1 di juni 1976 a papia tocante yuda nos rumannan den necesidad, loke ta encera dunamento di yudansa durante calamidad, e revista a bisa corectamente: “Jehova Dios cu su Yiu Hesucristo ta considera e tipo di sirbishi aki realmente importante. Hamas nos mester duda esey.” Si, dunamento di yudansa ora tin calamidad ta un parti importante di sirbishi sagrado.—Rom. 12:1, 7; 2 Cor. 8:7; Heb. 13:16.

7, 8. Splica kico ta e prome meta di nos dunamento di yudansa.

⁷ Kico ta meta di nos dunamento di yudansa ora tin calamidad? Pablo a contesta e pregunta ey den su di dos carta na e Corintionan. (Lesa 2 Corintionan 9:11-15.) Den e versiculonan aki, Pablo a enfatisa tres meta principal cu nos ta logra ora nos ta participa den “e sirbishi aki”, esta, den dunamento di yudansa. Laga nos analisa nan un pa un.

⁸ Prome, nos dunamento di yudansa ta glorifica Jehova. Ripara cuanto biaha den e cinco versiculonan, menciona ariba, apostel Pablo ta dirigi atencion di su rumannan na Jehova Dios. Dos biaha e ta corda nan cu e dunamento di yudansa ey “ta pone  hende expresa gradicimento na Dios.” (Versiculo 11, 12) E ta menciona con dunamento di yudansa ta un manera cu cristiannan “ta glorifica Dios” y elogia Dios pa su “bondad inmereci extraordinario.” (Versiculo 13, 14) Anto Pablo ta conclui bisando: “Nos ta gradici Dios.”—Versiculo 15; 1 Ped. 4:11.

9. Con dunamento di yudansa por cambia un hende su forma di pensa? Duna un ehempel.

⁹ Mescos cu Pablo, e sirbidornan di Dios den nos tempo ta mira dunamento di yudansa ora tin calamidad como un oportunidad pa glorifica Jehova y pa dorna su siñansa, of haci su siñansa mas bunita. (1 Cor. 10:31; Tito 2:10) En realidad, dunamento di yudansa hopi biaha ta hunga un papel grandi den elimina ideanan negativo cu algun hende tin di Jehova y di su Testigonan. Un ehempel: Un señora cu tabata biba den un area cu a sufri daño di horcan tabatin un borchi na su porta cu ta bisa: “Testigonan di Jehova, No Bin Akinan.” Pero un dia el a mira un grupo di boluntario bin drecha un cas cu tabatin dilanti su cas. Despues cu el a observa e trahadornan amabel pa varios dia, el a dicidi di bay cerca nan pa haya sa ken nan ta. Ora el a haya sa cu nan ta testigo di Jehova, el a keda impresiona y a bisa nan: “Mi tabatin un idea robes tocante boso.” Kico tabata e resultado? El a kita e borchi for di su porta.

10, 11. (a) Menciona algun ehempel cu ta mustra cu nos ta logrando e di dos meta di nos dunamento di yudansa. (b) Ki publicacion nos tin pa yuda e rumannan cu ta haci e trabou di duna yudansa? (Wak e cuadro “ Un Folder Valioso pa Esnan Cu Ta Duna Yudansa.”)

¹⁰ Di dos, nos ta “percura bon pa e necesidadnan” di nos rumannan den fe. (2 Cor. 9:12a) Nos ta ansioso pa satisface e necesidadnan di nos rumannan y alivia nan sufrimento. Dicon? Pasobra e miembronan di e congregacion cristian ta forma “un curpa” y “si un parti di e curpa ta sufri, tur otro parti ta sufri hunto cu ne.” (1 Cor. 12:20, 26) Pues, compasion y cariño pa e rumannan ta motiva hopi ruman awe pa stop mesora cu loke nan ta haciendo, coy nan hermentnan y bay di biaha na areanan asota pa calamidad pa nan por trece alivio pa nan rumannan den fe. (Sant. 2:15, 16) Por ehempel, despues cu un tsunami a asota Japon na 2011, e sucursal di Merca a manda un carta na e Comitenan Regional di Construccion na Merca pa puntra si “un par di ruman capacita” lo tabata dispuesto pa bay yuda reconstrui Salonnan di Reino na Japon. Kico tabata e reaccion? Dentro di algun siman, casi 600 boluntario a yena papel pa yuda y tabata dispuesto pa paga nan pasashi pa bula bay Japon. E sucursal di Merca a bisa: “Nos a keda pasma ora nos a wak e reaccion ey.” Ora un ruman homber na Japon a puntra un di e boluntarionan cu a bin di afo dicon el a bin yuda, e ruman a contest’e: “Nos rumannan di Japon ta parti di ‘nos curpa.’ Nos ta sinti nan dolor y sufrimento.” Tabatin biaha cu e gran amor di e boluntarionan a motiva nan pa hasta risca nan bida pa yuda nan rumannan den fe. c—1 Juan 3:16.

