NOS sirbishi ta importante y valioso. Pero no ta tur hende cu nos ta predica na dje ta compronde esey. Tin biaha hasta hende cu ta mustra interes den e mensahe di Bijbel no ta haya cu ta necesario pa studia Bijbel cu nos.

Esey tabata e caso di Gavin. Aunke cu el a cuminsa asisti na e reunionnan, e no a acepta un estudio di Bijbel. El a bisa: “Mi tabatin masha poco conocemento di e Scritura, pero mi no tabata kier pa hende haya sa esey. Mi tabatin miedo pa hende gaña mi, y mi no kier a mara mi mes na un religion.” Kico abo lo a pensa? Acaso Gavin tabata un caso perdi? No. Bijbel por tin un bon influencia riba hende. Jehova a bisa su pueblo di antiguedad: “Laga ... mi discurso gotia manera serena, manera gota di awa riba yerba fresco.” (Deu. 31:19, 30; 32:2) E caracteristicanan di serena ta ilustra bon con nos por yuda tur sorto di hende den sirbishi na un manera eficaz. Laga nos ban wak.—1 Tim. 2:3, 4.

Serena ta suave. Serena ta forma gradualmente ora humedad den aire bira gotanan chikito di awa. Con e palabranan di Jehova a “gotia manera serena”? Wel, el a papia cu su pueblo na un manera bondadoso, suave y respetuoso. Nos ta imita Jehova ora nos ta mustra respet pa e opinion di otro hende door di anima nan pa rasona y pa saca nan propio conclusion. Ora nos mustra interes personal den hende, nan lo ta mas dispuesto pa acepta loke nos ta bisa y nos lo ta mas efectivo den sirbishi.

Serena ta refrescante. Nos sirbishi por ta refrescante pa otro hende ora nos pensa con nos por lanta nan interes. Chris, e ruman cu a ofrece Gavin un estudio di Bijbel, no a fors’e pa studia. Al contrario, el a purba varios manera pa pone Gavin sintie comodo ora nan papia tocante Bijbel. Chris a splica Gavin cu Bijbel tin un tema principal, y si e haya sa kico e tema ey ta, esey lo por yud’e compronde loke ta ser bisa na e reunionnan mas mihor. Despues, Chris a splica Gavin cu ta profecianan di Bijbel a convenc’e personalmente cu loke Bijbel ta bisa ta berdad. Como resultado, nan a papia varios biaha tocante cumplimento di profecia. E combersacionnan aki a lanta su interes, y finalmente el a acepta un estudio di Bijbel.

Serena ta importante pa sostene bida. Durante e temporada di secura y calor na Israel, awa por keda sin cay pa varios luna. Sin serena, e matanan lo seca y muri. Jehova a profetisa cu den nos tempo lo bay tin un secura spiritual. (Amos 8:11) Pero el a priminti cu esnan ungi lo ta “manera serena for di SEÑOR” ora nan predica e bon noticia di Reino hunto cu e “otro carne[nan].” (Mik. 5:7; Juan 10:16) E mensahe cu nos ta predica ta duna bida na esnan cu tin sed pa e berdad. Abo ta considera e mensahe aki valioso?

Serena ta un bendicion di Jehova. (Deu. 33:13) Nos sirbishi por ta un bendicion pa esnan cu ta scucha nos. Esey tabata e caso di Gavin. Dicon? Pasobra ora Gavin a cuminsa studia, el a haya contesta pa tur su preguntanan. El a progresa lihe y a batisa. Y awor e ta predica e bon noticia di Reino hunto cu su esposa, Joyce.

Ora nos compara e trabou di predica cu serena, esey por yuda nos compronde cu e esfuerso cu nos ta haci den sirbishi ta valioso. Con asina? Un gota di awa so no ta yuda dje hopi ey, pero miyones di gota di serena si ta satura e tera. Di igual manera, loke nos ta haci individualmente den sirbishi por parce poco. Sinembargo, e esfuerso cu miyones di sirbidor di Jehova rond mundo ta haci ta un testimonio pa “tur nacion.” (Mat. 24:14) Manera nos por a mira, nos sirbishi por resulta di ta un bendicion di Jehova si e mensahe cu nos ta predica ta manera serena: suave, refrescante y ta sostene bida.