BO TA corda cua tabata e dia mas feliz di bo bida? Kisas ta dia cu bo a casa of dia cu bo prome yiu a nace. Of tabata dia cu bo a batisa? Siguramente esey tabata e dia di mas importante y feliz di bo bida. Y sin duda bo rumannan tabata masha contento ora nan a mira cu bo ta stima Jehova cu henter bo curason, alma, mente y cu tur bo forsa.—Mar. 12:30.

Probablemente bo ta sinti bo hopi contento cu bo ta sirbi Jehova. Sinembargo, algun sirbidor di Dios ta sinti cu nan a perde nan goso. Dicon? Kico a pasa? Ki motibonan nos tin pa sigui sirbi Jehova cu goso?

E mensahe di Reino ta haci nos feliz. Dicon? Pasobra e mensahe aki ta yuda nos corda cu pronto Jehova lo caba cu e mundo malbado aki y cu e lo haci e Tera un paradijs. Ademas, Sofonias 1:14 ta bisa: “E gran dia di SEÑOR ta cerca; e ta cerca y e ta bin masha lihe mes.” Pero, si nos sinti cu nos ta wardando mas di loke nos a pensa, esey por desanima nos y pone nos perde nos goso. Como consecuencia, kisas nos no ta haci tur nos esfuerso mas den nos sirbishi na Jehova.—Prov. 13:12.

Ora nos ta asocia cu nos rumannan, esey ta motiva nos pa sigui sirbi Jehova cu goso. En realidad, kisas ta e bon conducta di e sirbidornan di Dios ta loke a atrae nos na e berdad y a yuda nos cuminsa sirbi Jehova cu goso. (1 Ped. 2:12) Pero, kico por pasa si un di nos rumannan comete un pica y mester haya disciplina? Wel, esaki por desanima algun ruman y pone nan perde nan goso.

Materialismo tambe por pone nos perde nos goso. Diabel ta uza su mundo pa laga nos pensa cu nos tin mester di cosnan cu en realidad nos no tin mester. Pero ta importante pa nos corda loke Hesus a bisa: “Ningun hende no por ta esclavo di dos doño, pasobra sea lo e odia esun y stima e otro of lo e pega na esun y desprecia e otro. Boso no por ta esclavo di Dios y di Rikesa.” (Mat. 6:24) Nos no por sirbi Dios cu goso y na mes momento probecha di tur loke e mundo aki ta ofrece.

Nos ta stima Jehova, y pesey no ta un carga pa haci su boluntad. (1 Juan 5:3) Corda kico Hesus a bisa: “Bini cerca mi, boso tur cu ta traha duro y cu ta carga, y lo mi refresca boso. Tuma mi yugo riba boso schouder y siña di mi, pasobra mi tin un genio suave y un curason humilde, y boso alma lo keda refresca. Pasobra mi yugo ta suave, y mi carga no ta pisa.” (Mat. 11:28-30) Pues nos tin goso pasobra nos ta discipel di Cristo. Pero pakico nos por bisa cu nos ta sinti goso sirbiendo Jehova? Laga nos considera tres motibo.—Hab. 3:18.

Nos ta sirbi Jehova, e Dios feliz, kende a duna nos bida. (Echo. 17:28; 1 Tim. 1:11) Sin importa cuanto tempo a pasa desde cu nos a batisa, nos ta sigui sirbi Jehova cu goso pasobra nos sa cu ta e a duna nos bida.

Ban wak e ehempel di Héctor, kende tabata sirbi como superintendente biahero pa 40 aña. E maleza di su esposa ta pone cu Héctor no por haci mes tanto cu antes. Pero aunke e ta hende grandi awor, e ta sigui sirbi Jehova cu goso. (Sal. 92:12-14) Héctor a bisa: “No ta nada facil pa cuida mi casa, y ta tristo pa mira con pocopoco su salud ta bay atras, pero mi no a laga esey kita mi goso di sirbi e Dios berdadero. Mi ta stima Jehova y ta sirbie cu henter mi curason pasobra mi sa cu el a crea hende cu un proposito, y ta danki na dje mi ta na bida. Pa mi no perde mi goso, mi ta haci tur mi esfuerso pa keda activo den sirbishi y tene na mente loke e Reino lo haci pa nos.”