¹¹ Hasta hende cu no ta testigo di Jehova a expresa aprecio pa e yudansa cu nos ta duna. Por ehempel, despues di un calamidad cu a tuma luga na Arkansas, Merca, na 2013, un corant a comenta riba e reaccion rapido di boluntarionan testigo di  Jehova, bisando: “Testigonan di Jehova a organisa nan servicio di boluntario asina bon cu ... ora tin calamidad, nan ta reacciona cu masha eficiencia y habilidad.” En berdad, manera apostel Pablo a remarca, nos ta “percura bon” pa nos rumannan den necesidad.

12-14. (a) Dicon ta asina importante pa nos logra e di tres meta di nos dunamento di yudansa? (b) Kico algun ruman a bisa cu ta enfatisa e importancia di sigui cu actividadnan spiritual?

¹² Di tres, nos ta yuda rumannan afecta bolbe na nan rutina spiritual. Dicon esaki ta importante? Pablo a declara cu hende cu haya yudansa lo sinti nan motiva pa “gradisí Dios masha hopi mes.” (2 Cor. 9:12b, BPK) Con ta e mihor manera cu rumannan afecta lo por expresa nan gradicimento na Jehova? Esey no ta door di bolbe na nan rutina spiritual mas pronto posibel? (Flp. 1:10) E Toren di Vigilancia di 1945 a bisa: “Pablo a duna aprobacion ... pa colecta contribucion pasobra esey a yuda ... e rumannan cristian den necesidad haya un poco alivio material y asina nan por a participa mas facilmente y energicamente den Jehova su trabou di duna testimonio.” Awe, nos meta ta mescos. Ora nos rumannan bolbe cuminsa participa den e trabou di predica, nan ta fortalece no solamente nan bisiñanan afligi sino tambe nan mes.—Lesa 2 Corintionan 1:3, 4.

¹³ Considera awor algun comentario di rumannan cu a haya e ayudo necesario, y kendenan a bolbe cuminsa predica y a ser fortaleci ora nan a haci esey. Un ruman homber a bisa: “Tabata un bendicion cu nos famia por a bay sirbishi di veld. Segun cu nos tabata purba di consola otro hende, nos a stop di preocupa un rato cu nos propio situacion.” Un ruman muher a bisa: “Door di enfoca riba asuntonan spiritual, mi a stop di pensa riba tur e destruccion cu tabatin rond di mi. Esey a pone mi sinti mas trankil.” Un otro ruman muher a remarca: “Mientras cu hopi cos tabata fuera di nos control, sirbishi a yuda mi famia concentra riba nos futuro briyante. Segun cu nos tabata papia cu otro hende tocante nos speransa di e mundo nobo, nos confianza cu algun dia tur cos lo bira nobo a bira mas firme.”

¹⁴ Ta hopi importante tambe pa nos rumannan afligi cuminsa asisti mas pronto posibel na e reunionnan. Wak kico a pasa cu un ruman muher cu yama Kiyoko. El a perde tur cos den un tsunami, cu excepcion di e pañanan y sandalia cu e tabatin bisti. E tempo ey e tabatin casi 60 aña. E no tabata sa kico pa haci. Anto un anciano a bis’e cu nan lo tene nan reunion cristian semanal den e anciano su auto. Kiyoko a conta: “Ami, e anciano cu su esposa y un otro ruman muher a sinta den e auto. E reunion tabata simpel, pero toch mi a lubida completamente riba e tsunami cu a pasa. Tabata manera un milager. M’a sinti un paz mental. E reunion ey a laga mi mira cuanto poder asociacion cristian tin.” Un otro ruman muher, cu a comenta riba e reunionnan cu el a asisti na dje despues di un calamidad, a bisa: “Nan tabata manera un salbabida pa mi.”—Rom. 1:11, 12; 12:12.

15, 16. (a) Kico ta e beneficionan cu cristiannan di Corinto y di otro parti di mundo a haya pasobra nan a apoya e trabou di duna yudansa? (b) Con nos tambe ta beneficia di e trabou di duna yudansa?

