1, 2. (a) Con nos por sa cu hende por bira amigo di Dios? (b) Kico nos lo trata den e articulo aki?

FOR di ora nos nace te ora nos muri, nos tin mester di amor. Si, nos mester di e amor di nos amigonan y famianan, y no solamente amor romantico. Pero e amor cu mas nos tin mester di dje ta e amor di Jehova. Hopi hende ta kere cu nan no por tin un amistad cu Dios pasobra e ta invisibel y todopoderoso. Anos tambe ta kere esey? Claro cu no!

² Bijbel ta siña nos cu hende imperfecto a bira amigo di Dios. Ta bale la pena pa nos siña for di nan ehempel. Dicon? Pasobra e meta di mas importante cu nos mester tin den bida ta pa bira amigo di Dios. Laga nos trata e ehempel sobresaliente di Abraham, kende tabatin un bon amistad cu Jehova. (Lesa Santiago 2:23.) Kico a yuda Abraham haya un bon amistad cu Dios? Su fe a hunga un rol sumamente importante den esey. Pesey Bijbel ta yama Abraham “tata di tur hende cu Dios ta considera husto pa motibo di nan fe.”  (Rom. 4:11) Segun cu nos ta considera e ehempel di Abraham, ta bon pa cada un di nos puntra nos mes: Con mi por imita Abraham su fe y mehora mi amistad cu Dios?

3, 4. (a) Describi kico probablemente tabata e prueba di mas grandi di Abraham su fe. (b) Dicon Abraham tabata dispuesto pa sacrifica Isaak?

³ Purba imagina Abraham, kende tabatin 125 aña di edad, subiendo Sero Moria pocopoco. ^[1] Abraham no tabata su so; Isaak, kende tabatin mas o menos 25 aña di edad, tabata cana su tras y e tabata carga palo. Abraham tabatin un cuchiu y loke e tabatin mester pa cende un candela. Probablemente esaki tabata e biahe di mas dificil di su bida. No ta pasobra e tabata grandi. Ainda e tabatin hopi energia. E biahe tabata dificil pasobra Jehova a pidie pa sacrifica su yiu.—Gen. 22:1-8.

⁴ Probablemente, esaki tabata e prueba di mas grandi di Abraham su fe. Tin hende ta bisa cu Dios tabata cruel ora el a pidie pa sacrifica su yiu. Y tin otronan ta bisa cu Abraham tabata dispuesto pa sacrifica su yiu pasobra e no tabata stim’e. Nan ta pensa asina pasobra nan no tin fe y nan no sa kico berdadero fe ta. (1 Cor. 2:14-16) Pero Abraham no a obedece Dios ciegamente, mas bien, el a obedec’e pasobra e tabatin berdadero fe. E tabata sa cu Jehova nunca lo pidie pa haci algo cu lo caus’e daño permanentemente. Abraham tabata sa cu si e obedece Jehova, Jehova lo bendiciona tanto e mes como su yiu, Isaak. Dicon Abraham tabatin un fe asina grandi? Pasobra e tabatin conocemento y experencia.

5. Con probablemente Abraham a siña conoce Jehova, y ki efecto esey tabatin riba dje?

⁵ Conocemento. Aunke Abraham a lanta den Ur, un stad cu tabata pesta cu idolatria, toch el a siña conoce Jehova. Con esey tabata posibel siendo cu su tata, Tare, tabata adora dios falso? (Jos. 24:2) Bijbel no ta bisa specificamente, pero loke si e ta bisa ta cu Abraham tabata descendiente di Sem, un di e yiunan di Noe. Sem a muri ora Abraham tabatin rond di 150 aña. Sem tabatin un fe grandi y probablemente el a papia cu su famia tocante Jehova. Nos no tin sigur, pero ta posibel cu Abraham a siña conoce Jehova di e manera aki. Loke Abraham a siña a touch su curason, y asina su fe y amor a crece.

6, 7. Con e experencianan cu Abraham a pasa aden a fortalece su fe?

⁶ Experencia. Con e experencia cu Abraham a pasa aden a fortalece su fe? Tin hende ta bisa cu pensamento ta hiba na sintimento y sintimento ta hiba na accion. Loke Abraham a siña tocante Jehova a touch su curason, y esey, na su turno, a yud’e haya un respet profundo pa Jehova “e Dios Haltisimo, Creador di cielo y di Tera.” (Gen. 14:22) E respet profundo ey ta loke Bijbel ta yama “temor di Dios.” Y esey ta algo sumamente importante pa nos por haya un bon amistad cu Jehova. (Heb. 5:7; Sal. 25:14) Ta e cualidad ey a motiva Abraham pa obedece Jehova.

