1, 2. (a) Dicon tin biaha ta dificil pa mira Paradijs como algo real? (b) Kico por yuda nos fortalece nos fe den e promesanan di Dios?

 UN RUMAN HOMBER fiel ta yega reunion morto cansa. E ta yen di stress. E mester a soporta e trato malo di su hefe exigente. E ta preocupa pa e maleza di su esposa y si e por percura pa su famia. E ta hala un rosea profundo ora e prome cantica cuminsa, y e ta sinti un alivio, ya cu e ta contento di ta na Salon di Reino hunto cu su rumannan. E cantica ta tocante e speransa di bida den Paradijs, y e letra ta pon’e visualisa e Paradijs, y imagina cu e ta eynan. Semper el a gusta e cantica aki, y segun cu e ta cant’e hunto cu su famia, e speransa pa futuro ta consol’e.

² Abo a yega di sinti asina? Pa mayoria di nos e contesta ta si. Pero nos ta biba den “temponan critico, dificil pa trata cu ne”, y mundo ta leu di ta un paradijs. Pesey kisas ta dificil pa nos mira e binidero Paradijs como algo real. (2 Tim. 3:1) Kico por yuda nos mira nos speransa como algo real? Con nos por sa cu di berdad e Reino di Dios pronto lo goberna henter humanidad? Wel, ban wak algun di e profecianan di Jehova cu su pueblo a mira cumpli den antiguedad. Despues nos lo wak con e profecianan ey y otronan similar ta cumpliendo den nos tempo. Esaki sigur lo fortalece nos fe. Finalmente, nos lo enfoca riba con e profecianan ey lo cumpli den futuro.

3. Ki promesa a consola e Hudiunan cu tabata den exilio na Babilonia?

³ Purba di imagina con bida tabata pa e Hudiunan cu tabata biba na Babilonia un 600 aña prome cu Cristo. Hopi di nan, mescos cu nan mayornan, a lanta ey den exilio y bida tabata duro. E hendenan di Babilonia tabata haci bofon di nan pasobra nan tabatin fe den Jehova. (Sal. 137:1-3) Pero a traves di decadanan, Hudiunan leal a sigui pone confianza den e promesa cu Jehova a haci, esta, di hiba su pueblo bek na Juda, nan patria. Jehova a bisa cu eynan nan lo biba bon. Hasta el a bisa cu Juda lo bira manera e Hofi di Eden, si, un paradijs. (Lesa Isaias 51:3.) Ta bisto cu e promesanan ey tabata pa  trankilisa e pueblo di Dios y pa kita e dudanan cu nan tabatin. Con asina? Wel, laga nos analisa algun profecia specifico.

4. Ki siguransa Jehova a duna e Hudiunan?

⁴ Siguridad. E Hudiunan den exilio lo no a bolbe na un paradijs literal, sino na un pais leu cu tabata desola pa 70 aña, un pais cu masha poco di nan a yega di mira. Den tempo di Bijbel tabatin hopi leon, lobo, leopardo y otro bestia salbahe. Kisas un tata di famia a puntra su mes: Kico mi tin cu haci pa mi casa cu mi yiunan por ta safe? Kico di mi carnenan y mi bacanan? Con mi por proteha nan? Ta di compronde cu e hendenan lo tabatin e preocupacionnan ey. Pero pensa riba e promesa di Dios cu tin na Isaias 11:6 pa 9 y imagina bo ki un gran consuelo esey lo mester tabata pa e pueblo. (Les’e.) Cu palabranan poetico masha bunita, Jehova a sigura e Hudiunan cu nan bestianan lo ta safe. Leon lo a come yerba den e sentido cu lo e no a habraca e bacanan di e Hudiunan. Hende fiel lo no mester a tene miedo di e bestianan salbahe ey. Jehova a priminti cu lo e proteha su pueblo den e pais caminda nan lo bolbe bek, esta, Juda, si, hasta den desierto y den mondi.—Eze. 34:25.

