1. Kico tabata bisto for di principio di creacion?

FOR di principio di creacion, Jehova y Hesus tabata uni. Hesus, e prome creacion di Dios, a bisa: “Mi tabata na [Jehova] su lado, manera un trahador experto, y dia tras dia mi tabata su delicia.” (Prov. 8:30) Tata y Yiu a traha hunto y a produci e gran variedad di bida cu nos ta mira awe. E sirbidornan di Dios tambe a coopera cu otro pa cumpli cu trabou cu el a duna nan. Por ehempel, Noe y su famia a traha e arca hunto. Despues, e Israelitanan a coopera cu otro pa traha e tabernakel, pa desmantel’e y transport’e mientras cu nan tabata biaha den desierto. Na e tempel, nan tabata canta hunto y toca instrumento pa alaba Jehova. Tur e actividadnan aki tabata posibel pasobra nan a coopera cu otro.—Gen. 6:14-16, 22; Num. 4:4-32; 1 Cro. 25:1-8.

2. (a) Kico tabata remarcabel tocante e cristiannan di prome siglo? (b) Ki preguntanan nos lo considera den e articulo aki?

² Union a caracterisa e cristiannan di prome siglo; nan a traha hunto bou di direccion di Hesucristo, cabes di e  congregacion. Apostel Pablo a splica cu aunke cada un di e cristiannan ungi ey tabatin “diferente tipo di don” y a participa den “diferente tipo di sirbishi” y “diferente tipo di actividad”, nan tur tabata parti di “un curpa.” (Lesa 1 Corintionan 12:4-6, 12.) Pero kico di awe? Con nos por ta uni den e trabou di predica, den congregacion y den famia?

3. Ki vision apostel Juan a haya?

³ Na final di e prome siglo, apostel Juan a haya un vision di shete angel cu tabata supla trompet. Ora e di cinco angel a supla su trompet, Juan a mira “un strea” cay for di cielo riba Tera. E “strea” tabatin un yabi cu el a uza pa habri e buraco di un abismo. Huma a sali for di e buraco, y un plaga di tiracochi a sali for di e huma. En bes di destrui mata y palo, e tiracochinan simbolico aki ta atacando “e hendenan cu no tin e seyo di Dios riba nan frenta.” (Rev. 9:1-4) Sin duda, Juan tabata sa cuanto daño un plaga di tiracochi por causa, ya cu nan a haci hopi daño na Egipto den tempo di Moises. (Exo. 10:12-15) E tiracochinan figurativo cu Juan a mira ta representa e cristiannan ungi cu ta proclamando Jehova su mensahe di huicio contra religion falso. Y miyones di hende cu tin e speransa pa biba riba Tera ta join e cristiannan ungi den e trabou ey. Sin duda, nan ta uni den e trabou di predica y ta yuda hopi hende sali for di religion falso y libra nan mes for di control di Satanas.

4. Ki trabou e pueblo di Dios mester haci, y cua ta e unico manera cu nan por cumpli cu ne?

⁴ E pueblo di Jehova tin e enorme trabou di predica e “bon noticia” rond mundo prome cu e fin di e sistema aki yega. (Mat. 24:14; 28:19, 20) Esaki ta inclui invita tur esnan “cu tin sed” pa bin bebe di “e awa di bida pornada.” (Rev. 22:17) Como miembro di e congregacion cristian, nos por haci esey solamente ora nos ta “uni y ta coopera cu otro.”—Efe. 4:16.

5, 6. Con e trabou di predica ta uni nos?

⁵ Pa nos por alcansa mas tanto hende posibel cu e bon noticia di e Reino, nos tin cu predica na un manera organisa. E instruccionnan cu nos ta haya den congregacion, manera por ehempel na e reunion pa sali den sirbishi di veld, ta yuda nos cu esey. Nos ta plama e mensahe di Reino y ta laga miyones di publicacion basa riba Bijbel. Tin biaha nos tin hasta campañanan special di predica. Abo ta haci esfuerso pa participa den esakinan? Ora bo haci esey, bo ta join miyones di otro hende cu tambe ta proclama e mensahe di e “angel [cu] ta bula meymey di cielo”, manera Revelacion 14:6 ta bisa.

