Pregunta di Lector
Kico ta e “garantia” y e “seyo” cu cada cristian ungi ta ricibi di Dios?—2 Cor. 1:21, 22.
Den pasado, nan tabata primi un renchi di seyo den klei of wax pa indica cu un documento ta autentico
Garantia: Segun un buki di consulta, e palabra Griego traduci como “garantia” na 2 Corintionan 1:22 tabata “un expresion tecnico cu tabata ser uza den asuntonan legal y comercial.” E expresion aki ta nifica e “prome cuota, deposito, down payment of borg cu un persona ta paga di antemano como parti di e prijs di compra di un articulo. E pago ey ta haci un contract valido y ta duna e persona e derecho legal pa ricibi e articulo en cuestion.” Den caso di e unginan, 2 Corintionan 5:1 pa 5 ta laga nos compronde cu nan ta haya nan pago, of recompensa, completo ora nan bisti un curpa celestial incoruptibel. E recompensa ta inclui e regalo di inmortalidad.—1 Cor. 15:48-54.
Griego moderno tin un expresion cu ta referi na renchi di compromiso y cu ta relaciona cu e palabra garantia. Esaki ta un bon ilustracion pa describi esnan cu lo forma parti di e esposa figurativo di Cristo.—2 Cor. 11:2; Rev. 21:2, 9.
Seyo: Den pasado, hende tabata uza seyo como firma pa proba cu nan ta doño di algo, cu algo ta autentico of como prueba di un combenio. Den caso di e unginan, ora Dios ta “seya” of marca nan, ta comosifuera Jehova ta marca nan pa demostra cu nan ta pertenece na dje. (Efe. 1:13, 14) Pero e seyo aki ta bira permanente un poco prome cu e persona muri fiel of prome cu e tribulacion grandi cuminsa.—Efe. 4:30; Rev. 7:2-4.