1, 2. Con David a mustra cu e tabata leal na Dios? (Wak e prome plachi.)

REY Saul y su 3.000 soldaatnan tabata busca David pa mata den e desierto di Juda. Pero un anochi, ora nan tur tabata morto na soño, David y Abisai a logra pasa meymey di e soldaatnan y a haya Saul. Abisai a fluister den David su horea: “Laga mi peg’e den tera cu e lansa, den un hinca; y lo mi no tin mester di hacie pa di dos biaha.” Pero loke David a haci despues por parce straño, el a bisa Abisai: “No mat’e, pasobra ken por saca su man contra SEÑOR su ungi y keda sin culpa? ... SEÑOR warda mi di saca mi man contra SEÑOR su ungi.”—1 Sam. 26:8-12.

² David a compronde kico e mester a haci p’e keda leal na Jehova. E tabata sa cu e mester a respeta Saul, y e no tabatin niun intencion pa hacie daño. Pakico no? Pasobra Saul tabata e Rey ungi di Israel. Awe, mescos cu den pasado, Jehova kier pa su sirbidornan ta leal na dje y mustra respet na  hende cu el a duna autoridad.—Lesa Mikeas 6:8. *

3. Con Abisai a demostra lealtad na David?

³ Abisai tabatin respet pa David. Por ehempel, despues cu David a bira rey, el a comete adulterio cu Betsabe y a purba di tapa e pica grave aki. El a pidi Joab pa percura pa Urias, esposo di Betsabe, muri den bataya. (2 Sam. 11:2-4, 14, 15; 1 Cro. 2:16) Como cu Joab tabata Abisai su ruman homber, probablemente e lo a tende loke cu David a haci. Pero toch el a sigui respeta David pasobra David tabata e Rey ungi di Dios. Ademas, nunca Abisai no a uza su poder como comandante militar pa haci su mes rey. En bes di esey, el a sirbi David y a defend’e contra su enemigonan.—2 Sam. 10:10; 20:6; 21:15-17.

4. (a) Dicon nos por bisa cu David tabata leal na Dios? (b) Kico nos lo trata den e articulo aki?

⁴ E echo cu David a nenga di mata Rey Saul a demostra cu e tabata un sirbidor leal di Jehova. Tempo cu David tabata jong, el a enfrenta e gigante Goliat, kende a tribi di “reta e ehercitonan di e Dios bibo.” (1 Sam. 17:23, 26, 48-51) Despues cu David a bira rey y a comete adulterio y asesinato, el a acepta disciplina for di profeta Natan y a arepenti. (2 Sam. 12:1-5, 13) Durante su biehes, el a sigui demostra lealtad na Dios. Por ehempel, el a haci contribucionnan generoso pa e construccion di e tempel di Jehova. (1 Cro. 29:1-5) Ta berdad cu el a comete erornan grave, pero semper el a keda leal na Jehova. (Sal. 51:4, 10; 86:2) Den e articulo aki nos lo analisa e ehempel di David y otro hende cu tabata biba den su tempo. Nos lo siña lesnan valioso cu lo yuda nos keda leal na Jehova prome cu na cualkier otro persona. Y nos lo papia tambe riba algun cualidad cu lo yuda nos keda leal na Jehova.

5. Ki les nos ta siña for di e eror cu Abisai a comete?

⁵ Ora Abisai kier a mata Rey Saul den e campamento, su intencion tabata pa mustra lealtad na David. Pero David a par’e, pasobra el a realisa cu ta robes pa haci daño na e ungi di Jehova. (1 Sam. 26:8-11) Esey ta siña nos un les importante: Ora nos mester dicidi na ken nos lo keda leal, ta importante pa nos laga principio di Bijbel guia nos.

6. Aunke ta normal cu nos kier keda leal na nos famia y amigonan, dicon nos tin cu tene cuidou?

⁶ Ta masha normal cu nos kier keda leal na nos famia y amigonan. Pero como cu nos ta imperfecto, nos curason por traiciona nos. (Jer. 17:9) Si un hende cu nos ta stima a haci algo malo of a bandona e berdad, nos mester corda cu ta mas importante pa nos keda leal na Jehova prome cu na cualkier otro persona.—Lesa Mateo 22:37.