⁷ Dios a bisa Abraham cu Sara pa bandona Ur y muda bay un otro pais. Nan no tabata jong mas, y nan lo mester a biba den tent pa resto di nan bida. Aunke Abraham tabata sa cu e lo enfrenta  peliger, e tabata determina pa obedece Jehova. Y pa e motibo ey Jehova a bendicion’e y proteh’e. Por ehempel, Abraham tabatin miedo cu nan lo kita Sara for di dje y cu nan lo mat’e pa keda cu su esposa. Pero varios biaha Jehova milagrosamente a proteha tanto Abraham como Sara. (Gen. 12:10-20; 20:2-7, 10-12, 17, 18) E experencianan ey a fortalece Abraham su fe.

8. Unda nos por haya e conocemento y e experencia cu por yuda nos haya un bon amistad cu Jehova?

⁸ Kico di nos? Anos por ta amigo di Jehova? Claro cu si! Mescos cu Abraham, nos mester siña conoce Jehova. Awe nos por haya e conocemento y e experencia cu nos tin mester den Bijbel. Danki na Bijbel, nos tin hopi mas informacion cu Abraham tabatin e tempo aya. (Dan. 12:4; Rom. 11:33) E Palabra di Dios ta yen di tesoro cu por yuda nos conoce e “Creador di cielo y di Tera” mas mihor. Y esey ta yuda nos haya un respet y amor profundo p’e. E amor y respet aki ta motiva nos pa obedece Jehova. Ora nos obedec’e, nos ta mira con e ta proteha, bendiciona y fortalece nos, y di e manera ey nos ta haya experencia. Y ora nos sirbi Jehova cu henter nos curason, nos lo haya satisfaccion, paz y goso. (Sal. 34:8; Prov. 10:22) Mas nos siña conoce Jehova y experencia con e ta bendiciona nos, mas mihor nos amistad cu ne lo bira.

9, 10. (a) Kico nos mester haci si nos kier mantene un amistad? (b) Kico Abraham a haci pa demostra cu e tabata balora su amistad cu Jehova?

⁹ Nos por compara un amistad cu un tesoro valioso. (Lesa Proverbionan 17:17.) Pero un amistad no ta manera un vaas cu bo por cumpra anto pronk e un caminda. Amistad ta manera un flor bunita cu mester di awa y cuido pa e florece. Di e manera ey Abraham a balora su amistad cu Jehova. Con el a demostra esey?

¹⁰ Abraham a sigui haci esfuerso pa teme Jehova y obedec’e. Por ehempel, ora e cu su famia a bay Canaan, el a sigui confia den Jehova y a busca Jehova su guia ora e mester a tuma decisionnan, sea chikito of grandi. Un aña prome cu Isaak a nace, tempo cu Abraham tabatin 99 aña, Jehova a mand’e circuncida tur hende homber di su cas. Acaso Abraham a cuestiona Jehova of busca un excuus pa e no haci loke el a pidie? No, el a confia den Jehova, y el a obedec’e “riba e mesun dia ey.”—Gen. 17:10-14, 23.

11. Dicon Abraham tabata preocupa tocante e destruccion di Sodoma y Gomora, y con Jehova a trankilis’e?

 ¹¹ Door cu Abraham semper a obedece Jehova, hasta den cos chikito, su amistad cu Jehova a bira mas fuerte. El a sinti cu e por papia cu Jehova tocante cualkier cos, hasta ora e tabatin duda. Por ehempel, ora Abraham a haya sa cu Dios tabata bay destrui e stadnan Sodoma y Gomora, e tabatin miedo cu e hendenan husto tambe lo ser destrui. Kisas Abraham tabata preocupa pa su subrino Lot cu su famia, kendenan tabata biba na Sodoma. Abraham a confia den Jehova “e Hues di henter mundo”, y pesey humildemente e tabata expresa su preocupacionnan na Jehova. Cu pasenshi Jehova a splica Abraham cu e ta un Dios misericordioso, y cu hasta den tempo di huicio, e por lesa curason di hende pa e mira ken ta husto pa e scapa nan.—Gen. 18:22-33.

12, 13. (a) Con e conocemento y e experencia cu Abraham a haya a yud’e mas despues? (b) Kico ta mustra cu Abraham tabata confia den Jehova?

¹² Sin duda, tur e conocemento y experencia cu Abraham a haya a yud’e mantene un bon amistad cu Jehova. Pesey, mas despues ora cu Jehova a pidi Abraham pa sacrifica Isaak, e tabata sa cu semper Jehova ta confiabel, ta misericordioso, ta mustra pasenshi y ta proteha su sirbidornan. Niun momento Abraham a pensa cu Jehova a bira duro ni cruel. Con nos por sa esey?