Danki na e rescate, nos por sirbi Jehova cu goso. Bijbel ta bisa nos: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.” (Juan 3:16) Si, nos por haya pordon di pica y bida eterno si nos pone fe den e sacrificio di rescate di Hesus. Esaki sigur ta un bon motibo pa nos mustra nos gratitud pa e regalo amoroso ey y sigui sirbi Jehova cu goso.

Jesús, un ruman homber cu ta biba na Mexico, a bisa: “Mi tabata catibo di mi trabou, y tin biaha, mi tabata hasta traha cinco warda tras di otro a pesar cu mi no tabata obliga pa haci esey. Mi tabata haci esaki djis pa mi gana mas placa. Pero despues mi a siña tocante Jehova y con el a entrega su Yiu stima pa henter humanidad. Esey a duna mi un deseo fuerte pa sirbi Jehova, y mi a dedica mi bida na dje. Despues di a traha  28 aña pa e compania, mi a dicidi di kita for di e trabou ey, y mi a drenta den e sirbishi di tempo completo.” Esey tabata comienso di un etapa di bida hopi gososo.

Nos ta hiba un bida moralmente limpi, y esey ta haci nos feliz. Bo ta corda con bo bida tabata prome cu bo a siña conoce Jehova? Apostel Pablo a recorda e cristiannan na Roma cu un tempo nan tabata “esclavo di pica” pero cu nan a bira “esclavo di husticia.” Como cu nan a hiba un bida moralmente limpi, nan lo haya bida eterno. (Rom. 6:17-22) Nos tambe ta sigui Jehova su normanan, y como resultado, nos ta evita e consecuencianan di hiba un bida inmoral of violento. Esey no ta un motibo pa sinti goso?

Ban wak un otro ehempel. Jaime tabata un ateista, evolucionista y boxdo. Jaime a cuminsa asisti na e reunionnan cristian, y e amor cu e rumannan tabata mustra na otro a impresion’e. Pero pa e por a haci cambio den su bida, el a pidi Jehova pa yud’e haya fe. Jaime a bisa: “Pocopoco mi a siña cu ta existi un Tata amoroso y misericordioso. Su normanan husto a proteha mi. Si mi no a cambia, kisas mi tambe lo a muri manera algun di mi amigonan boxdo di antes. E añanan cu mi a sirbi Jehova ta e añanan di mas feliz di mi bida.”

Con nos mester sinti nos mes mientras nos ta warda riba e fin di e sistema malbado aki? Corda cu nos ta “sembra cu bista riba spirito santo” y lo “cosecha bida eterno.” Pesey, “laga nos no stop di haci loke ta bon, pasobra na e debido tempo nos lo cosecha si nos no cansa.” (Gal. 6:8, 9) Cu yudansa di Jehova, laga nos ta determina pa sigui persevera, haci esfuerso pa cultiva e cualidadnan cu nos tin mester pa sobrevivi “e tribulacion grandi” y sigui sirbi Jehova cu goso hasta bou di prueba.—Rev. 7:9, 13, 14; Sant. 1:2-4.

Nos por tin sigur cu Jehova lo bendiciona nos si nos persevera. E ta mira nos esfuerso y e amor cu nos tin p’e y pa su nomber. Si nos sigui sirbi Jehova cu goso, nos tambe por sinti mescos cu e salmista David, kende a bisa: “Mi a pone SEÑOR semper mi dilanti; pasobra e ta na mi man drechi, lo mi no wordo movi. Pesey mi curason ta contento, y mi alma ta regociha; mi carni tambe lo biba den siguridad.”—Sal. 16:8, 9.