⁶ Ta hopi emocionante pa lesa den e Anuario tocante e bon resultadonan di nos trabou mundial di predica. Ademas, nos ta traha hunto pa parti invitacion pa congresonan regional, special y internacional. Eynan nos ta haya discurso-, drama- y demostracionnan basa riba Bijbel cu ta motiva nos pa duna Jehova lo mihor. E conmemoracion di e morto di Hesus tambe ta uni nos. Pa obedece e mandato di Hesus, tur aña nos ta reuni riba  14 di nisan despues cu solo baha pa mustra aprecio pa Dios su bondad inmereci. (1 Cor. 11:23-26) Den e simannan prome cu e Conmemoracion, nos ta haci esfuerso pa invita mas tanto hende posibel pa asisti na e ocasion importante ey.

7. Kico nos por logra ora nos traha hunto?

⁷ Un tiracochi so no por haci mucho daño. Mescos tambe, cu nos esfuersonan so, nos no ta logra hopi. Pero ora nos traha hunto, nos por papia cu miyones di hende tocante Jehova, esun cu ta merece tur honor y alabanza. Pero tin mas manera cu nos por yuda fortalece e union di e pueblo di Dios.

8, 9. (a) Ki ilustracion Pablo a uza pa siña cristiannan pa nan keda uni? (b) Con nos por coopera cu otro den congregacion?

⁸ Den Pablo su carta na e Efesionan, el a splica nan con e congregacion ta hinca den otro. El a anima nan tambe pa “crece ... den tur cos.” (Lesa Efesionan 4:15, 16.) Kico lo yuda cada un di nos alcansa e meta ey? Pablo a uza e ehempel di un curpa pa splica e cristiannan cu cada un di nan por a yuda e congregacion keda uni y sigui Hesucristo, cabes di e congregacion. El a splica cu tur e partinan di e curpa ta coopera cu otro “mediante tur e jointnan cu ta duna loke tin mester.” Con cada un di nos, sea grandi of chikito, fuerte of debil, por yuda fortalece e union y spiritualidad di e congregacion?

⁹ Un factor importante pa logra esey ta ora nos ta mustra respet y sumision na e rumannan cu Hesus a nombra pa dirigi e congregacion. (Heb. 13:7, 17) Kisas no ta semper facil pa haci esaki. Pero nos por pidi Jehova yuda nos, y su spirito santo por yuda nos obedece instruccion di henter nos curason. Si nos no ta sinti nos inclina pa haci esey, nos mester djis pensa cuanto nos lo por yuda fortalece e union di nos congregacion ora nos ta sigui instruccion cu un actitud humilde. Ademas, nos amor pa otro lo crece.

10. Con sirbidornan ministerial ta yuda e congregacion keda uni? (Wak e prome plachi.)

¹⁰ Sirbidornan ministerial tambe ta yuda mantene union den congregacion, y nos ta aprecia esey hopi. Sin importa nan edad, e ruman hombernan aki di curason ta haci trabou cu ta beneficia tur hende. Por ehempel, nan ta percura pa nos tin suficiente literatura pa traha cu ne den sirbishi. Ademas, nan ta traha duro pa mantene e Salon di Reino y ten’e limpi, y tambe nan ta duna un bonbini na tur bishitante cu asisti na e reunion. Segun cu nos ta coopera cu e rumannan aki, nos ta yuda pa tur cos cana bon den e congregacion.—Compara cu Echonan 6:3-6.

11. Kico rumannan jong por haci pa promove union den congregacion?

¹¹ Hopi anciano a traha duro den congregacion pa hopi aña. Pero kisas debi na edad avansa, nan no por haci hopi manera antes, y pesey ruman hombernan mas jong por yuda. Aunke nan no tin hopi experencia, segun cu nan ta haya entrenamento, nan por cumpli cu mas responsabilidad. Y ora nan traha duro, nan por cualifica pa sirbi como anciano. (1 Tim. 3: 1, 10) Algun anciano jong a progresa te cu nan a cualifica pa sirbi como superintendente di circuito y ta yuda rumannan den hopi congregacion. Siguramente nos ta hopi agradecido pa tur e trabou cu e rumannan jong aki ta haci di buena gana.—Lesa Salmo 110:3; Eclesiastes 12:1.

12, 13. Kico por yuda miembronan di famia coopera cu otro?

¹² Awor, con nos por promove union den nos famia? Adoracion Como Famia tur siman por yuda fortalece e union entre grandi y chikito. Durante e momentonan agradabel aki, nos ta enfoca riba cosnan spiritual, y esey ta uni e famia. Nos por prepara pa sirbishi, y esey lo yuda nos predica na un manera eficaz. Y ora cada miembro di famia tende otro miembro papia tocante e berdad y mira cu henter e famia ta stima Jehova y kier agrad’e, nan ta hala mas cerca di otro.