7. Con un ruman muher a logra keda leal na Jehova den un situacion dificil?

⁷ Si un famia di bo ser expulsa for di e congregacion, bo por mustra Jehova cu bo ta leal na Dje. Por ehempel, un ruman muher cu yama Anne ^[1] a haya un yamada for di su mama cu tabata expulsa. El a bisa Anne cu e ta sintie hopi tristo pasobra su famia no kier papia cu ne. Pesey el a puntra Anne si e por a bishit’e. Anne a sintie hopi malo y a priminti su mama cu e lo contest’e via di un carta. Prome cu Anne a skirbi e carta, el a medita riba algun principio di Bijbel. (1 Cor. 5:11; 2 Juan 9-11) Den e carta, el a splica su  mama na un manera bondadoso cu ta e mes ta esun cu a bira lomba pa su famia ora el a peca y no kier a arepenti. Anne a bis’e tambe cu e unico manera cu e por sintie feliz atrobe ta door di bolbe cerca Jehova.—Sant. 4:8.

8. Ki cualidadnan por yuda nos keda leal na Jehova?

⁸ E sirbidornan leal di Jehova den tempo di David a demostra humildad, bondad y curashi. Ban wak con e tres cualidadnan aki por yuda nos keda leal na Jehova.

9. Dicon Abner a purba di mata David?

⁹ Probablemente Jonatan, yiu di Saul, y Abner, comandante di e ehercito di Israel, a wak ora cu David a trece e cabes di Goliat pa Rey Saul. Jonatan a bira amigo di David y a keda leal na dje. (1 Sam. 17:57–18:3) Pero Abner si no a keda leal na David. En realidad, mas despues el a hasta apoya Saul, kende kier a mata David. (Sal. 54:3; 1 Sam. 26:1-5) Tanto Jonatan como Abner tabata sa cu Dios a scoge David pa bira rey di Israel. Pero despues di e morto di Saul, Abner no a apoya David. Mas bien, el a purba di haci Is-boset, yiu di Saul, rey. Mas despues, probablemente Abner mes kier a bira rey, y kisas ta pesey el a tene relacion cu e concubina di Rey Saul. (2 Sam. 2:8-10; 3:6-11) Dicon Jonatan y Abner no a trata David mescos? Pasobra Jonatan tabata humilde y leal na Jehova pero Abner no.

10. Dicon Absalon no tabata leal na Dios?

¹⁰ Absalon, yiu di Rey David, tampoco no tabata leal na Dios, pasobra e no tabata humilde. E kier a bira rey, y pesey el a busca “un garoshi cu cabay y cincuenta homber pa core su dilanti.” (2 Sam. 15:1) Ademas, el a convence hopi Israelita pa nan ta leal na dje y no na su tata. Y mescos cu Abner, Absalon tambe a purba di mata David, maske e tabata sa cu ta Jehova a nombra David como rey di Israel.—2 Sam. 15:13, 14; 17:1-4.

11. Kico nos por siña for di e ehempelnan di Abner, Absalon y Baruk?

¹¹ E ehempelnan di Abner y Absalon ta mustra bon cla cu ambicion facilmente por pone un persona bira desleal na Dios. Claro cu niun fiel sirbidor di Jehova lo no kier imita e actitud malbado y egoista ey. Pero e deseo pa gana hopi placa of haya un carera prestigioso den e mundo aki tambe por daña nos relacion cu Jehova. Pa un tempo, Baruk, e secretario di profeta Jeremias, tabata kier algo cu e no tabatin  y e no tabata sirbi Jehova cu goso mas. Bijbel no ta bisa ta kico e tabata busca, pero Jehova a yud’e mira e peliger y a dun’e e mensahe aki: “Mira, loke mi a edifica mi ta bay basha abou, y loke mi a planta mi ta bay ranca, esta, henter e tera. Ma abo, bo ta busca cosnan grandi pa bo mes? No busca eseynan.” (Jer. 45:4, 5) Baruk a scucha di Jehova. Nos tambe mester haci esey, pasobra pronto Jehova ta bay destrui e mundo malbado aki.

12. Dicon nos no por keda leal na Jehova ora nos ta egoista?

¹² Daniel, un ruman di Mexico, mester a dicidi na ken e ta keda leal. E kier a casa cu un mucha muher cu no ta sirbi Jehova. Daniel a bisa: “Mi a sigui skirbi e mucha muher hasta despues cu mi a bira pionero.” Pero na dado momento Daniel a realisa cu si e bay tras di su deseonan egoista, e no ta demostra lealtad na Jehova. Pesey, el a mustra humildad y a dicidi di papia cu un anciano tocante e asunto. Daniel a sigui bisa: “El a yuda mi mira cu si mi kier keda leal na Jehova, mi mester a stop di skirbi e mucha muher. Despues di hopi oracion y yoramento, mi a stop. Despues di esey, mi a cuminsa disfruta mas di sirbishi.” Cu tempo, Daniel a casa cu un mucha muher cu ta stima Jehova, y awor e ta sirbi como superintendente di circuito.