5. Cua profecianan a duna e Hudiunan cu lo a regresa nan pais e siguransa cu Jehova lo a percura na abundancia pa nan necesidadnan?

⁵ Abundancia. Lo por a surgi otro preocupacion tambe. Un Hudiu lo por a puntra su mes: Den e pais caminda nos lo bolbe lo tin cuminda pa mi duna mi famia? Unda nos ta bay biba? Lo tin trabou? Esaki lo ta mihor cu e trabou laf y pisa cu nos ta haciendo den exilio? Via di profecianan, Jehova a contesta e preguntanan ey tambe bondadosamente. El a priminti su pueblo obedecido cu awa lo yobe asina hopi cu e tera lo a produci grano “rico y abundante” pa traha pan. (Isa. 30:23) Kico di luga di biba y trabou? Jehova a priminti su pueblo: “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come.” (Isa. 65:21, 22) Si, den hopi aspecto nan bida lo a bay ta maraviyoso compara cu e periodo cu nan a biba den exilio na Babilonia pagano. Pero kico di nan problemanan mas serio, esnan cu a pone cu nan a ser hiba den exilio?

6. Di ki tipo di problema di salud e pueblo di Dios a sufri pa hopi tempo, y ki siguransa Jehova a duna e Hudiunan cu lo a regresa nan pais?

⁶ Salud spiritual. Hopi prome cu e pueblo di Dios a ser hiba den exilio, nan a bira malo den sentido spiritual. Via profeta Isaias, Jehova a bisa tocante su pueblo: “Henter e cabes ta malo, y henter e curason ta desmaya.” (Isa. 1:5) Den sentido spiritual, nan tabata ciego y sordo, ya cu nan a cera nan horea pa nan no tende e conseho di Jehova, y nan a cera nan wowo pa nan no haya e iluminacion spiritual cu e tabata ofrece nan. (Isa. 6:10; Jer. 5:21; Eze. 12:2) Si e Hudiunan cu a regresa nan pais tabatin e mesun problemanan ey, nan lo no a bolbe perde e aprobacion di Jehova? Jehova a priminti nan  algo cu lo mester a trankilisa nan. El a bisa: “Den e dia ey e sordo lo tende palabranan di un buki, y for di nan tiniebla y scuridad wowonan di e ciego lo mira.” (Isa. 29:18) Si, Jehova lo a cura su pueblo, cu a ser disciplina y cu a arepenti, den sentido spiritual. Tanten cu nan a keda obedecido y a reacciona faborablemente, Jehova lo a duna nan instruccion y iluminacion spiritual.

7. Con Dios a cumpli cu e promesanan cu el a haci e Hudiunan den exilio, y dicon esaki mester fortalece nos fe?

⁷ Acaso Jehova a cumpli cu su promesanan? Nos tin cu bay bek den historia pa haya e contesta ey. E Hudiunan cu a regresa nan pais a ser bendiciona cu siguridad, abundancia y bon salud spiritual. Por ehempel, Jehova a proteha nan di e paisnan bisiña cu tabata mas fuerte y mas hopi cu nan. Bestia salbahe no a caba cu e bestianan di e Hudiunan. Ta berdad cu e Hudiunan ey a mira solamente un cumplimento limita di e profecianan di paradijs cu hombernan manera Isaias, Jeremias y Ezekiel a skirbi, pero asina mes, e cumplimento cu e pueblo di Dios a mira tabata emocionante y precies loke nan tabatin mester e tempo ey. Ta bon pa nos medita riba loke Jehova a haci pa su pueblo den e tempo ey, ya cu esaki lo fortalece nos fe. Si e cumplimento inicial y na escala limita mes tabata asina emocionante, con e cumplimento na escala grandi lo ta? Ban wak kico Jehova ta haci pa nos awe.

