BO TA kita un appel bunita for di e mata di appel y ta hol’e prome cu bo pon’e den e macutu cu ta casi yen. Bo tin basta ora ta traha, pero bo ta sinti bo bon bon, y bo tin gana di sigui traha un poco mas. Bo mama tambe ta eybanda ta kita appel for di un otro palo. E ta traha feliz y contento y ta combersa cu otro miembro di famia y amigonan cu tambe ta piki appel. E ta mustra asina jong; manera bo ta cord’e tempo bo tabata chikito. Casi bo no por kere cu bo a mir’e bira bieu den e mundo cu ya no ta existi mas. Bo ta corda cu bo a mira con maleza a caba cu ne, con bo a tene su man ora el a hala su ultimo rosea y con bo a yora na su graf. Pero awor, e ta eynan cu bo, hunto cu asina hopi hende mas, yen di salud y vigor.

Algun dia e escena aki lo bira realidad. Nos sa esey pasobra e promesanan di Dios semper ta cumpli. Den e seccion aki nos lo analisa con algun promesa di e Reino lo cumpli den futuro cercano y hiba na e guera di Armagedon. Tambe nos lo repasa algun promesa di Reino cu lo cumpli despues di esey. Esta contento nos lo ta ora e tempo yega cu e Reino di Dios ta goberna henter e Tera y lo “haci tur cos nobo”!—Rev. 21:5, BS.