¹³ Kico parehanan casa por haci pa coopera cu otro y asina duna alabanza na Jehova? Ora tur dos ta fiel sirbidor di Jehova, nan lo ta feliz y uni den nan matrimonio. Tuma por ehempel, Abraham cu Sara, Isaak cu Rebeca y Elcana cu Ana. Nan tur a mustra cariño na nan casa, y nos tambe mester haci mescos. (Gen. 26:8; 1 Sam. 1:5, 8; 1 Ped. 3:5, 6) Esaki lo uni nos cu nos casa y hala nos mas cerca di nos Tata celestial.—Lesa Eclesiastes 4:12.

14. Si bo casa no ta sirbi Jehova, kico bo por haci pa mantene bo matrimonio fuerte?

¹⁴ Cristiannan no mester casa cu hende cu no ta sirbi Jehova. (2 Cor. 6:14) Pero kico di rumannan cu ya ta casa cu hende cu no ta Testigo? Algun ruman a haya e berdad despues cu nan a casa, y nan casa no ta Testigo. A pesar di esey, ora nan aplica principio biblico, nan por logra union den nan famia. Esey ta encera cu nan ta coopera te caminda nan por, sin desobedece Jehova. Kisas esey no ta facil, pero pensa riba e bon resultado cu esey lo por trece cu ne. No ta facil tampoco pa aplica principio biblico ora un casa cu tabata sirbi Jehova fria. Esaki ta net loke a sosode cu un ruman cu yama Mary. E cu su esposo, David, tabata sirbi Jehova hunto, pero mas o menos 25 aña pasa, su esposo a stop di bay reunion. Mary a sigui bay e reunion- y congresonan y a haci tur su esfuerso pa aplica principio biblico na cas, incluso siña su yiunan tocante Jehova. Ora e muchanan a bira grandi y a bay for di cas, Mary a sintie su so. Anto David a cuminsa lesa e revistanan cu Mary tabata laga p’e. Cu tempo el a cuminsa asisti na reunion atrobe, y su nieto di seis aña tabata warda luga p’e. Si David no a bay reunion, su nieto tabata bis’e: “Mi a sinti falta di Opa awe na reunion.” Awor, David ta sirbi Jehova cu goso, y Mary ta feliz cu nan por haci esey hunto.

15. Con parehanan di mas edad por yuda e parehanan mas jong?

¹⁵ Como cu Satanas ta ataca famianan awe, ta importante pa tur sirbidor di Dios coopera cu otro den nan matrimonio. Sin importa cuanto aña bo tin casa, pensa kico bo por bisa of haci pa fortalece bo matrimonio. Parehanan di mas edad den congregacion por yuda parehanan mas jong den esaki.  Abo cu bo casa por invita un pareha mas jong pa join boso Adoracion Como Famia. Ora nan ta hunto cu boso, nan por mira cu ta hopi importante pa mustra cariño na otro y keda uni cu otro, sin importa cuanto aña boso tin casa.—Tito 2:3-7.

16, 17. Kico e sirbidornan uni di Dios ta anhela pa futuro?

¹⁶ Purba di imagina e Israelitanan den tempo biblico ta duna alabanza na Jehova durante un fiesta den su tempel na Jerusalem. Nan lo a prepara pa e biahe, cuida otro riba caminda y despues adora hunto na e tempel. Pa nan por a logra esey, nan mester a coopera cu otro. (Luc. 2:41-44) Segun cu nos awe ta sigui prepara pa drenta e mundo nobo, nos tambe mester ta harmoniosamente uni y coopera cu otro. Nos mester haci esfuerso continuo pa logra esey. Abo lo tin cu duna mas atencion na esaki?

¹⁷ Pensa riba e bendicionnan cu ta spera nos. Ya nos no ta parti mas di e desunion y confusion cu ta reina den e sistema di cosnan aki. Y awor nos ta mira cumplimento di loke Isaias y Mikeas a profetisa di dje, esta, e pueblo di Dios lo uni y bay na “e sero di SEÑOR.” (Isa. 2:2-4; lesa Mikeas 4:2-4.) Si, “den e ultimo dianan”, e pueblo di Jehova ta mas uni cu nunca. Imagina bo con feliz y contento nos lo ta den futuro ora tur hende lo ta harmoniosamente uni y ta coopera cu otro pa adora Jehova.