8. E sirbidornan di Jehova di nos tempo ta biba den ki tipo di “tera”?

⁸ Awe Jehova su sirbidornan no ta forma un nacion literal, ni nan no ta biba den un solo pais. Mas bien, cristiannan ungi ta forma un nacion spiritual, “e Israel di Dios.” (Gal. 6:16) Nan compañeronan, e “otro carne[nan]”, ta join nan den Jehova su organisacion cu ta manera un “tera” of pais spiritual den cua nan ta adora Jehova Dios na un manera uni. E adoracion ey ta un manera di biba. (Juan 10:16; Isa. 66:8) Anto ta ki tipo di “tera” Jehova a duna nos? Esey ta un paradijs spiritual. Den dje e promesanan di Dios tocante condicionnan manera tabatin den Hofi di Eden a haya un cumplimento spiritual maraviyoso. Laga nos wak algun ehempel.

9, 10. (a) Con e profecia di Isaias 11:6 pa 9 ta cumpliendo awe? (b) Kico ta duna prueba cu paz ta reina den e pueblo di Dios?

⁹ Siguridad. E profecia na Isaias 11:6 pa 9 ta describi na un manera bunita con hende cu nan bestianan domestico lo ta na paz cu bestia salbahe. E profecia ey tin un cumplimento spiritual awe? Sigur cu si! Versiculo 9 ta bisa nos dicon e bestianan ey lo no causa daño ni destruccion: “Pasobra Tera lo ta yen di e conocemento di SEÑOR, manera awa ta tapa lama.” “Conocemento di [Jehova]” por cambia comportacion di bestia? No, ta hende ta ser transforma ora nan siña conoce e Dios Haltisimo y cuminsa imita su manera pacifico di actua. Ta  pesey nos por mira un cumplimento animante di e profecia ey den nos paradijs spiritual awe. E siguidornan di Cristo ta siñando bou di gobernacion di e Reino pa deshaci di nan cualidadnan feroz y cruel manera di bestia y pa biba na paz y harmonia cu nan rumannan spiritual.

¹⁰ Por ehempel, den e buki aki nos a trata e asunto di nos posicion neutral como cristian. Nos a analisa e base biblico cu a pone nos tuma e posicion ey. Ademas, nos a wak tambe con e pueblo di Dios a confronta persecucion pa motibo di nan posicion. Esaki no ta remarcabel? Den e mundo violento aki tin un “nacion” basta grandi di hende cu ta nenga rotundamente, hasta bou di menasa di morto, di participa den cualkier tipo di violencia. Esey ta un prueba notabel cu e ciudadanonan di e Rey Mesianico en berdad ta gosa di paz manera Isaias a describi. Hesus a declara cu su siguidornan lo ta conoci pa e amor cu nan tin pa otro. (Juan 13:34, 35) Den e congregacion, Cristo cu pasenshi ta uza su “esclavo fiel y prudente” pa siña tur cristian berdadero pa nan ta hende pacifico, amoroso y suave.—Mat. 24:45-47.

11, 12. Ki tipo di hamber e mundo ta sufri di dje awe, pero con Jehova a percura provision na abundancia pa su pueblo?

¹¹ Abundancia. Mundo ta sufri di hamber spiritual. Bijbel a spierta: “‘Mira, dianan ta bin’, SEÑOR Dios ta declara, ‘cu lo  mi manda hamber riba e Tera; no hamber pa pan ni sed pa awa, ma mas bien pa tende e palabranan di SEÑOR.’” (Amos 8:11) Acaso e ciudadanonan di e Reino di Dios tambe ta pasa hamber? No. Jehova a profetisa e siguiente contraste entre su pueblo y su enemigonan: “Mi sirbidornan lo come, ma boso lo pasa hamber. Mira, mi sirbidornan lo bebe, ma boso lo tin sed. Mira, mi sirbidornan lo regociha, ma boso lo wordo brongosa.” (Isa. 65:13) Abo ta mira cumplimento di e palabranan ey?