13. Con Natan a demostra lealtad tanto na Dios como na David ora David a peca?

¹³ Lealtad na Jehova ta yuda nos demostra lealtad na otro hende. Por ehempel, profeta Natan tabata leal na Jehova, pero e tabata leal na David tambe. Despues cu David a comete adulterio y percura pa esposo di Betsabe muri den bataya, Jehova a manda Natan pa disciplina David. E profeta a obedece Jehova, y cu curashi el a bay cerca David. Pa yuda David mira con grave su picanan tabata, Natan a uza tacto y a papia bondadosamente cu ne. El a conta David un ilustracion di un homber rico cu a kita e unico lamchi di un homber pober. Ora David a tende esey, el a rabia masha hopi mes pa loke e homber rico a haci. Natan a bis’e: “Ta abo ta e homber!” E ora ey David a compronde cu el a peca contra Jehova.—2 Sam. 12:1-7, 13.

14. Con bo por demostra lealtad tanto na Jehova como na otro hende?

¹⁴ Di mes manera, bondad por yuda nos  demostra lealtad tanto na Jehova como na otro hende. Por ehempel, kisas bo tin prueba cu un ruman a comete un pica serio. Podise bo ta sinti cu bo mester ta leal na dje, specialmente si e ta bo famia of un bon amigo di bo. Pero si bo tapa e mal echo, lo bo no ta leal na Jehova. Y bo sa cu ta mas importante pa bo keda leal na Jehova prome cu na cualkier otro persona. Pesey, mescos cu Natan, na un manera bondadoso pero firme, bo mester bisa e persona pa e busca yudansa cerca e ancianonan mas pronto posibel. Si e no haci esey, abo mes mester bay bisa e ancianonan loke e persona a haci. Asina bo ta demostra lealtad na Jehova y alabes bo ta mustra bondad na e persona, ya cu e ancianonan lo yud’e drecha su relacion cu Jehova. Nan lo haci esey cu cariño y pasenshi.—Lesa Levitico 5:1; Galationan 6:1.

15, 16. Dicon Husai tabatin mester di curashi pa demostra lealtad na Dios?

¹⁵ Husai, un amigo di David, tabatin mester di curashi pa e mustra lealtad na Jehova y David. Su lealtad a ser poni na prueba ora cu Absalon a haya apoyo di hopi Israelita y kier a haci su mes rey. (2 Sam. 15:13; 16:15) David a huy for di Jerusalem, pero kico Husai a haci? Acaso el a bandona David y apoya Absalon? No. Aunke Rey David tabata bieu caba y tabata huy pa su bida, Husai a keda leal na dje como e Rey ungi di Jehova, y pesey Husai a bay topa cu David riba Sero di Oleifi.—2 Sam. 15:30, 32.

¹⁶ David a pidi Husai pa bay Jerusalem bek y pretende di ta amigo di Absalon pa asina e convenc’e pa sigui su conseho en bes di e conseho di Ahitofel. Husai a risca su bida pa haci loke David a pidie. Asina el a demostra cu e tabata leal na Jehova. Anto manera David a pidi den oracion, Absalon a scucha e conseho di Husai en bes di e conseho di Ahitofel.—2 Sam. 15:31; 17:14.

17. Dicon nos mester tin curashi pa demostra lealtad na Jehova?

¹⁷ Nos mester tin curashi pa demostra lealtad na Jehova. Hopi di nos ta demostra cu nos ta leal na Jehova debi cu nos ta para firme ora famia, colega di trabou of gobierno pone presion riba nos pa desobedec’e. Por ehempel, for di chikito, Taro, un ruman homber di Japon, tabata obedece su mayornan y tabata leal na nan; no djis pasobra e tabata obliga di haci esey, sino pasobra e tabata stima nan. Pero ora el a cuminsa studia Bijbel cu testigonan di Jehova, su mayornan no a keda niun tiki contento y kier a stop e. Esaki a duel Taro y tabata dificil pa e bisa su mayornan cu el a dicidi di asisti na e reunionnan. Taro a bisa: “Nan a rabia asina tanto cu pa hopi aña nan a prohibi mi di bishita nan na cas. Mi a pidi Jehova pa duna mi curashi pa mi no cambia mi decision. Awor nan actitud a cambia, y mi por bishita nan regularmente.”—Lesa Proverbionan 29:25.

18. Con e articulo aki a yuda bo?

¹⁸ Mescos cu David, Jonatan, Natan y Husai, nos tambe por sinti gran satisfaccion ora nos keda leal na Jehova. Di otro banda, hamas nos lo kier ta manera Abner y Absalon, kendenan no a demostra lealtad. Laga nos semper keda leal na Jehova mescos cu David. Como cu nos ta imperfecto, nos ta faya, pero nos por mustra Jehova cu ser leal na dje ta e cos di mas importante den nos bida.