¹³ Prome cu Abraham a bay laga su sirbidornan cu tabata hunto cu ne, el a bisa nan: “Keda aki cu e burico, y ami cu e mucha lo bay ayanan; y nos lo adora y bolbe cerca boso.” (Gen. 22:5) Kico Abraham tabata kiermen? Ta gaña el a gaña su sirbidornan cu e lo regresa cu Isaak sabiendo cu e tabata bay sacrific’e? No, Bijbel ta bisa cu Abraham tabata sa cu Jehova por a resucita Isaak. (Lesa Hebreonan 11:19.) El “a rasona cu Dios por a lanta su yiu [Isaak] hasta for di morto.” Si, el a kere den resureccion. Abraham tabata sa cu Jehova a dun’e un yiu maske e cu Sara tabata hopi bieu. (Heb. 11:11, 12, 18) Pues, e tabata consciente cu nada ta imposibel pa Jehova. Abraham no tabata sa kico lo a pasa riba e dia dificil ey, pero e tabatin confianza cu Jehova lo resucita su yiu. E tabata sa cu Jehova semper ta cumpli cu su promesanan. Pues, no ta nada straño cu Bijbel ta yama Abraham “tata di tur hende cu Dios ta considera husto pa motibo di nan fe.”

14. Ki retonan abo ta enfrenta den bo sirbishi na Jehova, y con e ehempel di Abraham por yuda bo?

¹⁴ Ta berdad cu awe Jehova no ta pidi nos sacrifica nos yiunan, pero si e ta  pidi nos pa obedece su mandamentonan, hasta ora nos no ta compronde e motibonan of ta dificil pa nos cumpli cu nan. Jehova a yega di pidi bo pa haci algo cu tabata dificil pa bo cumpli cu ne? Por ehempel, tin hende ta haya cu ta dificil pa predica. Kisas nan ta timido, y pesey ta dificil pa nan acerca un hende cu nan no conoce. Otronan no kier ta diferente. Nan no kier pa nan compañeronan di scol of coleganan di trabou rechasa nan. (Exo. 23:2; 1 Tes. 2:2) Si bo sinti cu bo tin cu haci algo dificil, corda riba Abraham su fe y curashi. Ora nos medita riba e ehempel cu homber- y muhernan fiel a pone, esey por motiva nos pa imita nan y hala mas cerca di nos Amigo, Jehova.—Heb. 12:1, 2.

15. Dicon nos por ta sigur cu Abraham nunca a arepenti cu el a obedece Jehova fielmente?

¹⁵ Bo ta kere cu Abraham a arepenti cu el a obedece Jehova fielmente? Bijbel ta bisa cu “Abraham a hala su ultimo rosea y a muri na un edad hopi avansa, un homber bieu y satisfecho di su bida.” (Gen. 25:8) Hasta ora Abraham tabatin 175 aña, e por a corda bek riba su bida y sintie satisfecho. Dicon? Pasobra su amistad cu Jehova tabata e cos di mas importante p’e. Sinembargo, ora nos lesa cu Abraham tabata “bieu y satisfecho”, esey no kiermen cu e no tabatin deseo di biba den futuro.

16. Ki goso Abraham lo experencia den Paradijs?

¹⁶ Bijbel ta bisa cu Abraham “tabata spera e stad cu tin berdadero fundeshi, e stad di cua Dios mes ta e diseñador y constructor.” (Heb. 11:10) Abraham tabatin fe cu algun dia e lo mira e stad ey, esta e Reino di Dios, goberna e Tera. Y sin duda, e lo mir’e. Bo por imagina bo con contento Abraham lo ta pa biba den Paradijs y sigui fortalece su amistad cu Jehova? Esta bon lo e sintie ora e haya sa cu su ehempel a yuda hopi sirbidor di Jehova pa miles di aña despues di su morto! Den Paradijs e lo descubri cu loke a sosode riba Sero Moria a simbolisa algo hopi mas importante. (Heb. 11:19) Ademas, Abraham lo haya sa cu e sufrimento cu el a pasa aden mientras e tabata prepara pa sacrifica su yiu, Isaak, a yuda miyones di hende fiel compronde e dolor cu Jehova a sinti ora el a entrega su Yiu, Hesucristo, como un sacrificio pa humanidad. (Juan 3:16) Abraham su ehempel ta yuda nos tur haya mas aprecio pa e rescate, e muestra di amor di mas grandi den historia.

17. (a) Kico abo ta determina pa haci? (b) Kico nos lo considera den e siguiente articulo?

¹⁷ Laga cada un di nos ta determina pa imita e fe di Abraham! Segun cu nos ta sigui siña mas tocante Jehova y ta obedec’e, nos lo mira con e ta bendiciona nos y proteha nos. (Lesa Hebreonan 6:10-12.) Laga nos haci esfuerso pa Jehova keda nos Amigo pa semper! Den e siguiente articulo nos lo considera tres ehempel mas di sirbidornan cu a bira bon amigo di Dios.