¹² Constantemente nos ta haya provision spiritual cu ta core manera un riu cu ta birando mas y mas hancho y hundo. E provisionnan ey ta consisti di nos publicacionnan basa riba Bijbel, tambe di grabacionnan audio y video, nos reunionnan y congresonan y loke ta publica riba nos website. Tur esaki ta cuminda spiritual na abundancia den un mundo cu ta muriendo di hamber spiritual. (Eze. 47:1-12; Joel 3:18) Bo no ta haya cu ta emocionante pa mira con Jehova su promesa cu e lo percura provision na abundancia ta cumpliendo den bo bida diario? Bo ta percura pa alimenta bo mes cu regularidad na e mesa di Jehova?

13. Abo a mira cumplimento di e promesa di Jehova cu hende ciego lo mira y hende sordo lo scucha?

¹³ Salud spiritual. Awe, den sentido spiritual, tin un epidemia mundial di hende ciego y sordo. (2 Cor. 4:4) Pero rond mundo, Cristo ta curando enfermedadnan y debilidadnan. Abo a wak hende ciego mira y hende sordo tende? Bo a yega di mira hende haya un conocemento exacto di e berdad cu tin den e Palabra di Dios y stop di kere e mentiranan religioso cu un tempo tabata haci nan ciego y sordo pa e berdad? Si ta asina, bo a mira e siguiente promesa cumpli: “Den e dia ey e sordo lo tende palabranan di un buki, y for di nan tiniebla y scuridad wowonan di e ciego lo mira.” (Isa. 29:18) Tur aña, cientos di miles di hende di tur parti di mundo ta ser cura spiritualmente. Cada hende cu bandona Babilonia e Grandi y join nos pa adora Jehova den e paradijs spiritual ta un prueba convencente cu e promesanan di Jehova a cumpli.

14. Kico por fortalece bo fe?

¹⁴ Cada un di e capitulonan di e buki aki a duna evidencia convencente cu Cristo a uni su siguidornan den un berdadero paradijs spiritual den e tempo di fin aki. Laga nos sigui medita riba e tantisimo bendicionnan cu nos ta ricibi den e paradijs ey awe. Si nos haci esey, nos fe den Jehova su promesanan pa futuro lo bira mas fuerte.

15. Dicon nos por ta sigur cu e Tera lo bira un paradijs?

¹⁵ For di cuminsamento e proposito di Jehova tabata pa haci henter e Tera un paradijs. El a pone Adam cu Eva den un bunita hofi y a bisa nan pa yena e Tera cu nan yiunan y cuida  tur e bestianan riba Tera. (Gen. 1:28) Na luga di haci esey, Adam cu Eva a bay tras di Satanas den su rebelion y a pasa imperfeccion, pica y morto pa tur nan yiunan. Pero Dios su proposito no a cambia nunca. Unabes Jehova bisa algo, su palabranan semper ta cumpli. (Lesa Isaias 55:10, 11.) Pues, nos por ta sigur cu un dia e descendientenan di Adam cu Eva lo yena e Tera aki y hacie bira un paradijs, y nan lo cuida e creacion di Jehova cu amor. Na e tempo ey, e profecianan cu Jehova originalmente a duna e Hudiunan den exilio tocante bida den un paradijs lo cumpli den tur sentido. Wak e siguiente ehempelnan.

16. Con Bijbel ta describi e siguridad cu nos lo tin den Paradijs?

¹⁶ Siguridad. Porfin e descripcion bunita cu tin na Isaias 11:6 pa 9 lo cumpli completamente, hasta den sentido literal. Hende homber, muher y mucha lo ta safe y nan lo sinti nan sigur na unda cu nan bay riba Tera. Niun criatura, sea hende of bestia, lo no forma un peliger pa otro. Imagina bo un tempo ora cu lo bo por considera henter nos planeta manera bo cas, caminda bo por landa den riu y lama; cana den seronan y den sabana sin cu nada malo pasa bo. Anto lo bo no tin nodi preocupa ora bira anochi. E palabranan di Ezekiel 34:25 lo bira realidad, di manera cu e pueblo di Dios lo por hasta “biba trankil den desierto y drumi den e mondinan.”

