PARTI 3
Con Bida den Paradijs Tabata?
Jehova a duna Adam cu Eva hopi cos bon. Genesis 1:28
Jehova a crea e prome muher, Eva, y a dun’e na Adam como su esposa.—Genesis 2:21, 22.
Jehova a crea nan cu mente y curpa perfecto, sin ningun defecto.
El a duna nan e hofi di Eden pa biba aden. E hofi aki tabata un paradijs—un luga masha bunita cu riu, palo di fruta y yen di bestia.
Jehova a papia cu nan y a siña nan. Si nan a scucha Dios, nan lo a biba pa semper den Paradijs riba tera.
Dios a bisa pa no come di un cierto palo. Genesis 2:16 y 17
Jehova a mustra Adam cu Eva un palo di fruta den e hofi y el a bisa nan: ‘Boso no mag come di dje. Si boso come di dje, boso lo muri.’
Un angel a lanta contra Dios. E angel malbado ey ta Satanas e Diabel.
Satanas no tabata kier pa Adam cu Eva obedece Jehova. Pesey, el a uza un colebra pa bisa Eva cu lo e no muri si e come di e fruta di e palo, sino cu lo e bira manera Dios. Claro cu esey no tabata berdad.—Genesis 3:1-5.