¹⁵ Ora Pablo tabata papia tocante e sirbishi di duna yudansa ora tin calamidad, el a splica e rumannan di Corinto tambe kico ta e beneficionan cu nan y otro cristiannan lo a haya door di participa den e trabou ey. El a bisa: “Nan [esta, e cristiannan Hudiu na Jerusalem cu a ricibi e yudansa] ta suplica Dios pa boso y asina demostra nan cariño pa boso pa motibo di e bondad inmereci extraordinario cu Dios a mustra na boso.” (2 Cor. 9:14) Si, e generosidad di e rumannan na Corinto lo tabatin dos efecto: Di prome, esey lo a motiva e Hudiunan cristian pa haci oracion pa nan—incluyendo pa esnan cu no ta Hudiu—y di dos, esey lo a yuda e Hudiunan cristian haya mas cariño pa e Corintionan.

¹⁶ E Toren di Vigilancia di 1 di december 1945 a aplica e palabranan di Pablo tocante e beneficionan di dunamento di yudansa na nos tempo, bisando: “Ora un parti di Dios su pueblo consagra ta duna contribucion pa cumpli cu e necesidad di un otro parti di e pueblo, esaki tin un gran efecto riba nan union.” Esey ta precies loke e boluntarionan cu awe ta duna yudansa ta experencia. Un anciano cu a yuda despues di un inundacion a bisa cu e trabounan ey a lag’e sinti su mes mas uni cu nunca cu su rumannan. Un ruman muher cu tabata agradecido pa e yudansa cu el a ricibi a bisa: “Nos hermandad ta pone mi sinti comosifuera mi ta den un paradijs riba Tera.”—Lesa Proverbionan 17:17.

17. (a) Con e palabranan na Isaias 41:13 ta aplica na dunamento di yudansa? (b) Menciona algun ehempel di e manera cu dunamento di yudansa ta trece honor pa Jehova y ta fortalece nos lasonan di union. (Wak tambe e cuadro “ Boluntarionan di Tur Parti di Mundo Ta Duna Yudansa.”)

 ¹⁷ Ora boluntarionan cu ta duna yudansa yega na un sitio di calamidad, nos rumannan afecta ta experencia na un manera special cu loke Jehova a priminti ta berdad. El a bisa: “Ami ta SEÑOR bo Dios, kende ta sostene bo man drechi, kende ta bisa bo: ‘No tene miedo, lo mi yuda bo.’” (Isa. 41:13) Un ruman muher cu a sobrevivi un desaster a bisa: “M’a sinti mi desespera ora m’a mira tur e daño, pero Jehova a saca su man pa mi. E yudansa cu mi a ricibi di e rumannan ta algo cu mi no por describi.” Despues cu un calamidad a destrui e area caminda dos anciano tabata biba, nan a skirbi na nomber di nan congregacion: “E temblor a causa hopi sufrimento, pero nos a experencia con Jehova a yuda nos mediante nos rumannan. Nos a yega di lesa tocante dunamento di yudansa ora tin calamidad, pero awor nos a mir’e cu nos mesun wowo.”

18. Kico bo por haci si bo kier participa den dunamento di yudansa? (Wak tambe e cuadro “ Esey A Determina e Rumbo di Su Bida.”)

¹⁸ Abo lo kier sinti e goso cu dunamento di yudansa ta trece cu ne? Si ta asina, corda cu hopi biaha ta scoge e boluntarionan pa duna yudansa entre e rumannan cu ta traha riba proyectonan di construccion di Salon di Reino. Pues, dicon bo no ta puntra e ancianonan pa bo yena un formulario di solicitud? Un anciano cu tin hopi experencia den e trabou ey a bisa lo siguiente: “Corda cu ta solamente ora bo haya un invitacion oficial di e Comite di Yudansa, bo tin mag di bay na un area di calamidad pa yuda.” Di e manera ey, nos dunamento di yudansa lo tuma luga na un manera ordena.

19. Con esnan cu ta participa den dunamento di yudansa ta demostra na un manera sobresaliente cu nos di berdad ta discipel di Cristo?

¹⁹ Pues, un manera sobresaliente cu nos ta obedece e mandamento di Cristo pa “stima otro” ta mediante nos dunamento di yudansa ora tin calamidad. Ora nos mustra e clase di amor ey, nos ta demostra cu di berdad nos ta discipel di Cristo. (Juan 13:34, 35) Esta un gran bendicion cu awe nos tin asina tanto trahador boluntario cu ta glorifica Jehova segun cu nan ta duna e yudansa y alivio necesario na rumannan cu lealmente ta apoya e Reino di Dios!