17. Dicon nos por ta sigur cu Jehova lo percura na abundancia pa nos necesidadnan ora e Reino ta goberna henter e Tera?

¹⁷ Abundancia. Imagina bo un tempo ora cu lo no tin pobreza, onderstand, desnutricion ni hamber mas. E abundancia di cuminda spiritual cu e pueblo di Dios ta disfruta di dje awe ta un garantia cu e Rey Mesianico lo alimenta su ciudadanonan den tur sentido. Tempo Hesus tabata riba Tera, el a demostra na un escala chikito cu e por cumpli cu e promesanan ey, ya cu el a alimenta miles di hende cu tabatin hamber cu djis algun pan y pisca. (Mat. 14:17, 18; 15:34-36; Mar. 8:19, 20) Ora e Reino di Dios ta goberna henter e Tera, nos lo mira e cumplimento literal di profecianan manera esun aki: “E lo duna bo awasero pa e simia cu lo bo sembra den tera, y pan for di e produccion di tera, y esaki lo ta rico y abundante. Den e dia ey bo bestianan lo come den un luga di yerba berde cu tin hopi espacio.”—Isa. 30:23.

18, 19. (a) Kico e profecia cu tin na Isaias 65:20 pa 22 ta nifica pa bo? (b) Den ki sentido nos dianan lo ta “manera e dianan di un palo”?

¹⁸ Awe tin hopi hende cu no por imagina nan cu algun dia nan lo ta doño di un cas comodo of cu nan lo haya un trabou agradabel pa haci cu ta duna nan satisfaccion. Den e mundo corupto aki, hopi hende ta haya cu nan tin cu traha mata bichi pa hopi ora pero sin cu nan ta haya berdadero beneficio pa nan mes of pa nan famia, mientras cu hende rico y golos pa placa ta bira cada bes mas rico. Imagina bo con bida lo ta ora cu e profecia aki cumpli rond mundo: “Nan lo traha cas y biba den nan; tambe nan lo planta cunucunan di wendruif  y come nan fruta. Nan lo no traha cas pa otro hende biba aden, ni planta pa otro hende come; pasobra manera e dianan di un palo, asina e dianan di mi pueblo lo ta; y mi scoginan lo disfruta di e obra di nan mannan.”—Isa. 65:20-22.

¹⁹ Kico Bijbel kiermen cu nos dianan lo ta “manera e dianan di un palo”? Ora bo para banda di e troncon di un palo grandi, bo no ta keda impresiona ora bo pensa cuanto tempo e palo ey tin para eynan, kisas hopi prome cu bo bisawelonan mes a nace? Kisas bo ta pensa cu si bo keda imperfecto manera bo ta awor, un palo asina lo biba mas largo cu bo y sigui existi pa hopi tempo, mientras cu ya bo mes a bira stof caba. Esta bondadoso di Jehova pa sigura nos cu den e Paradijs binidero nos dianan lo ta largo y yen di paz! (Sal. 37:11, 29) Lo yega e dia cu hasta palo cu ta biba largo lo ta manera yerba pasahero den nos bista, ya cu nan lo t’ey pa djis un tempo mientras cu nos mes ta sigui biba pa semper.

20. Con ciudadanonan leal di e Reino lo haya salud perfecto?

²⁰ Salud perfecto. Awe, nos tin miedo di bira malo y muri. Den un sentido, nos tur ta malo, infecta cu un maleza terminal cu yama pica. E unico cura pa esey ta e sacrificio di rescate di Cristo. (Rom. 3:23; 6:23) Durante e Reinado di Mil Aña, Hesus cu su cogobernantenan lo yuda hende beneficia plenamente di e sacrificio ey, y gradualmente nan lo elimina tur efecto di pica. E profecia di Isaias lo cumpli den tur sentido: “Ningun habitante lo no bisa: ‘Mi ta malo’; e pueblo cu ta biba ayanan lo wordo pordona pa nan inikidad.” (Isa. 33:24) Imagina bo un tempo ora cu niun hende lo no ta ciego, sordo ni mancaron. (Lesa Isaias 35:5, 6.) Lo no tin ni un maleza cu Hesus no por cura, sea ta maleza fisico, mental of emocional. Ciudadanonan leal di e Reino lo gosa di salud perfecto.

21. Kico lo pasa cu morto, y dicon bo ta haya e promesa ey un gran consuelo?

²¹ Pero kico di e posibel consecuencia di maleza, e resultado inevitabel di pica, esta, morto? Esey ta nos “ultimo enemigo”, y tardi of trempan tur hende imperfecto ta perde nan bataya contra e enemigo aki. (1 Cor. 15:26) Acaso morto ta un enemigo cu por intimida Jehova? No. Tuma nota di loke Isaias a profetisa: “E lo traga morto pa semper, y Señor DIOS lo seca awa di wowo for di tur cara.” (Isa. 25:8) Abo por imagina bo e tempo ey? Lo no tin entiero mas, ni santana, ni lagrima di tristeza. Al contrario, lo tin lagrima di alegria segun cu Jehova ta cumpli cu su promesa emocionante di resucita e mortonan. (Lesa Isaias 26:19.) Porfin e herida grandi cu morto a causa lo cura.

22. Kico lo sosode despues cu e Reino Mesianico a cumpli cu Dios su boluntad riba Tera?

²² Na final di e Mil Aña, e Reino lo a cumpli cu Dios su boluntad riba Tera, y e ora ey Cristo lo entrega e gobernacion na su Tata. (1 Cor. 15:25-28) Porfin humanidad lo ta perfecto y cla pa enfrenta un ultimo prueba ora cu Satanas sali for di su  abismo, esta, for di su estado di inactividad. Despues di esaki, Cristo finalmente lo destrui e colebra malbado ey hunto cu tur su compinchinan. (Gen. 3:15; Rev. 20:3, 7-10) Pero tur hende leal cu ta stima Jehova lo tin un futuro briyante nan dilanti. Kisas no tin mihor palabra pa describi esey cu esnan inspira cu nos ta haya na Romanonan 8:21. Eynan nos ta haya e promesa cu hende fiel lo tin “e glorioso libertad di e yiunan di Dios.”

23, 24. (a) Dicon e promesanan di Dios lo cumpli sigur? (b) Kico abo ta determina pa haci?

²³ E promesanan ey no ta djis un speransa, deseo of ilusion. E promesanan di Jehova ta cumpli sigur. Dicon? Wel, corda e palabranan di Hesus cu nos a trata den e prome capitulo di e buki aki. El a siña su siguidornan pidi Jehova: “Laga bo Reino bin. Laga bo boluntad sosode, mescos cu den cielo, tambe riba Tera.” (Mat. 6:9, 10) E Reino di Dios no ta producto di un hende su imaginacion. E ta real. E ta gobernando den cielo na e momentonan aki. E tin 100 aña caba ta cumpli cu e promesanan di Jehova na maneranan hopi bisto den e congregacion cristian. Pues, nos por ta sigur cu tur e promesanan di Jehova lo cumpli ora cu e Reino di Dios bin pa eherce tur su autoridad riba Tera.

²⁴ Nos sa cu e Reino di Dios lo bin. Nos sa cu delaster un palabra cu Jehova a priminti lo ser realisa. Con nos por sa esey? Pasobra E REINO DI DIOS YA TA GOBERNA. E pregunta cu cada un di nos tin cu haci nos mes ta: E Reino ta goberna mi bida? Laga nos haci tur loke ta na nos alcance pa biba aworaki como ciudadanonan leal di e Reino, ya asina nos por beneficia di su gobernacion husto y perfecto pa semper.